Read Xitsonga 2 Chronicles 29 Bible Online

2 Chronicles 29 - Xitsonga bible

2 Chronicles 29

¹Hezekiya a sungula ku fuma loko a ri wa malembe ya 25; a fuma hi malembe ya 29 eYerusalema. Vito ra mana wa yena a a ri Abiya, n'wana Zakariya.

²A endla leswi lulameke emahlweni ka Yehovha, hinkwaswo hilaha Davhida, tata wa yena a endleke hakona.

³Hi lembe ro sungula ra ku fuma ka yena, hi n'hweti yo rhanga, a pfula tinyangwa ta yindlu ya Yehovha, kutani a ti lunghisa.

⁴A vitana vaprista ni Valevhi a va hlengeleta erivaleni ra le vuxeni,

⁵kutani a ku eka vona: “Ndzi yingiseni, n'wina Valevhi, tihlawuleni sweswi, mi hlawula ni yindlu ya Yehovha, Xikwembu xa vatata wa n'wina, mi humesa leswi nyameke handle ka vukwetsimelo!

⁶Hikuva vatata wa hina va tiarisile va endlile leswo biha emahlweni ka Yehovha, Xikwembu xa hina, va xi tshikile va hundzukisile mimombo ya vona, va nga languti Yindlu ya Yehovha, va yi fularhela.

⁷Va pfarile ni timbanti ta nyangwa leyikulu, va timile timboni, a va hisanga mirhi ya risuna, a va humesangi tiholokosta evukwetsimelweni bya Xikwembu xa Israele.

⁸Kutani Yehovha u karihele Yuda na Yerusalema, u va nyiketile exisandzwini ni le makhombyeni, ni le xisolweni hilaha mi swi vonaka hi mahlo ya n'wina.

⁹Hikwalaho ka swona, vatata wa hina, ni vana va hina va xinuna ni va xisati va wile hi tlhari, ni vasati va hina va le ku bohiweni.

¹⁰Sweswi ndzi rhandza ku endla ntwanano na Yehovha, Xikwembu xa Israele, leswaku ku hisa ka vukari bya yena ku hi sukela.

¹¹Vana vanga, mi nga tshuki mi hlwela hikuva Yehovha u mi hlawurile leswaku mi yima emahlweni ka yena ku n'wi tirhela, ni leswaku mi va malandza ya yena, mi n'wi hisela mirhi ya risuna.”

¹²Kavaloko Valevhi va pfuka, a a ri Mahata, n'wana Amasayi, na Yuwele n'wana Azariya, wa vana va Kohata; ni va vana va Merari: Kixi, n'wana Abidi, na Azariya, n'wana Yehaleleli; ni va Gerixoni: Yowa, n'wana Zima, na Edeni, n'wana Yowa;

¹³ni va vana va Elisafani: Ximri, na Yuwele; ni va vana va Asafa: Zakariya na Mataniya;

¹⁴ni va vana va Hemani: Yehuele na Ximeyi; ni va vana va Yedutuni: Xemaya na Uziele.

¹⁵Va hlengeleta vamakwavo, va tibasisa, kutani va ta hi ku lerisa ka hosi, hilaha Yehovha a nga vula hakona ku basisa yindlu ya Yehovha.

¹⁶Vaprista va nghena endlwini ya Yehovha ku yi basisa; va humesa handle, exivaveni xa yindlu ya Yehovha, thyaka hinkwaro leri va ri kumeke endlwini ya Yehovha, kutani Valevhi va ri teka va ri cukumeta handle, exinambyaneni xa Kedroni.

¹⁷Va sungula siku ro rhanga ra n'hweti yo sungula ntirho wa ku basisa; kutani siku ra ntlhanu na manharhu ra n'hweti va nghena enyangweni ya Yehovha; va basisa yindlu ya Yehovha hi masiku ya ntlhanu na manharhu; kutani hi siku ra khume na ntlhanu na rin'we ra n'hweti yo sungula, va heta.

¹⁸Kutani va nghena endlwini ya hosi Hezekiya, va ku: “Hi basisile yindlu hinkwayo ya Yehovha, ni alitari ya magandzelo, ni swibya hinkwaswo swa yona, ni tafula ra swinkwa leswi xaxametiwaka, ni swibya hinkwaswo swa yona.

¹⁹Ni swigotso hinkwaswo leswi nga nyamisiwa hi hosi Akazi eku fumeni ka yena enkarhini wa ku tiarisa ka yena hi swi lunghisile ni ku swi basisa; waswivo, swi le mahlweni ka alitari ya Yehovha.”

