Read Xitsonga Esther 9 Bible Online

Esther 9 - Xitsonga bible

Esther 9

¹En'hwetini ya khume na timbirhi, yi nga n'hweti ya Adara, hi siku ra khume na manharhu ra n'hweti, leri rito ni ku lerisa ka hosi ingi swi fanele ku hetiseka ha rona, ri nga siku leri valala va Vayuda ingi va tshembile leswaku va ta va pfukela matimba ha rona, timhaka ti hundzuka, kutani Vayuda va va vona lava pfukelaka lava ngi va va venga hi matimba.

²Vayuda va hlengeletana emitini ya vona, ematikweni hinkwawo ya hosi Ahasuwerusi, leswaku va yisa voko eka hinkwavo lava rhandzeke ku va humesela khombo; a ku vanga na un'we la nga tiva ku yima emahlweni ka vona, hikuva nchavo wa vona a wu wele vanhu hinkwavo.

³Tihosana hinkwato ta matiko, ni tindhuna, ni vafumi, ni hinkwavo lava khomeke timhaka ta hosi, va yimela Vayuda hikuva nchavo wa Mordekayi a wu va wele ehenhla.

⁴Hikuva Mordekayi a a ri nkulu endlwini ya hosi, kutani ku twala ka yena a ku yile ematikweni hinkwawo; hikuva wanuna yeloyi, Mordekayi, a a ri karhi a kula.

⁵Vayuda va dlaya valala va vona hinkwavo hi fumu, ku va ku dlawa ni ku lovisa lokukulu, kutani va endla lava va va vengeke hi ku rhandza ka vona.

⁶Ni le Xuxani, ntsindza, Vayuda va dlaya vanhu va ntlhanu wa madzana;

⁷va dlaya na Parixani-Data, Dalafoni, Asipata,

⁸Porata, Adaliya, Aridata,

⁹Parimaxata, Arisayi, Aridayi, na Vhayezata,

¹⁰va nga vana va khume va Hamani, n'wana Hamedata, muxanisi wa Vayuda, kambe a va byisanga nchumu.

¹¹Esikwini rolero, nhlayo ya lava dlayiweke eXuxani, ntsindza, yi vikeriwa emahlweni ka hosi.

¹²Kutani hosi yi ku eka nkosikazi Estere: “EXuxani, ntsindza, Vayuda va dlayile vanhu va ntlhanu wa madzana ni vana va Hamani va khume. Loko swi ri tano va endlise ku yini eka matiko man'wana ya hosi xana? Ni sweswi, u kombela yini? U ta xi nyikiwa. Wa ha kombela yini? Ku ta endliwa sweswo.”

¹³Estere a ku: “Loko hosi yi pfumela, Vayuda va le Xuxani va tlhela va pfumeleriwa ni mundzuku ku endla hi ku lerisa ka sweswi, kambe ku hayekiwa etimhandzeni vana va Hamani va khume.

¹⁴Hosi yi lerisa leswaku ku endlisiwa sweswo, ni leswaku ku vuriwa ku lerisa eXuxani; kutani vana va Hamani va khume va hayekiwa etimhandzeni.”

¹⁵Loko swi ri tano, Vayuda va le Xuxani va tlhela va hlengeletana hi siku ra khume na mune ra n'hweti ya Adara, kutani va dlaya vanhu va madzana manharhu eXuxani, kambe a va phanganga nchumu.

¹⁶Vayuda van'wana, lava nga ematikweni ya hosi, va hlengeletana na vona, va yimela ku hanya ka vona; va vona ku wisa eka valala va vona, kutani va dlaya vanhu va 75 000 exikarhi ka lava va va vengeke, kambe a va phanganga nchumu.

¹⁷Leswo va swi endla hi siku ra khume na manharhu ra n'hweti ya Adara, kutani va wisa hi ra vukhume na mune va ri endla siku ra nkhuvo ni ra ku tsaka.

¹⁸Kambe Vayuda va le Xuxani va hlengeletana hi ra vukhume na manharhu ni ra vukhume na mune ra n'hweti yoleyo, kutani va wisa hi ra vukhume na ntlhanu, va ri endla siku ra nkhuvo ni ro tsaka.

