Read Xitsonga 2 Chronicles 6 Bible Online

2 Chronicles 6 - Xitsonga bible

2 Chronicles 6

¹Kavaloko Solomoni a ku: “Yehovha u rhandzile ku aka emunyameni!

²Kutani mina ndzi akile yindlu laha u nga ta tshama kona, ni vuako laha u nga ta aka kona hi masiku.”

³Kutani hosi yi hundzuluka, yi katekisa nhlengeletano hinkwayo ya Israele; nhlengeletano hinkwayo ya Israele a yi yimile.

⁴Kutani yi ku: “A ku dzunisiwe Yehovha, Xikwembu xa Israele, la vulavuleke hi nomu wa yena na tatana Davhida, a heta hi voko ra yena leswi a swi vuleke, loko a ku:

⁵‘Ku sungula siku leri ndzi humeseke tiko ranga etikweni ra Egipta, a ndzi hlawulanga muti exikarhi ka tinyimba ta Israele ku aka kona yindlu leswaku vito ra mina ri va kona, kutani a ndzi hlawulanga munhu leswaku a va hosi ya tiko ranga ra Israele;

⁶kambe ndzi hlawurile Yerusalema, leswaku vito ra mina ri va kona, kutani ndzi hlawurile Davhida leswaku a fuma ehenhla ka tiko ranga ra Israele.’

⁷Tatana Davhida u rhandzile ku akela vito ra Yehovha, Xikwembu xa Israele, yindlu;

⁸kambe Yehovha a ku eka Davhida, tata wanga: ‘Leswi u rhandzeke ku akela vito ra mina yindlu, u endlile swona hi ku swi rhandza,

⁹ntsena a hi wena loyi a nga ta aka yindlu, kambe i n'wana wa wena, la humeke exisutini xa wena, la nga ta akela vito ra mina yindlu.’

¹⁰Yehovha u hetisile rito leri a ri vuleke; ndzi tivekile ematshan'weni ya tatana Davhida, ndzi tshamisile exiluvelweni xa Israele, hilaha Yehovha a nga vula hakona, kutani ndzi akele vito ra Yehovha, Xikwembu xa Israele, yindlu.

¹¹Ndzi vekile kona areka laha ku nga ni ntwanano wa Yehovha, lowu a wu endleke ni vana va Israele.”

¹²Kutani Solomoni a yima emahlweni ka alitari ya Yehovha, a langutene ni nhlengeletano hinkwayo ya Israele, kutani a tshambuluta mavoko ya yena;

¹³hikuva Solomoni a a endlile ndhawu ya ku yima eka yona ya koporo, a yi vekile exikarhi ka xivava; ku leha ka yona a swi ri swisungunhu swa ntlhanu, ni ku anama ka yona swisungunhu swa ntlhanu ni ku tlakuka ka yona swisungunhu swinharhu; a khandziya kona, kutani, kuteloko a khinsamile hi matsolo emahlweni ka nhlengeletano hinkwayo ya Israele, a tlakusela mavoko ya yena ehenhla,

¹⁴a ku: “Oho! Yehovha, Xikwembu xa Israele! A ku na Xikwembu lexi fanaka na wena, hambi ku ri ematilweni, hambi ku ri emisaveni: wena la hlayiselaka malandza ya wena lama fambaka emahlweni ka wena hi timbilu hinkwato ta vona, ntwanano ni tintswalo;

¹⁵hikuva u endlele nandza wa wena Davhida, tata wanga, leswi u n'wi tshembiseke swona; u vurisile hi nomu wa wena kutani hi voko ra wena u swi hetisile namuntlha.

¹⁶Oho! Yehovha, Xikwembu xa Israele! Sweswi, endlela nandza wa wena Davhida, tata wanga, leswi u n'wi byeleke swona loko u te: ‘U nga ka u nga pfumali ni siku ni rin'we emahlweni ka mina, munhu la tshamaka exiluvelweni xa Israele, loko kunene vana va wena va hlayisa tindlela ta vona, ku famba enawini wa mina hilaha u fambeke hakona emahlweni ka mina.’

¹⁷Oho! Yehovha, Xikwembu xa Israele! A ku hetisiwe sweswi, rito leri u ri vuleke eka nandza wa wena, Davhida!

¹⁸“Kambe xana kunene Xikwembu xi nga aka ni munhu emisaveni xana? Waswivo, matilo, ni matilo ya matilo ma nga ka ma nga ku ringani; swi tsandza ni yindlu leyi ndzi yi akeke!

¹⁹Oho! Yehovha, Xikwembu xanga! Amukela xikhongelo xa nandza wa wena ni ku kombela ka yena, u yingisa ku huwelela ni ku khongela loku nandza wa wena a ku humesaka emahlweni ka wena,

²⁰leswaku mahlo ya wena ma hanyanya vusiku ni nhlekanhi, ma languta yindlu leyi ni ndhawu leyi u nga vula leswaku u ta veka vito ra wena kona; ni leswaku u yingisa xikhongelo lexi nandza wa wena a xi humeselaka ndhawu leyi.

²¹U ta yingisa ni mikhongelo ya nandza wa wena ni ya tiko ra wena ra Israele loko va khongela endhawini leyi; kutani wena u ta yingisa u ri etilweni endhawini ya vuako bya wena: u ta yingisa ni ku rivalela!

²²“Kungakuloko munhu a dyohela warikwavo, kutani va n'wi hlambanyisa leswaku a ta hlambanya emahlweni ka alitari ya wena, endlwini leyi,

²³wena yingisa u ri ematilweni, u tirha, u avanyisa malandza ya wena; u kaneta la nga ni nandzu, u n'wi tlherisela enhlokweni ya yena hi mitirho ya yena, kambe u khanisa la lulameke, u n'wi tlherisela hi ku lulama ka yena!

