Read Xitsonga Ezra 3 Bible Online

Ezra 3 - Xitsonga bible

Ezra 3

¹Siku ku tshamaka n'hweti ya ntlhanu na timbirhi, vana va Israele a va ri emitini ya vona; kutani tiko ri hlengeletana eYerusalema, kukotisa loku a ri munhu un'we.

²Yexuwa, n'wana Yosadaka, ni vamakwavo va nga vaprista, na Zerubabele, n'wana Salatiele, ni vamakwavo, va yima va aka alitari ya Xikwembu xa Israele, ku ta tlhavela eka yona magandzelo lama hisiwaka, hi ku landza leswi tsariweke emilawini ya Muxe, munhu wa Xikwembu.

³Va pfuxa alitari exiteni xa yona, hambi va ri ni ku chava hikwalaho ka matiko ya matlhelo kutani va tlhavela Yehovha magandzelo ya ku hisa, ma nga lawa va ma hisaka nimixo ni madyambu.

⁴Va endla ni nkhuvo wa mitsonga hi ku landza leswi tsariweke ni ku humesa holokosta ya siku rin'wana ni rin'wana hi maendlelo ya kona, ni ku lerisa ka kona hi mfanelo ya siku rin'wana ni rin'wana.

⁵Kambe ku humesiwa holokosta ya masiku, ni ya n'weti loko yi tshama, ni ya tinhlengeletano hinkwato leto kwetsima ta Yehovha ni ya munhu un'wana ni un'wana la swi rhandzaka ku tlhavela Yehovha mhamba.

⁶Siku ro rhanga ra n'hweti ya ntlhanu na timbirhi, va sungula ku tlhavela Yehovha magandzelo lama hisiwaka; kambe tempele ya Yehovha yi nga si sunguriwa;

⁷va humesela swivatli swa maribye ni swa timhandze mali; va nyika Vasidoni ni Vatiri swakudya ni swakunwa, ni mafurha, leswaku va tisa eYopa, hi le lwandle, mirhi ya kedari ya Lebanoni, hilaha va pfumeleriweke hakona hi Korexe, hosi ya Peresi.

⁸Hi lembe ra vumbirhi ra ku fika ka vona endlwini ya Yehovha eYerusalema, hi n'hweti ya vumbirhi, Zerubabele n'wana Salatiele, na Yexuwa, n'wana Yosadaka ni vamakwavo lava nga vaprista, ni Valevhi, ni hinkwavo lava nga tlhelela eYerusalema, va huma eku bohiweni, va sungula ku tirha, kutani ku vekiwa Valevhi lava nga ni malembe ya makume mambirhi, ni lava nga emahlweni, leswaku va fambisa mitirho ya yindlu ya Yehovha.

⁹Kutani Yexuwa ni vana va yena, ni vamakwavo, na Kadimiele, ni vana va yena va nga vana va Yuda, va yima kukotisa loko ingi a ri munhu un'we, leswaku va fambisa mitirho ya yindlu ya Xikwembu, va ri ni vana va Henadada, ni vana va vona, ni vamakwavo Valevhi.

¹⁰Kakuloko vaaki va sungula masungulo ya tempele vaprista va yima kona, va ambele swa vona, va tamele tinanga, va ri ni Valevhi, ni vana va Asafa, va tamele swiphambati, va dzunisa Yehovha, va ya hi ku lerisa ka Davhida, hosi ya Israele.

¹¹Kutani va pfumelelana, va dzunisa, va vonga Yehovha, va ku: “Kunene u ni vunene, hikuva nsovo wa yena eka Israele hi lowu nga heriki.” Kutani tiko hinkwaro ri endla huwa leyikulu ku dzunisa Yehovha, hikuva ku sunguriwa masungulo ya yindlu ya Yehovha.

¹²Kutani vaprista lavo tala ni Valevhi, ni vakulukumba va vatatana, swi nga swikoxa, lava nga vona yindlu ya khale yi ri emasungulweni ya yona, va rila, va kolola loko va vona yindlu yoleyo; kambe van'wana lavo tala, va huwelela hi ku tsaka;

¹³kutani exikarhi ka tiko a ku nga ri na munhu la tivaka ku hlawula mpfumawulo wa ku huwelela ka ku tsaka eka mpfumawulo wa lava rilaka va tiko; hikuva tiko a ri endla pongo lerikulu, leri mpfumawulo wa rona wu nga twala ekule.