Read Xitsonga 2 Chronicles 31 Bible Online

2 Chronicles 31 - Xitsonga bible

2 Chronicles 31

¹Swilo hinkwaswo leswi, kuteloko swi herile, Vaisraele hinkwavo lava ngi va ri kona va suka ku ya emitini ya Yuda, va ya faya swifaniso, va tsema swihlahla swa swifaniso swa Axera va mbundzuxa tindhawu leti tlakukeke ni tialitari ta tiko hinkwaro ra Yuda ni ra Benjamini, ni ra Efrayimi na Manase va ko va heta. Kutani vana va Israele hinkwavo va tlhelela emitini ya vona, un'wana ni un'wana endzhakeni ya yena.

²Kutani Hezekiya a veka mitlawa ya vaprista ni ya Valevhi emitirhweni ya vona, un'wana ni un'wana hi ntirho wa yena; vaprista ni Valevhi a va fanele ku humesa tiholokosta ni magandzelo ya ku khensa, ni ku khoma ntirho, ni ku dzunisa Yehovha ni ku yimbelela etinyangweni ta mixaxa ya Yehovha.

³Nhlengo wa hosi, lowu humaka erifuweni ra yena, wu va wa tiholokosta, ti ri tiholokosta ta mixo ni madyambu ni tiholokosta ta Tisavata, ni ta tin'weti letintshwa, ni ta mikhuvo hilaha ku tsariweke hakona enawini wa Yehovha.

⁴Kutani a byela vanhu va tiko, ni vaaki va Yerusalema, ku humesela vaprista ni Valevhi, nhlengo wa vona, leswaku va kuma matimba ku namarhela nawu wa Yehovha.

⁵Ku lerisa loku, kuteloko ku tivisiwile, vana va Israele va humesa hi ku tala swirhangana swa mavele, ni swa vhinyo, ni swa mafurha, ni swa vulombe ni swa mihandzu hinkwayo ya masimu va tisa swirhangana swa hinkwaswo hi ku tala.

⁶Vana va Israele ni Vayuda lava akeke emitini ya Yuda, va tisa, na vona, swa vukhume swa swifuwo leswikulu ni leswitsongo, ni swa vukhume swa swilo leswi hlawuleriweke Yehovha, Xikwembu xa vona, va endla tinhulu ha swona.

⁷Va sungula ku endla tinhulu leti hi n'hweti ya vunharhu kutani va heta hi n'hweti ya ntlhanu na timbirhi.

⁸Hezekiya ni tihosana va ta vona tinhulu leti, kutani va khensa Yehovha ni tiko ra yena ra Israele.

⁹Hezekiya a vutisa vaprista ni Valevhi ehenhla ka tinhulu leti.

¹⁰Kutani Azariya, muprista lonkulu, wa yindlu ya Sadoki. A hlamula, a ku eka yena: “Ku suka enkarhini lowu va sunguleke ku tisa mihlengo endlwini ya Yehovha, hi dyile, hi xurhile, hi siyile leswo tala hikuva Yehovha u katekisile tiko ra yena; kutani leswi seleke, hi swona leswo tala leswi.”

¹¹Kavaloko Hezekiya a va lerisa ku lunghisa makamara endlwini ya Yehovha, va ti lunghisa.

¹²Kutani va tisa kona hi ku chivirika mihlengo, ni swa vukhume ni swilo leswi hlawuriweke. Konaniya, Mulevhi, a a ri mulanguteri wa swona, kutani Ximeyi, makwavo a a ri mupfuni wa yena.

¹³Yehiele na Azaziya, na Nahata, na Asahele, na Yerimoto, na Yozabadi, na Eliele, na Yixi-Makiya, na Mahata, na Benaya, a va ri entirhweni lowo, va lerisiwa hi Konaniya na Ximeyi, makwavo, hilaha ku lerisiweke ha kona hi hosi Hezekiya na Azariya, mufambisi wa yindlu ya Xikwembu.

¹⁴Kore, n'wana Imina, Mulevhi, mulanguteri wa nyangwa ya le vuxeni, a a ri muhlayisi wa tinyiko leti humeseriweke Xikwembu hi ku rhandza, ku avela mihlengo leyi humeseriweke Yehovha, ni swilo leswi hlawuriweke ngopfu.

¹⁵Ehansi ka yena, Edeni, na Miniyamini, na Yexuwa, na Xemaya, na Amariya, na Xekaniya, va vekiwile emitini ya vaprista, va ri vanhu vo tshembeka, ku avela vamakwavo, lavakulu ni lavatsongo, hi mitlawa ya vona,

¹⁶ehandle ka vana va vavanuna lava tsariweke ku sungula hi va malembe manharhu ni le henhla ka wona; va ri hinkwavo lava nghenaka endlwini ya Yehovha hi timhaka ta siku rin'wana ni rin'wana, hi mitirho ya vona, hi mitlawa ya vona.

¹⁷Loko ku ri ku tswariwa ka vaprista, va tswariwa hi tindlu ta vatata wa vona; vona Valevhi va tswariwa ku sungula hi va malembe ya makume mambirhi ni lava tlulaka; va tsaleriwa mitirho ya vona hi mitlawa ya vona.

¹⁸Nhlengeletano hinkwayo yi fanele ku tsariwa ni vana va vona lavatsongo, ni vasati va vona, ni vana va vona va xinuna ni va xisati; hikuva a va tihlawulela vukwetsimelo hi ku tshembeka ka vona.

¹⁹Loko va ri vana va Aroni, vaprista lava akeke emasin'wini, ematlhelweni ya miti ya vona, a ku ri ni vanhu lava rhumiweke va vitaniwa hi mavito ya vona emutini wun'wana ni wun'wana ku nyika vanhu hinkwavo va xinuna va vaprista, ni va Valevhi hinkwavo lava tsariweke, swilo leswi va swi averiweke.

²⁰Hezekiya a endlisa sweswo etikweni hinkwaro ra Yuda; a endla leswinene, ni leswi lulameke, ni leswi nga swona emahlweni ka Yehovha, Xikwembu xa yena.

²¹Etimhakeni hinkwato leti a ti endleke ta ntirho wa yindlu ya Xikwembu, ni ta nawu, ni ta ku lerisa, a swi endla hi mbilu hinkwayo ya yena, a ri karhi a lava Xikwembu xa yena, kutani a kateka.