²⁰Siku leri tlhandlamaka, hosi Hezekiya a pfuka nimixo, a hlengeleta tihosana ta muti, kutani a tlhandluka endlwini ya Yehovha.

²¹Va tisa tinkunzi ta ntlhanu na timbirhi, ni makhuna ya ntlhanu na mambirhi ni swinyimpfana swa ntlhanu na swimbirhi ni swiphongo swa ntlhanu na swimbirhi, ma va magandzelo ya ku susa swidyoho, ma ri ya vuhosi, ni ya vukwetsimelo, ni ya Yuda. Kutani hosi yi byela vaprista, vana va Aroni, ku swi tlhava ealitarini ya Yehovha.

²²Kutani va tlhava tihomu, kutani vaprista va hlengeleta ngati, va xuva alitari ha yona; va tlhava ni tinyimpfu, kutani va xuva alitari hi ngati ya tona; va tlhava ni swinyimpfana, kutani va xuva alitari hi ngati ya swona.

²³Va tisa ni swiphongo swa gandzelo ra xidyoho emahlweni ka hosi ni ka nhlengeletano, kutani va tlhandleka mavoko ya vona henhla ka swona.

²⁴Kutani vaprista va swi tlhava, va humesa ngati ya swona ealitarini hikwalaho ka swidyoho, ku phahlela Vaisraele hinkwavo mhamba; hikuva hosi a yi lerisile leswaku holokosta ni gandzelo ra xidyoho swi humeseriwa Vaisraele hinkwavo.

²⁵Kutani a ve ka Valevhi endlwini ya Yehovha, va ri ni swiphambati ni magubu ni tiharipa, hilaha Davhida na Gadi, muvoni wa hosi, na Natani, muprofeta, va leriseke hakona; hikuva ku lerisa loku a ku humile ka Yehovha hi vaprofeta va yena.

²⁶Kutani Valevhi va yima kona, va ri ni timbila ta Davhida, ni vaprista va ri ni tinanga.

²⁷Kavaloko Hezekiya a va lerisa ku humesa holokosta ealitarini; kutani, kakuloko holokosta yi sungula ku humesiwa va sungula ku yimbelela risimu ra Yehovha hi tinanga, va ririsa ni timbila ta Davhida, hosi ya Israele.

²⁸Nhlengeletano hinkwayo yi khinsama, kutani risimu ri yimbeleriwa tinanga ti pfuma, hinkwaswo swi va tano ku ko ku hela holokosta.

²⁹Kuteloko va hetile ku humesa holokosta, hosi ni hinkwavo lava ngi a ri na vona, va korhama, va khinsama ematsolweni.

³⁰Kutani hosi Hezekiya ni tihosana va byela Valevhi ku dzunisa Yehovha hi marito ya Davhida na Asafa, muvoni; va n'wi dzunisa sweswo, va tsakile, kutani va korhama, va khinsama.

³¹Kutani Hezekiya a vulavula, a ku: “Leswi mi tihlawuleleke Yehovha, tshinelani sweswi, mi tisela yindlu ya Yehovha switlhavelo ni magandzelo ya ku khensa!” Kavaloko nhlengeletano yi tisa switlhavelo ni magandzelo ya ku khensa, kutani hinkwavo lava nga swi rhandza va humesa tiholokosta.

³²Ntsengo wa tiholokosta leti humesiweke hi nhlengeletano, wu va tihomu ta 70, ni tinyimpfu ta 100 ni swinyimpfana swa 200 hinkwaswo leswi swi va swa tiholokosta ta Yehovha.

³³Swifuwo leswi hlawuriweke a ti ri tihomu ta 600, ni tinyimpfu ta 3 000.

³⁴Ntsena vaprista a va nga talanga, kutani va tsandzeka ku yevula tiholokosta hinkwato, va fanele ku pfuniwa hi vamakwavo Valevhi, va ko va heta ntirho ni vaprista va ko va tibasisa; hikuva Valevhi a va tiyile mbilu ku tlula vaprista ku tibasisa.

³⁵Tiholokosta a ti tele ngopfu, hikuva a ku ri ni mafurha ya magandzelo ya ku khensa, ni vuchelo bya tiholokosta. Sweswo ntirho wa yindlu ya Yehovha wu pfuxiwa.

³⁶Hezekiya ni tiko hinkwaro va tsaka, hikuva Xikwembu a xi nghenisile moya lowunene ka vanhu va tiko; hikuva mhaka leyi yi endliwile kan'wekan'we.