Read Xitsonga Ezra 7 Bible Online

Ezra 7 - Xitsonga bible

Ezra 7

¹Endzhaku ka sweswo, enkarhini lowu ku fumaka Ataserkisi, hosi ya Peresi, Ezra, n'wana Seraya, n'wana Azariya n'wana Hilkiya,

²n'wana Xalumi, n'wana Sadoki, n'wana Ahituba,

³n'wana Amariya, n'wana Azariya, n'wana Merayoto,

⁴n'wana Zerahiya, n'wana Uzi, n'wana Buki,

⁵n'wana Abixuwa, n'wana Finiyasi, n'wana Eliyazara, n'wana Aroni, muprista lonkulu,

⁶Ezra yeloyi, a suka eBabilona. A a ri mutsari wa ku tlhariha emilawini ya Muxe, leyi nyikiweke hi Yehovha, Xikwembu xa Israele. Hosi yi n'wi nyika hinkwaswo leswi a swi kombelaka hikuva voko ra Yehovha, Xikwembu xa yena, a ri ri na yena.

⁷Kutani van'wana va vana va Israele, vaprista, ni Valevhi, ni vayimbeleri, ni valanguteri va tinyangwa, ni malandza, va tlhandlukela eYerusalema na yena, hi lembe ra ntlhanu na mambirhi ra ku fuma ka Ataserkisi.

⁸A fika eYerusalema hi n'hweti ya vuntlhanu; a ri ri lembe ra ntlhanu na mambirhi ra hosi.

⁹A suka eBabilona hi siku ro rhanga ra n'hweti yo sungula, kutani a fika eYerusalema, hi siku ro rhanga ra n'hweti ya vuntlhanu, hilaha voko ra tintswalo ra Xikwembu ingi ri ri na yena.

¹⁰Hikuva Ezra a a vekile mbilu ya yena ku lava milawu ya Yehovha, ni ku tirha ha yona, ni ku dyondzisa Vaisraele milawu, ni ku lerisa.

¹¹Hi wona marito ya papila leri hosi Ataserkisi a ri nyikeke Ezra muprista ni mutsari, a nga mutsari wa ku lerisa ka Yehovha, ni milawu ya yena leyi byeriweke va Israele:

¹²“Ataserkisi, hosi ya tihosi, eka Ezra, muprista ni mutsari la hetisekeke wa nawu wa Xikwembu xa le henhla ...

¹³“Ndzi lerisa leswaku hinkwavo va ku fuma ka mina lava nga va tiko ra Israele, ni vaprista va vona, ni Valevhi, lava rhandzaka ku tlhelela eYerusalema, na wena, hi ku rhandza ka vona, va nga famba;

¹⁴hikuva u rhumiwa hi hosi ni tindhuna ta yena ta ntlhanu na timbirhi ta huvo, ku ya kambela Yudiya ni le Yerusalema, hilaha ku vuriweke hakona emilawini ya Xikwembu xa wena leyi u yi tamelaka emavokweni ya wena;

¹⁵u ya ni silivhere, ni nsuku, leswi hosi ni tindhuna ta yona ta huvo va swi humeseleke Xikwembu xa Israele hi ku swi rhandza, leswi vutshamo bya xona byi nga eYerusalema,

¹⁶ni silivhere hinkwayo, ni nsuku leswi u nga swi kumaka etikweni hinkwaro ra Babilona, swin'we ni mihlengo leyi nga ta humeseriwa yindlu ya Xikwembu xa vona eYerusalema hi tiko, ni vaprista, hi ku tirhandzela ka vona.

¹⁷Hikwalaho, hatlisa u xava hi mali yoleyo tinkunzi, ni tinyimpfu, ni swinyimpfana, ni tinyiko ta swona, ni swakunwa leswi cheriwaka ehenhla ka swona, u swi humesa ealitarini ya yindlu ya Xikwembu xa n'wina eYerusalema.

¹⁸Loko yi ri silivhere ni nsuku, leswi nga ta salela wena ni vamakwenu, mi ta tirha ha swona, hi ku rhandza ka Xikwembu xa n'wina, hilaha mi vonaka hakona.

¹⁹Loko swi ri swibya leswi u swi nyikiweke swa ntirho wa yindlu ya Xikwembu xa wena, u ta swi veka emahlweni ka Xikwembu xa Yerusalema.

²⁰Swin'wana leswi nga laveriwaka yindlu ya Xikwembu xa wena, leswi u fanekelaka ku swi humesa, u ta swi teka evuhlayiselweni bya hosi.

²¹Kutani mina, ndzi nga hosi Ataserkisi, ndzi byela n'wina hinkwenu va hase ka nambu lava hlayisaka xuma xa mina, leswaku mi hatlisa mi endla hinkwaswo hilaha Ezra, muprista ni mutsari wa milawu ya Xikwembu xa le matilweni, a nga ta kombela hakona,

²²ku fika ka titalenta ta dzana ta silivhere, ni tikore ta dzana ta koro, ni vhinyo ya dzana ra tibati, ni tibati ta dzana ta mafurha, ni munyu lowu va ringanaka.

²³Hinkwaswo leswi lerisiweke hi Xikwembu xa le matilweni a swi endliwe hi mukhuva lowu hetisekeke, leswaku ku kwetsima ka xona ku nga tshuki ku va ni ku holova ehenhla ka ku fuma ka hosi ni ka vana va yona.

²⁴Kambe ha mi tivisa leswaku loko va ri vaprista hinkwavo, ni Valevhi, ni vayimbeleri ni valanguteri va tinyangwa, ni Vanetinimi, ni malandza ya yindlu ya Xikwembu, va nga humesi ndzuvo, hambi yi ri kungiso, kumbe muthelo.

²⁵“Loko u ri wena, Ezra hi vutlhari bya Xikwembu xa wena lebyi u nga na byona, wanga veka vaavanyisi, ni vakamberi va ku avanyisa tiko hinkwaro ra hase ka nambu, va ri hinkwavo lava tivaka milawu ya Xikwembu xa wena; loko a ri un'wana ni un'wana la nga yi tiviki, mi n'wi dyondzisa yona.

²⁶Mani na mani la nga endliki hi milawu ya Xikwembu xa wena, ni milawu ya tihosi, a a avanyisiwe, kumbe hi ku dlawa, kumbe a hlongoriwa, kumbe ku dyiwa swilo swa yena kumbe a nghenisiwa ekhotsweni.”

²⁷A ku vongiwe Yehovha, Xikwembu xa vatata wa hina, lexi vekeke timhaka letonghasi embilwini ya hosi, ta ku dzunisa yindlu ya Yehovha eYerusalema, ni la ndzi kumiseke tintswalo eka hosi, ni ka tindhuna ta yena ta huvo, ni ka tihosana hinkwato ta matimba ta hosi!

²⁸Loko ndzi ri mina, ndzi tiya mbilu hilaha voko ra Yehovha Xikwembu xa mina, ingi ri ri ehenhla ka mina hakona, ndzi hlengeleta vakulukumba va Israele leswaku va tlhandluka na mina.