²⁴“Kutakuloko tiko ra wena ra Israele ri hluriwa hi valala, hikuva ingi va ku dyohele; kungakuloko va tlhelela eka wena, va dzunisa vito ra wena, kutani va humesa mikhongelo ni ku kombela emahlweni ka wena endlwini leyi,

²⁵wena yingisa u ri ematilweni, u rivalela xidyoho xa tiko ra wena ra Israele u va tlherisa etikweni leri u ri nyikeke vona ni vatata wa vona!

²⁶“Kutakuloko tilo ri pfariwa, ku nga ni mpfula hikuva a va ku dyohele, loko va khongela endhawini leyi, va dzunisa vito ra wena ni ku tshika swidyoho swa vona, hikuva ingi u va tsongahatile:

²⁷wena, yingisa u ri etilweni, u rivalela malandza va wena ni tiko ra wena ra Israele swidyoho swa vona, hikuva u va dyondzisile ndlela leyinene leyi va faneleke ku famba ha yona, kutani u rhuma mpfula etikweni leri u ri nyikeke tiko ra wena ku va ndzhaka ya rona!

²⁸“Kutakuloko ndlala yi va kona etikweni, ni ntungu, ni mumu, ni ku bola ka mavele, ni tinjiya ta tinxakaxaka; kutakuloko valala va hlasela tiko ra wena emitini ya vona, ni loko makhombo ni vuvabyi bya tinxakaxaka byi va kona;

²⁹kungakuloko munhu, hambi a ri mani na mani kumbe tiko hinkwaro ra wena ra Israele ri khongela, ri endla xikhongelo xihi ni xihi, kutani un'wana ni un'wana a tivula mbanga ya yena ni ku vaviseka ka yena, va ri karhi va tlakusa mavoko ya vona tlhelo ra yindlu leyi:

³⁰wena, yingisa u ri ematilweni, laha u akeke kona, u rivalela; u nyika un'wana ni un'wana hi tindlela hinkwato ta yena, wena la tivaka mbilu ya munhu un'wana ni un'wana (hikuva wena ntsena u tiva timbilu ta vana va vanhu),

³¹va ta ku chava, va ta famba etindleleni ta wena hi masiku hinkwawo lawa va nga ta hanya etikweni leri u ri nyikeke vatata wa hina!

³²“Hambi a ri muluveri la nga riki wa tiko ra wena ra Israele, kambe a ta a sukile etikweni leri nga ekule hikwalaho ka vito ra wena lerikulu ni hikwalaho ka xandla xa wena xa matimba, ni voko ra wena leri tlakukeke, kungakuloko a khongela a ri karhi a languta tlhelo ra yindlu leyi:

³³wena yingisa u ri ematilweni, laha u akeke kona, u tirha, u nyika muluveri loyi, hinkwaswo leswi a swi kombeleke eka wena, leswaku matiko hinkwawo ya misava ma tiva vito ra wena, ma ku chava kukotisa tiko ra wena ra Israele, ma ta tiva leswaku vito ra wena ri khongeriwa endlwini leyi ndzi yi akeke!

³⁴“Kutakuloko tiko ra wena ri huma nyimpi ku ya lwa ni valala va rona ri famba hi ndlela leyi u nga ta ri kombisa, kutani va ku khongela, va languta tlhelo ra muti lowu u wu hlawuleke, ni tlhelo ra yindlu leyi ndzi yi akeleke vito ra wena:

³⁵yingisa u ri ematilweni, ku khongela ni ku kombela ka vona, u lulamisa timhaka ta vona!

³⁶“Kutakuloko va ku dyohele (hikuva a ku na munhu la nga dyohiki), kutani u va karihele, u va nyiketile valala, ni loko vahluri va vona va va yisile evukhumbini, va ri vakhomiwa etikweni leri nga ekule, hambi ekusuhi;

³⁷loko va ku yingisa etikweni ra vukhumbi bya vona, loko va tlhelela eka wena va ku khongela etikweni ra vukhumbi bya vona, va ku: ‘Hi dyohile, hi endlile leswo biha, hi onhile’;

³⁸kungakuloko va tlhelela eka wena hi timbilu hinkwato ta vona, ni mimoya hinkwayo ya vona, etikweni ra vukhumbi bya vona, laha va yisiweke kona; loko va ku khongela, va languta tlhelo ra tiko leri u ri nyikeke vatata wa vona, ni tlhelo ra muti lowu u wu hlawuleke, ni tlhelo ra yindlu leyi ndzi yi akeleke vito ra wena,

³⁹yingisa u ri ematilweni, laha u akeke kona, mikhongelo ni ku kombela ka vona u lulamisa timhaka ta vona, u rivalela tiko ra wena leri ku dyoheleke.

⁴⁰“Oho, Xikwembu xanga! Sweswi mahlo ya wena a ma hanyanye, u yingisa hi tindleve ta wena xikhongelo lexi humesiweke endhawini leyi!

⁴¹Sweswi, Yehovha Xikwembu, pfuka u ta endhawini ya ku wisa ka wena, wena ni areka ya matimba ya wena! Yehovha Xikwembu, vaprista va wena a va funengetiwe hi ku hlayiseka, ni lava ku rhandzaka a va titsakele eku tsakeni ka vona.

⁴²Oho! Yehovha Xikwembu, u nga cukumeti muhlawuriwa wa wena, anakanya tintswalo leti u ti endleleke Davhida, nandza wa wena!”