Read Xitsonga Esther 8 Bible Online

Esther 8 - Xitsonga bible

Esther 8

¹Hi siku rolero, hosi Ahasuwerusi a nyika nkosikazi Estere yindlu ya Hamani, muxanisi wa Vayuda; Mordekayi yena, a ta emahlweni ka hosi, hikuva Estere a a n'wi byerile lexi a nga xona eka yena.

²Hosi yi humesa xingwavila xa yena lexi ingi a xi tekerile Hamani, a xi nyika Mordekayi; kutani Estere a veka Mordekayi n'wini wa yindlu ya Hamani.

³Estere a engeta a vulavula emahlweni ka hosi, a tiwisela emahlweni ka milenge ya yena, a rila, a n'wi khongela leswaku a herisa ku biha ka Hamani, Muagaga, ni vutlhari bya yena lebyi ingi a hehleke Vayuda ha byona.

⁴Hosi yi yimisela Estere nhonga ya nsuku, kutani Estere a suka, a yima emahlweni, ka hosi;

⁵a ku: “Loko hosi yi pfumela, ni loko ndzi kume tintswalo emahlweni ka yona, loko mhaka ya mina yi lulamile emahlweni ka hosi, kambe loko ndzi ri la tsakisaka emahlweni ka yona, a ku tsariwe leswaku ku hundzuluxiwa mapapila lawa ma tsariweke hi vutlhari bya Hamani, n'wana Hamedata, Muagaga, lawa ma tsariweke hi yena ku dlaya Vayuda va matiko hinkwawo ya hosi.

⁶Hikuva ndzi nga tiyisa ku yini matimba ku vona ku biha loku nga ta wela ehenhla ka vanhu va rikwerhu xana? Kumbe ndzi nga tiyisa ku yini matimba ku languta ku dlayiwa ka varikwerhu xana?”

⁷Hosi Ahasuwerusi a ku eka nkosikazi Estere ni ka Muyuda Mordekayi: “Vonani, ndzi nyike Estere yindlu ya Hamani, kutani yena a hayekiwile emhandzeni, hikuva a yise voko eka Vayuda.

⁸Loko swi ri tano, tsalani n'wina hi vito ra hosi ematshan'weni ya Vayuda hilaha mi swi rhandzaka, kutani mi tiyisa hi xingwavila xa hosi; hikuva papila leri tsariweke hi vito ra hosi, ri tiyisiweke hi xingwavila xa hosi, a ri na ku hundzukeriwa.”

⁹Kwalaho vatsari va hosi va vitaniwa hi nkarhi wolowo, ri nga siku ra makume mambirhi na manharhu ra n'hweti ya vunharhu, yi nga n'hweti ya Sivani; ku tsariwa hinkwako hilaha Mordekayi a lerisaka hakona; ku tsaleriwa Vayuda ni tindhuna ta tihosi, ni vafumi, ni tihosana ta matiko, ku suka eIndiya ku fika eEtiyopiya, ma nga matiko ya 127, ku tsaleriwa tiko rin'wana ni rin'wana hi matsalele ya rona, ni vanhu van'wana ni van'wana hi ku vulavula ka vona, ni Vayuda hi matsalele ni ku vulavula ka vona.

¹⁰Mordekayi a tsala hi vito ra hosi Ahasuwerusi, kutani a tiyisa hi xingwavila xa hosi, a rhumela mapapila hi vatsutsumi lava khandziyeke tihanci ni vakhandziyi va tikamela, ni timula leti tswalaka hi tihanci leta matswele.

¹¹Mapapila lawa, hosi a ma rhumela Vayuda, emutini wun'wana ni wun'wana, leswaku va pfumeleriwa ku hlengeletana endhawini yin'we, ni ku yimela ku hanya ka vona, ku dlaya, ni ku lovisa hinkwavo vanhu ni tiko leri va pfukelaka, kun'we ni vana va vona ni vasati va vona, ni ku phanga swilo swa vona.

¹²Va ku va endla sweswo hi siku rin'we ematikweni hinkwawo ya hosi Ahasuwerusi, ri nga siku ra khume na manharhu ra n'hweti ya khume na timbirhi, yi nga n'hweti ya Adara.

¹³Kopi ya papila lero yi endliwa leswaku ku va ku lerisa etikweni rin'wana ni rin'wana, kutani yi khensiwa evanhwini hinkwavo, leswaku Vayuda va ta va va tilunghisile hi siku rolero, leswaku va ta tirihisela eka valala va vona.

¹⁴Vatsutsumi lava khandziyeke tihanci ni timula, va hatlisa va huma, va hatlisisiwa hi ku lerisa ka hosi. Ni le Xuxani, ntsindza, ku lerisa koloko ku lerisiwa.

¹⁵Mordekayi a suka emahlweni ka hosi a funengele xifunengelo xa vuhosi xa rihlaza ni xa ntsembyana lowo basa, a vehele harhi leyikulu ya nsuku, a ri ni nguvu ya ntsembyana leya ribungu. Kutani muti wa Xuxani wu ba huwa, wu tsakile ngopfu.

¹⁶Vayuda va tshama eku vonakaleni ni le ku tsakeni eku tsakisiseni ni le xichabyeni.

¹⁷Etikweni rin'wana ni rin'wana, ni le mutini wun'wana ni wun'wana, eswivandleni hinkwaswo leswi rito ra hosi ni ku lerisa ka yona swi fikeke eka swona, Vayuda va tshamisa eku tsakeni ni le ku tsakisiseni va endla nkhuvo hi siku lerinene; ku tsandza ni lavanyingi exikarhi ka vanhu va matiko va tiendla Vayuda, hikuva ku chava ka Vayuda a ku va wele ehenhla.