Read Xitsonga 2 Chronicles 26 Bible Online

2 Chronicles 26 - Xitsonga bible

2 Chronicles 26

¹Kavaloko tiko hinkwaro ra Yuda ri teka Uziya, la ngi a ri wa malembe ya 16, ri n'wi veka hosi ematshan'weni ya tata wa yena, Amasiya.

²Hi yena la pfuxeke Eloto, a wu tlherisela eku fumeni ka Yuda, loko hosi yi etlele ni vatata wa yona.

³Uziya a a ri wa malembe ya 16 loko a sungula ku fuma, kutani a fuma malembe ya 52 eYerusalema; vito ra mana wa yena a a ri Yekoliya, wa Yerusalema.

⁴A endla leswi lulameke emahlweni ka Yehovha hinkwaswo hilaha Amasiya, tata wa yena, a endleke hakona.

⁵A chivirika ku lava Xikwembu eku hanyeni ka Zakariya, munhu la nga twisisa swivono swa Xikwembu; emasikwini hinkwawo lawa a laveke Yehovha ha wona, Xikwembu xi n'wi katekisa.

⁶A huma nyimpi ku ya lwa ni Vafilista, a mbundzuxa rirhangu ra Gati, ni rirhangu ra Yabine, ni rirhangu ra Axidodo; kutani a aka miti etikweni ra Axidodo ni ra Vafilista.

⁷Xikwembu xi n'wi pfuna ku hlula Vafilista ni Maarabu, lava akeke eGuri-Baali ni Vamehuni.

⁸Vaamoni a va humesela Uziya ndzuvo, kutani ku twala ka yena ku ya fika etlhelo ra Egipta, hikuva a a kuma matimba lamakulu.

⁹Uziya a aka makhokholo eYerusalema, enyangweni ya yinhla, ni le nyangweni ya nkova ni le yinhleni, kutani a ma tiyisa.

¹⁰A aka makhokholo ni le mananga, a cela kona swihlovo leswo tala; hikuva a a ri ni mitlhambi leyo tala enkoveni ni le rivaleni, ni varimi, ni varimi va tivhinya etintshaveni ta Karmele, hikuva a a rhandza mitirho ya masimu.

¹¹Uziya a a ri ni nyimpi leyi tshamaka yi huma eku lweni; a va huma hi mitlawa leyi hlayiweke, hilaha va tsariweke hakona hi Yeyiele, mutsari, na Maaseya, mulanguteri; yi fambisiwa hi Hananiya, yin'wana ya tindhuna ta hosi.

¹²Ntsengo hinkwawo wa tihosana ta tindlu ta vatatana ni wa tinhenha, a va ri 2 600.

¹³Ehansi ka vona a ku ri ni nyimpi ya vavanuna va 307 500 lava lwaka hi matimba lamakulu ku pfuna hosi loko yi lwa ni valala va yona.

¹⁴Uziya a lavela vanhu va nyimpi hinkwayo leyi, switlhangu, ni matlhari, ni swihuku, ni swisirhelelo swa swifuva, ni mavurha, ni maribye ya swipelupelu.

¹⁵A endla eYerusalema swilo leswi nga swipelupelu leswi lunghisiweke hi tintlhari, swi vekiwa emakhokholweni, ni le tinhleni, ku hoxa miseve ni maribye lamakulu. Ku twala ka yena ku fika ekule, hikuva a a pfuniwa hi mukhuva lowu hlamarisaka, a ko a kuma matimba.

¹⁶Kuteloko a kumile matimba, mbilu ya yena yi tikukumuxa yi ko yi n'wi lovisa; a dyohela Yehovha, Xikwembu xa yena, hi ku nghena etempeleni ya Yehovha ku hisa mirhi ealitarini ya mirhi ya risuna.

¹⁷Kavaloko Azariya, muprista, a nghena endzhaku ka yena, a ri ni vaprista va Yehovha va 80, ti ri tinhenha;

¹⁸kutani va arisa hosi Uziya, va ku eka yena: “A hi ntirho wa wena, Uziya, ku hisela Yehovha mirhi ya risuna! I ntirho wa vaprista, vana va Aroni, lava hlawuriweke ku hisa mirhi ya risuna. Huma evukwetsimelweni, hikuva u dyohile! Kutani ku nga ka ku nga vi ku dzuniseni ka wena emahlweni ka Yehovha Xikwembu.”

¹⁹Kavaloko Uziya a kariha, evokweni ra yena a a tamele ximbitana ku hisa mirhi; kutani kakuloko a karihela vaprista, nhlokonho wu humelela emombyeni wa yena, emahlweni ka vaprista, endlwini ya Yehovha, ekusuhi ni alitari ya mirhi ya risuna.

²⁰Azariya, muprista lonkulu ni vaprista hinkwavo va n'wi languta, kutani maswivo, nhlokonho a wu ri emombyeni wa yena; va n'wi humesa hi ku hatlisa, na yena a angwetla a huma, hikuva Yehovha a a n'wi bile.

²¹Hosi Uziya a va wa nhlokonho ku fikela siku ra ku fa ka yena, a tshama endlwini ya vavabyi hi leswi ngi a ri wa nhlokonho, hikuva a siveriwile ku nghena endlwini ya Yehovha; kutani Yotamu, n'wana wa yena, a lerisa timhaka ta yindlu ya hosi, a ri karhi a avanyisa vanhu va tiko.

²²Leswi seleke swa timhaka ta Uziya, leto sungula ni leta ku hetelela, swi tsariwile hi muprofeta Esaya, n'wana Amotsi.

²³Uziya a etlela ni vatata wa yena, kutani va n'wi lahla ni vatata wa yena ensin'wini ya masirha ya tihosi, hikuva a va ku: “I wa nhlokonho.” Kutani Yotamu, n'wana wa yena, a fuma ematshan'weni ya yena.