Read Xitsonga 2 Chronicles 23 Bible Online

2 Chronicles 23 - Xitsonga bible

2 Chronicles 23

¹Hi lembe ra ntlhanu na mambirhi, Yehoyada a tiya mbilu, a endla xinakulobye ni tindhuna ta dzana: a a ri Azariya, n'wana Yerohama, na Iximaele, n'wana Yohanani, na Azariya n'wana Obede, na Maaseya, n'wana Adaya, na Elixafati, n'wana Zikri.

²Va teka riendzo etikweni ra Yuda, kutani va hlengeleta Valevhi va miti hinkwayo ya Yuda ni tihosana ta tindlu ta vatatana va Israele va ta eYerusalema.

³Nhlengeletano hinkwayo yi endla xinakulobye ni hosi endlwini ya Xikwembu. Kutani Yehoyada a ku eka vona: “Hi loyi n'wana wa hosi, loyi a fanelaka ku fuma hilaha Yehovha a vuleke hakona ehenhla ka vana va Davhida.

⁴Mi ta endlisa sweswo: Ku avanyisa ka vunharhu ka n'wina lava nghenaka entirhweni hi siku ra Savata, va ri vaprista ni Valevhi, mi ta langutela tinyangwa;

⁵ku avanyisa kun'wana ka vunharhu ka n'wina mi ta va endlwini ya hosi, ni ku avanyisa kun'wana ka vunharhu, enyangweni ya Yesodi; kambe tiko hinkwaro ri ta yima eswivaveni swa yindlu ya Yehovha.

⁶Ku nga ka ku nga ngheni munhu endlwini ya Yehovha, loko va nga ri vaprista ni Valevhi lava nga entirhweni; vona va ta nghena, hikuva va hlawulekile; kutani tiko hinkwaro ri ta hlayisa ku lerisa ka Yehovha.

⁷Valevhi va ta rhendzela hosi, un'wana ni un'wana a tamele matlhari ya yena; kutani mani na mani la nga ta rhandza ku nghena endlwini, u ta dlawa; mi ta va ni hosi loko a nghena ni loko a huma.”

⁸Valevhi ni va Yuda hinkwavo va endla hinkwaswo hilaha Yehoyada, muprista, a va leriseke hakona; un'wana ni un'wana a teka vanhu va yena lava nghenaka hi siku ra Savata, ni lava humaka hi siku ra Savata; hikuva Yehoyada, muprista, a nga tshunxanga mitlawa leyi humaka.

⁹Yehoyada, muprista, a nyika tindhuna ta madzana mafumu, ni tinhlungula, ni switlhangu leswi ngi swi ri swa hosi Davhida, leswi ngi swi ri endlwini ya Xikwembu.

¹⁰Kutani a yimisa tiko hinkwaro, un'wana ni un'wana a tamele tlhari ra yena; ku suka etlhelo ra xinene ra yindlu ku fika etlhelo ra ximatsi, ekusuhi ni alitari ni yindlu, va rhendzela hosi.

¹¹Kavaloko va humesa n'wana wa hosi, va veka harhi ya vuhosi henhla ka yena, va n'wi nyika ni vumbhoni kutani va n'wi veka hosi; Yehoyada ni vana va yena va n'wi chela mafurha, va ku: “A ku hanye hosi!”

¹²Ataliya, kuteloko a twile rito ra tiko leri tsutsumaka ni leri dzunisaka hosi, a ta, a nghena eka tiko endlwini ya Yehovha.

¹³Kutani a vona hosi yi yimile exiyimisweni xa yona enyangweni, tindhuna ni lava tamelaka tinanga a va ri kusuhi ni hosi; vanhu hinkwavo va tiko a va tsakile va yimba tinanga; vayimbeleri a va ri ni timbila, va fambisa tinsimu ta ku vonga. Kavaloko Ataliya a handzula tinguvu ta yena, a ku: “Ku xenga! Ku xenga!”

¹⁴Kutani Yehoyada, muprista, a lerisa tindhuna ta dzana leti fambisaka nyimpi, ku humela emahlweni, a ku eka vona: “N'wi humeseni etinxaxeni, mani na mani la nga ta n'wi landza u ta dlawa hi tlhari!” Hikuva muprista a a ku: “Mi nga tshuki mi n'wi dlaya endlwini ya Yehovha!”

¹⁵Kavaloko va xaxamelana ematlhelweni mambirhi ya yena, kutani a nghena hi nyangwa ya tihanci endlwini ya hosi; va n'wi dlaya kona.

¹⁶Yehoyada a endla xinakulobye exikarhi ka yena ni tiko hinkwaro, ni hosi, leswaku va va tiko ra Yehovha.

¹⁷Kutani tiko hinkwaro ri nghena endlwini ya Baali, va ri mbundzuxa, va faya tialitari ta yena ni swifaniso swa yena, kambe va dlaya Matani muprista wa Baali, emahlweni ka tialitari.

¹⁸Yehoyada a veka valanguteri endlwini ya Yehovha, va ri hansi ka vaprista Va Valevhi, lava Davhida a vekeke mitlawa ya vona endlwini ya Yehovha ku humesa tiholokosta ta Yehovha, hilaha ku tsariweke hakona enawini wa Muxe va ri karhi va tsaka, va yimbelela hilaha Davhida a leriseke hakona.

¹⁹A veka valanguteri etinyangweni ta yindlu ya Yehovha, leswaku ku nga tshuki ku nghena munhu la nyamisiweke hi xilo xihi ni xihi.

²⁰A teka ni tindhuna ta dzana, ni vakulukumba, ni valerisi va tiko, ni vanhu hinkwavo va tiko, kutani a xikisa hosi, yi suka endlwini ya Yehovha kutani va nghena endlwini ya hosi enyangweni leyi tlakukeke; kutani va tshamisa hosi exitshan'weni xa vuhosi.

²¹Vanhu hinkwavo va tiko va tsaka, kambe muti wu rhula loko va dlayile Ataliya hi tlhari.