Read Xitsonga 2 Chronicles 4 Bible Online

2 Chronicles 4 - Xitsonga bible

2 Chronicles 4

¹Kutani a endla alitari ya koporo; ku leha ka yona a swi ri swisungunhu swa 20, ni ku anama ka yona swisungunhu swa 20; ni ku tlakuka ka yona, swisungunhu swa 20.

²A chulula ni lwandle ra koporo; a ri ri ra swisungunhu swa 10, ku suka etlhelo rin'wana ku fika etlhelo rin'wana; a xi ri xirhendzevutana; ku tlakuka ka rona a swi ri swisungunhu swa ntlhanu, kutani ngoti ya swisungunhu swa 30 yi kota ku ri rhendzela hinkwaro.

³Swifaniso swa tihomu a swi ri ehansi ka rona ematlhelweni hinkwawo, a swi ri khume hi swisungunhu; tihomu leti a ti endla tinxaxa timbirhi, ti chuluriwile swin'we na rona.

⁴A ri vekiwile ehenhla ka tihomu ta 12; tinharhu ta tona ti langute en'walungwini, tinharhu ti langute evupeladyambu, tinharhu ti langute edzongeni, tinharhu ti langute evuxeni; lwandle a ri ri ehenhla ka tona, kutani micila hinkwayo ya tona a yi ri exikarhi.

⁵Ku tsindziyela ka rona a xi ri xandla xin'we, nomu wa rona a wu fana ni nomu wa ndzheko, ri fana ni khon'wa; ri enela tibati ta 3 000.

⁶A endla ni mikamba ya khume; a veka ntlhanu wa yona tlhelo ra xinene, ni ntlhanu tlhelo ra ximatsi; a va hlantswa kona mitirho ya holokosta; rona lwandle ri pfuna vaprista ku hlamba kona.

⁷A endla ni tikandelari ta khume ta nsuku hi nawu wa tona; a ti veka etempeleni, leta ntlhanu exineneni ni ta ntlhanu eximatsini.

⁸A endla ni matafula ya khume a ma veka etempeleni, ya ntlhanu a ma veka exineneni, ni ya ntlhanu eximatsini. A endla ni mindzheko ya dzana ya nsuku.

⁹Kutani a endla xivava xa vaprista, ni xivava lexikulu, ni timbanti ta swona; a nameka timbanti hi koporo.

¹⁰Loko ri ri lwandle, a ri veka etlhelo ra xinene ra yindlu evuxeni ri languta edzongeni.

¹¹Huramu a endla timbita ni tifoxolo ni mikambana. Huramu a heta ntirho wa yindlu ya Xikwembu lowu a wu endleleke Solomoni:

¹²timhandze timbirhi ni tinhloko timbirhi ta swirhendzevutana leti ngi ti ri etinhleni ta timhandze; ni mitirho mimbirhi leyi lukiweke ku funengeta tinhloko letimbirhi ta swirhendzevutana leti ngi ti ri etimhandzeni,

¹³ni magirenada ya 400 ya mitirho mimbirhi leyi lukiweke, tinxaxa timbirhi ta magirenada eka ntirho wun'wana ni wun'wana ku funengeta tinhloko letimbirhi ta swirhendzevutana leti ngi ti ri etinhleni ta timhandze;

¹⁴a endla ni switikirheto, ni mikamba ehenhla ka swona;

¹⁵ni lwandle leri nga rin'we, ni tihomu ta 12 leti ngi ti ri ehansi ka rona;

¹⁶ni timbita, ni tifoxolo, ni tiforoko, ni swigotso hinkwaswo swa swona. Huramu-Abi a swi endlela hosi Solomoni hi koporo leyi vangamisiweke, swi ri swa yindlu ya Yehovha.

¹⁷Hosi yi va lerisa ku swi chulula ebanyini ra Yordani, emisaveni ya vumba, exikarhi ka Sukoti na Sereda.

¹⁸Solomoni a endla swigotso leswi, swi tele ngopfungopfu, hikuva a va lavisisanga ku tika ka koporo.

¹⁹Solomoni a endla ni swingolongondzwana hinkwaswo swa yindlu ya Xikwembu: yi nga alitari ya Xikwembu, ni matafula ku veka swinkwa ehenhla ka wona;

²⁰ni tikandelari ta nsuku lowunene, ni mavoningo ya tona, lawa va ma lumekaka hi nawu emahlweni ka vukwetsimelo,

²¹ni swiluva ni mavoningo, ni swikero swa mavoningo, swi ri swa nsuku lowunene ngopfu;

²²ni mikwana, ni mindzheko, ni mikombe, ni timbita ta ndzilo, swi ri swa nsuku lowunene.

²³Loko yi ri nyangwa ya yindlu, ni timbanti ta yona ta le ndzeni, enyangweni ya xikwetsimisiso, ni timbanti ta yindlu enyangweni ya tempele, ti ri ta nsuku.