¹⁹Hikwalaho Vayuda va le tikweni, lava akeke emitini leyi nga riki na marhangu, va endla siku ra vukhume na mune ra n'hweti ya Adara siku ro tsaka ni ro dya, ni siku ra nkhuvo, leri ku rhumelaniwaka tinyiko ha rona.

²⁰Mordekayi a tsala timhaka toleto kutani a rhumela mapapila eka Vayuda hinkwavo va le matikweni hinkwawo ya hosi Ahasuwerusi, eka lava nga ekusuhi ni ka lava nga ekule,

²¹leswaku ku tiyisiwa exikarhi ka vona leswaku hi lembe rin'wana ni rin'wana, va hlawula siku ra khume na mune ra n'hweti ya Adara ni siku ra khume na ntlhanu,

²²hileswaku hi masiku lawa Vayuda va voneke ku wisa eka valala va vona, kambe en'hwetini leyi tingana ta vona ti hundzukeke ku tsaka, ni ku rila ka vona ku hundzukeke nkhuvo; va ku va ma endla masiku ya nkhuvo ni ya ku tsaka lawa ku rhumelaniwaka tinyiko, lawa kambe ku hiwaka swisiwana ha wona.

²³Vayuda va pfumela ku endla leswi ingi va sungurile ku swi endla, swi nga leswi Mordekayi a va tsaleleke swona.

²⁴Hikuva Hamani, n'wana Hamedata, Muagaga, muxanisi wa Vayuda hinkwavo, a kanerile makungu yo dlaya Vayuda kutani a hlahluve Puru, byi nga vuhlolotwana, leswaku a va heta, a va dlaya.

²⁵Kambe loko Estere a ta emahlweni ka hosi, a lerisa hi mapapila leswaku makungu layo biha lawa ma kaneriweke hi Hamani ya ku hehla Vayuda, ma tlheriseriwa enhlokweni ya yena, kutani a hayekiwa emhandzeni, yena ni vana va yena.

²⁶Hilaha va thyeke masiku walawo Purimi, hi vito ra Puru. Hikwalaho, kuteloko va hlaye timhaka hinkwato ta papila lero ni ku vona leswi va swi voneke, ni leswi swi va humeleleke,

²⁷Vayuda va kanela, kutani va tihlawulela, va hlawulela ni vatukulu va vona ni hinkwavo lava nga va namarhelaka, leswaku va nga ka va nga tshiki ku hlawula masiku walawo mambirhi, elembeni rin'wana ni rin'wana, hi nawu wa kona lowu tsariweke, ni nkarhi lowu vekiweke;

²⁸va kanela leswaku masiku walawo ma ta tsundzukiwa ni ku hlawuriwa emikarhini hinkwayo, endlwini yin'wana ni yin'wana, ni le tikweni rin'wana ni rin'wana, ni le mutini wun'wana ni wun'wana, ni leswaku masiku walawo ya Purimi ma nga ka ma nga pfumaleki exikarhi ka Vayuda, ni loko ku ri ku tsundzuka ka kona ku nga heli eka vatukulu va vona.

²⁹Nkosikazi Estere, n'wana wa Abihayili, ni Muyuda Mordekayi, va tsala va nyikiwile matimba hinkwawo, va tiyisa papila rolero ra vumbirhi ehenhla ka Purimi.

³⁰Vayuda hinkwavo, lava nga ematikweni ya 127 ya ku fuma ka Ahasuwerusi, va rhumeriwa mapapila ya timhaka ta ku rhula ni ta vunene,

³¹ya ku veka masiku walawo ya Purimi enkarhini wa kona lowu vekiweke, hilaha Muyuda Mordekayi ni nkosikazi Estere va va vekeleke wona, ni laha va tivekeleke wona ni vatukulu va vona enkarhini wa timhaka ta ku titsona swakudya, ni ta ku huwelela ka vona.

³²Ku lerisa ka Estere ku tiyisa timhaka toleto ta Purimi, kutani ti tsarisiwa sweswo epapilweni.