Read Xitsonga 2 Chronicles 3 Bible Online

2 Chronicles 3 - Xitsonga bible

2 Chronicles 3

¹Solomoni a sungula ku aka yindlu ya Yehovha eYerusalema, entshaveni ya Moriya, laha Yehovha a humeleleke eka Davhida, tata wa yena, endhawini leyi Davhida a yi lunghiseke exivuyeni xa Orinani, wa ka Yebusi.

²A sungula ku aka hi siku ra vumbirhi ra n'hweti ya vumbirhi ya lembe ra vumune ra ku fuma ka yena.

³Hi wona mpimo wa masungulo lawa Solomoni a akeleke yindlu ya Xikwembu ehenhla ka wona: ku leha ka wona, hi mpimo wa khale, a swi ri swisungunhu swa 60, ni ku anama ka wona, swisungunhu swa 20.

⁴Nyangwa a yi ri emahlweni ka yindlu, ku leha ka yona a swi ri swisungunhu swa 20, ku ringana ni ku anama ka yindlu; ku tlakuka ka yona a swi ri swisungunhu swa 120; a yi nameka endzeni hi nsuku lowo saseka.

⁵A fulela yindlu leyikulu hi mirhi ya kipresi kutani a yi nameka hi nsuku lowunene, a wu sasekisa hi micindzu, ni tiketananyana.

⁶A nameka yindlu hi maribye ya risima ku yi sasekisa; nsuku a wu ri nsuku wa Paravhiyami.

⁷Kutani a nameka yindlu hi nsuku timhandze, ni mivundzu, ni khumbi ni timbanti ta yona, a vatla ni tikerubu ematlhelweni, ekhumbini.

⁸A aka ni yindlu ya xikwetsimisiso; ku leha ka yona ku ringana ni ku anama ka yindlu, a swi ri swisungunhu swa 20, ni ku anama ka yona, swisungunhu swa 20; a yi nameka hi nsuku lowunene lowu ringanaka titalenta ta 600;

⁹ku tika ka swipikiri a ti ri tixikele ta 50 ta nsuku. Kutani a nameka hi nsuku makamara lawa tlakukeke.

¹⁰A endla endlwini ya xikwetsimisiso tikerubu timbirhi leti vatliweke, kutani va ti nameka hi nsuku.

¹¹Timpapa ta tikerubu a ti ri ta swisungunhu swa 20 eku leheni: ripapa ra yin'wana ri fika ekhumbini ra yindlu; ku leha ka rona a swi ri swisungunhu swa ntlhanu, ni ripapa rin'wana ra swisungunhu swa ntlhanu ri fika eripapeni ra kerubu yin'wana,

¹²ripapa ra kerubu yin'wana, ra swisungunhu swa ntlhanu, ri fika ekhumbini ra yindlu, ni ripapa rin'wana, ra swisungunhu swa ntlhanu, ri hlangana ni ripapa ra kerubu yin'wana.

¹³Timpapa leti tshambulutiweke ta tikerubu leti, a ti endla swisungunhu swa 20. A ti yimile hi milenge ya tona, mimombo ya tona yi languta yindlu.

¹⁴A endla ni xisirhelo hi xivunguvungu, ni scarlet ni crimson, ni ntsembyana lowo saseka, kutani a tsala tikerubu ehenhla ka xona.

¹⁵Emahlweni ka yindlu, a endla timhandze timbirhi leti ngi ti ri ta swisungunhu swa 35 eku leheni; swirhendzevutana leswi ngi swi ri ehenhla ka tona, a swi ri swa swisungunhu swa ntlhanu.

¹⁶A endlela xikwetsimisiso tiketananyana, a ti veka ni le yinhleni ya timhandze; a endla ni magirenada ya dzana etiketaneni.

¹⁷Kutani a yimisa timhandze emahlweni ka yindlu, yin'wana hitlhelo ra xinene, yin'wana hitlhelo ra ximatsi; a thya leya xinene Yakini, ni leya ximatsi Bowazi.