Read Xitsonga 2 Chronicles 36 Bible Online

2 Chronicles 36 - Xitsonga bible

2 Chronicles 36

¹Kutani tiko ri teka Yowahazi n'wana Yosiya, ri n'wi veka hosi ematshan'weni ya tata wa yena eYerusalema.

²Yowahazi a a ri wa malembe ya 23 loko a sungula ku fuma, kutani a fuma tin'hweti tinharhu Yerusalema.

³Hosi ya Egipta yi n'wi tekela vuhosi bya yena eYerusalema, yi lerisa tiko ndzuvo wa titalenta ta dzana ta silivhere ni talenta ya nsuku.

⁴Kutani hosi ya Egipta yi veka Eliyakimi, makwavo hosi ya Yuda na Yerusalema; yi hundzula vito ra yena, yi n'wi thya Yoyakimi. Kutani Neko a teka Yowahazi, makwavo, a n'wi yisa eEgipta.

⁵Yoyakimi a a ri wa malembe ya 23 loko a sungula ku fuma, kutani a fuma malembe ya 11 eYerusalema, a endla leswo biha emahlweni ka Yehovha, Xikwembu xa yena.

⁶Nebukadnetsara, hosi ya Babilona, a tlhandluka ku n'wi pfuka, kutani a n'wi boha hi tiketana ta koporo ku n'wi yisa eBabilona.

⁷Nebukadnetsara a yisa Babilona swibya swin'wana swa yindlu ya Yehovha, a swi veka endlwini ya yena ya vuhosi eBabilona.

⁸Leswi seleke swa timhaka ta Yoyakimi, manyala lawa a ma endleke, ni leswi kumiweke ka yena, maswivo swi tsariwile ebukwini ya tihosi ta Israele ni ta Yuda. Yoyakini, n'wana wa yena, a fuma ematshan'weni ya yena.

⁹Yoyakini a a ri wa malembe ya 18 loko a sungula ku fuma; kutani a fuma tin'hweti tinharhu na khume ra masiku eYerusalema, a endla leswo biha emahlweni ka Yehovha.

¹⁰Eku heleni ka lembe, hosi Nebukadnetsara a rhuma vanhu ku n'wi khoma, va n'wi yisa eBabilona, ni swibya leswo saseka swa yindlu ya Yehovha. A veka Sedekiyasi makwavo, hosi ya Yuda na Yerusalema.

¹¹Sedekiyasi a a ri wa malembe ya 21 loko a sungula ku fuma, kutani a fuma malembe ya 11 eYerusalema.

¹²A endla leswo biha emahlweni ka Yehovha, Xikwembu xa yena; a nga titsongahatangi emahlweni ka Yeremiya, muprofeta, loyi a n'wi byeleke rito ra Yehovha.

¹³A va a xandzukela hosi Nebukadnetsara leyi n'wi hlambanyiseke hi vito ra Xikwembu; kutani a nonon'hwisa nhamu ya yena, a nonon'hwisa ni mbilu ya yena, a nga ti tshuka a tlhelela eka Yehovha Xikwembu xa Israele.

¹⁴Swi tsandza ni tihosana hinkwato ta vaprista, ni vanhu va tiko, va andzisa ku homboloka ka vona, va landza manyala hinkwawo ya matiko; va va va nyamisa yindlu ya Yehovha leyi a tikwetsimiseleke yona eYerusalema.

¹⁵Yehovha, Xikwembu xa vatata wa vona, a va layile emikarhini leyo tala hi tintsumi ta yena, hikuva a a rhandza ku ponisa tiko ra yena ni vuako bya yena.

¹⁶Kambe a va rhukana tintsumi ta Xikwembu, va sandza marito ya xona, va hleka vaprofeta va xona, vukari bya Yehovha byi ko byi pfuka tiko ra yena swonghasi leswaku ku nga ha vi na ku ponisiwa.

¹⁷A rhuma eka vona hosi ya Vakalediya ku va pfuka, a dlaya hi tlhari majaha ya vona evukwetsimelweni bya vona; a nga tsetselelanga majaha, hambi vanhwanyana hambi vakulukumba, hambi misisi leyo basa; a n'wi nyiketa hinkwaswo.

¹⁸Ni swingolongondzwana swa yindlu ya Xikwembu, leswikulu ni leswitsongo, ni xuma xa yindlu ya Yehovha, ni xuma xa hosi ni xa tindhuna ta yena, Nebukadnetsara a yisa hinkwaswo eBabilona.

¹⁹Va hisa yindlu ya Xikwembu, va mbundzuxa rirhangu ra Yerusalema, va hisa tindlu hinkwato ta vuhosi, va onha swilo hinkwaswo swa risima.

²⁰A yisa Babilona lava poneke matlharini, kutani va n'wi tirhela ni vana va yena, ku ko ku pfuka vuhosi bya ku fuma ka Peresi,

²¹leswaku ku hetiseka rito ra Yehovha leri nga vuriwa hi nomu wa Yeremiya, tiko ri ko ri tsakela Tisavata ta rona; ri wisa hi nkarhi hinkwawo lowu, ku ko ku hela malembe ya 70.

²²Hi lembe ro sungula ra Korexe, hosi ya Peresi hileswaku ku endlakala rito ra Yehovha leri a ri vuleke hi nomu wa Yeremiya, Yehovha a pfuxa mbilu ya Korexe, hosi ya Peresi, kutani a twarisa hinkwako eku fumeni ka yena, hi mukhosi ni matsalwa mhaka leyi nge:

²³“Ku vula Korexe, hosi ya Peresi: ‘Yehovha, Xikwembu xa le matilweni, xi ndzi nyikile vuhosi hinkwabyo bya misava; kambe xi ndzi lerisile leswaku ndzi n'wi akela yindlu eYerusalema, etikweni ra Yuda. U kwihi exikarhi ka n'wina la nga wa tiko ra xona? Yehovha, Xikwembu xa yena a a ve na yena, a a tlhandluke!’ ”