Read Xitsonga 2 Chronicles 34 Bible Online

2 Chronicles 34 - Xitsonga bible

2 Chronicles 34

¹Yosiya a a ri wa malembe ya ntlhanu na manharhu loko a sungula ku fuma, kutani a fuma malembe ya 31 eYerusalema.

²A endla leswo lulama emahlweni ka Yehovha, a famba etindleleni ta Davhida, tata wa yena, a nga ti hambukanga, hambi exineneni, hambi eximatsini.

³Hi lembe ra ntlhanu na manharhu ra ku fuma ka Yosiya loko a ha ri lontshwa, a sungula ku lava Xikwembu xa Davhida, tata wa yena; hi lembe ra 12 ra ku fuma ka yena, a sungula ku basisa Yuda na Yerusalema, a susa tindlu ta switsunga ni swifaniso swa Axera, ni swifaniso leswi vatliweke, ni swifaniso leswi chuluriweke.

⁴Va mbundzuxa emahlweni ka yena tialitari ta Baali, a faya timhandze ta dyambu leti ngi ti ri henhla ka tona, a faya ni swifaniso swa Axera, ni swifaniso leswi vatliweke ni swifaniso leswi chuluriweke; a swi endla ntshuri; kutani a wu hangalasa emasirheni ya lava swi gandzeleke.

⁵A hisa marhambu ya vaprista etialitarini ta vona, a basisa Yuda na Yerusalema.

⁶Emitini ya Manase, ni ya Efrayimi, ni ya Simiyoni ni ku fika eka Neftali, hileswaku emarhumbini ya yona, ematlhelweni hinkwawo, a mbundzuxa tialitari,

⁷a fayetela swifaniso swa Axera, ni swifaniso leswi vatliweke, a swi endla ntshuri; a tsema ni timhandze ta dyambu etikweni hinkwaro ra Israele; kutani a tlhelela eYerusalema.

⁸Hi lembe ra 18 ra ku fuma ka yena, a rhuma Xafani, n'wana Asaliya, na Maaseya, ndhuna ya muti na Yowa, n'wana Yowahazi, mutsari wa timhaka, ku basisa tiko ni yindlu ya Yehovha, ni ku lunghisa yindlu ya Yehovha, Xikwembu xa yena.

⁹Va ta eka Hilkiya, muprista lonkulu, kutani va nyikiwa mali leyi nga tisiwa endlwini ya Xikwembu, leyi Valevhi valanguteri va nyangwa, a va yi hlengeletile emavokweni ya va Manase, ni va Efrayimi, ni ya hinkwavo lava saleke Va Israele, ni va Yuda hinkwavo, ni va Benjamini ni vaaki va Yerusalema.

¹⁰Va yi veka emavokweni ya lava khomeke ntirho, va ri lava vekiweke valanguteri va wona endlwini ya Yehovha; lava khomaka ntirho lowu, va yi nyika lava tirhaka endlwini ya Yehovha ku yi lunghisa ni ku yi tiyisa;

¹¹va yi nyika vavatli ni vaaki ku xava maribye lama vatliweke, ni mirhi ya mitirho ya ku tiyisa vuako, ni ya malwango ya tindlu leti hlanhliweke hi tihosi ta Yuda.

¹²Vavanuna lava a va tirha hi ku tshembeka. Ehenhla ka vona ku vekiwile Yahata na Obadiya, Valevhi, exikarhi ka vana va Merari, na Zakariya, na Mexulama, vatukulu va Kohata, ku lerisa mitirho Valevhi hinkwavo a va tiva ku yimba timbila.

¹³A va ri valanguteri va lava rhwalaka mirhwalo, ni valerisi va hinkwavo lava khomaka ntirho wihi ni wihi, a ku ri ni vatsari, ni vakamberi, ni valanguteri va tinyangwa exikarhi ka Valevhi.

¹⁴Kakuloko va ha humesa mali leyi nga tisiwa endlwini ya Yehovha, Hilkiya, muprista, a kuma buku ya nawu wa Yehovha lowu nyikiweke ha Muxe.

¹⁵Kutani Hilkiya a vulavula na Xafani, mutsari, a ku eka yena: “Ndzi kumile buku ya nawu endlwini ya Yehovha.” Hilkiya a nyika Xafani buku;

¹⁶yena a tisa buku eka hosi, a ambela hosi timhaka, a ku: “Hinkwaswo leswi lerisiweke eka malandza ya wena, ma swi endlile.

¹⁷Va humesile mali leyi kumiweke endlwini ya Yehovha va yi vekile emavokweni ya lava lerisaka mitirho, ni le mavokweni ya lava khomaka ntirho.”

