Read Xitsonga 2 Chronicles 17 Bible Online

2 Chronicles 17 - Xitsonga bible

2 Chronicles 17

¹Yoxafati, n'wanakwe, a fuma ematshan'weni ya yena, a tiya mbilu hikwalaho ka Israele;

²a veka mavandla emitini hinkwayo ya makhokholo ya Yuda, a ya veka ni le tikweni ra Yuda ni le mitini ya Efrayimi leyi nga tekiwa hi Asa, tata wa yena.

³Yehovha a va na Yoxafati, hikuva a fambile etindleleni to sungula ta Davhida, tata wa yena; a nga lavanga va Baali,

⁴hikuva a a lava Xikwembu xa tata wa yena, a famba emilawini ya xona, ku nga ri hi mukhuva wa Vaisraele.

⁵Kutani Yehovha a tiyisa vuhosi evokweni ra yena, va Yuda hinkwavo va luva eka Yoxafati; a va ni rifuwo lerikulu ni ku twala lokukulu.

⁶Mbilu ya yena yi tiyisiwa etindleleni ta Yehovha a ko a susa switsunga ni swifaniso etikweni ra Yuda.

⁷Hi lembe ra vunharhu ra ku fuma ka yena, a rhuma tindhuna ta yena, a ri Bene-Hayili, na Obadiya, na Zakariya, na Netanele, na Mikaya ku ya dyondzisa emitini ya Yuda;

⁸a rhuma na vona Valevhi, a a ri Xemaya, na Netaniya, na Zebadiya, na Asahele, na Xemiramoto, na Yonatani, na Adoniya, na Tobiya, na Tobi-Adoniya, va ri Valevhi; ni vaprista Elixama na Yehoramu a va ri na vona.

⁹Va dyondzisa etikweni ra Yuda, va ri ni buku ya nawu wa Yehovha; va ya hi miti hinkwayo ya Yuda, va dyondzisa tiko.

¹⁰Xichavo xa Yehovha xi va eku fumeni ka matiko hinkwawo lama rhendzeleke Yuda hi le xikarhi, kutani a va humanga nyimpi ku lwa na Yoxafati.

¹¹A ku ri ni Vafilista van'wana lava tiseleke Yoxafati mihlengo ni mali ya ndzuvo; hambi va ri Maarabu va n'wi tisela swifuwo leswitsongo, ma ri makhuna ya 7 700 ni swiphongo swa 7 700.

¹²Yoxafati a ya emahlweni hi ku kula, a fika eku hetisekeni; a aka tindlu ta vuhosi ni miti ya xuma etikweni ra Yuda.

¹³A a ri ni mitirho leyo tala emitini ya Yuda, ni vanhu va nyimpi, ti ri tinhenha eYerusalema.

¹⁴Hi wona ntsengo wa vona hi tindlu ta vatata wa vona. Eka Yuda, tindhuna ta khume ra madzana; Adina a yi ri ndhuna leyikulu, a a ri ni tinhenha ta 300 000;

¹⁵kusuhi na yena, ndhuna Yohanani, a a ri ni vavanuna va 280 000;

¹⁶kusuhi na yena, Amasiya, n'wana Zikri, la tinyiketeke Yehovha hi ku rhandza ka yena, a a ri ni tinhenha ta 200 000.

¹⁷Eka va Benjamini: Eliyada, wanuna wa matimba, la ngi a ri ni vavanuna lava tamelaka mavurha ni tinhlungula, va 200 000;

¹⁸kusuhi na yena Yozabadi, la ngi a ri ni vavanuna lava hlomaka va 180 000.

¹⁹Hi vona lava tirheleke hosi, ehandle ka lava vekiweke hi hosi emitini ya makhokholo, etikweni hinkwaro ra Yuda.