¹⁸Xafani, mutsari, a engeta a ku eka hosi: “Hilkiya, muprista, u ndzi nyikile buku.” Kutani Xafani a yi hlaya emahlweni ka hosi.

¹⁹Kuteloko hosi yi yingisile marito ya nawu, yi handzula tinguvu ta yona;

²⁰kutani yi lerisa Hilkiya, na Ahikama, n'wana Xafani, na Abidoni, n'wana Mikaya, na Xafani, mutsari, na Asaya nandza wa hosi yi ku eka vona:

²¹“Fambani, mi ya ndzi vutisela Yehovha, ni lava seleke va Israele ni va Yuda, emhakeni ya marito ya buku leyi va yi kumeke, hikuva vukari bya Yehovha lebyi a hi karihelaka ha byona byikulu, hikuva vatata wa hina a va hlayisangi rito ra Yehovha ku endla hinkwaswo hilaha ku tsariweke hakona ebukwini leyi.”

²²Kutani Hilkiya ni lava hosi yi va leriseleke va ya ka Hulida, muprofeta wa wansati, nsati wa Xalumi, n'wana Tokata, n'wana Hasira, muhlayisi wa tinguvu; a akile eYerusalema, etlhelweni rin'wana ra muti, va n'wi byela timhaka teto.

²³Yena a ku eka vona: Yehovha, Xikwembu xa Israele, u vurisa sweswo, a ku: “Fambani, mi ya byela munhu loyi a mi rhumeke ka mina, mi ku:

²⁴‘Yehovha u vurisa sweswo, a ku: “Ndzi ta tisa khombo ehenhla ka ndhawu leyi ni le henhla ka vaaki va yona, hi mirhukano hinkwayo leyi tsariweke ebukwini leyi va yi hlayeke emahlweni ka hosi ya Yuda.

²⁵Hikuva va ndzi tshikile va hisele swikwembu swin'wana mirhi ya risuna, va ta ndzi pfuka hi mitirho hinkwayo ya mavoko ya vona; hikwalaho vukari bya mina byi pfurhela ndhawu leyi, byi nga ka byi nga timeki.”

²⁶Loko yi ri hosi ya Yuda leyi mi rhumeke ku vutisa Yehovha, mi ta vurisa sweswo eka yona, mi ku: “Yehovha, Xikwembu xa Israele, u vurisa sweswo hikwalaho ka marito lawa u ma yingiseke, a ku:

²⁷Leswi mbilu ya wena yi oloveke, u va u titsongahata emahlweni ka Xikwembu siku u tweke marito ya xona henhla ka ndhawu leyi ni le henhla ka vaaki va xona, kutani u handzurile tinguvu ta wena, u va u rila emahlweni ka mina, ndzi swi yingisile, ku vula Yehovha.

²⁸Ndzi ta ku amukela eka vatata wa wena, kutani u ta vekiwa hi ku rhula esirheni ra wena, kutani mahlo ya wena ma nga ka ma nga voni makhombo hinkwawo lawa ndzi nga ta ma tisela endhawini leyi ni le henhla ka vaaki va yona.” ’ ” Kutani va yisa rito leri eka hosi.

²⁹Kutani hosi yi hlengeleta vakulukumba hinkwavo va Yuda ni va Yerusalema.

³⁰Hosi yi khandziya endlwini ya Yehovha, yi ri ni vanhu hinkwavo va Yuda, ni vaaki va Yerusalema, ni vaprista ni Valevhi, ni tiko hinkwaro, ku suka ka lonkulu, ku yisa ka lontsongo; kutani va hlaya etindleveni ta vona marito hinkwawo ya buku ya ntwanano leyi kumiweke endlwini ya Yehovha.

³¹Hosi yi yima endhawini ya yona, kutani yi endla ntwanano emahlweni ka Yehovha ku landza Yehovha, ni ku hlayisa milawu ya yena, ni vumbhoni bya yena, ni ku lerisa ka yena, hi mbilu hinkwayo ya yona, ni moya hinkwawo wa yona, ni ku famba hi marito ya ntwanano lama tsariweke ebukwini leyi.

³²Yi nghenisa entwananweni hinkwavo lava ngi va ri Yerusalema, ni le tikweni ra Benjamini; kutani vaaki va Yerusalema, va hlayisa ntwanano wa Xikwembu xa vatata wa vona.

³³Kutani Yosiya a susa manyala hinkwawo ya matiko hinkwawo ya vana va Israele; a va a byisa hinkwavo lava ngi va ri etikweni ra Israele, ku tirhela Yehovha, Xikwembu xa vona. Hi masiku hinkwawo ya yena, a va fularhelanga Yehovha, Xikwembu xa vatata wa vona.