Read Xitsonga Exodus 1 Bible Online

Exodus 1 - Xitsonga bible

Exodus 1

¹Hi wona mavito ya vana va Israele lava yeke Egipta na Yakobo va ya un'wana ni un'wana ni va yindlu ya yena:

²Rhuveni, na Simiyoni, na Levhi, na Yuda,

³na Isakara, na Zebuloni, na Benjamini,

⁴na Dani, na Neftali, na Gadi, na Asere.

⁵Vanhu hinkwavo va yindlu ya Yakobo a va ri 70. Yosefa a a tshamile Egipta.

⁶Kutani Yosefa a fa ni vamakwavo hinkwavo, ni ntangha yoleyo hinkwayo.

⁷Kutani vana va Israele va engeteleka, va andza, va tala ngopfu, va kuma matimba, va tata tiko ra Egipta.

⁸Kambe ku humelela eEgipta hosi leyintshwa, leyi nga tivangiki Yosefa.

⁹Yi ku eka tiko ra yona: “Langutani rixaka ra vana va Israele, ri hi tlula hi ku tala ni matimba.

¹⁰A hi va endleni hi mano, leswaku va nga andzi ngopfu; va nga tshuki, loko ku humelela muvango, va hlangana ni valala va hina, va lwa na hina, kutani va suka etikweni leri.”

¹¹Kutani ku vekiwa valanguteri ehenhla ka vona va ta va karhata hi mitirho yo vavisa. Hi mukhuva wolowo va akela Faro miti ya switlati ya Pitomu na Ramsese.

¹²Kambe, loko va xanisiwa sweswo, hi loko va andza ngopfu, va tala. Kutani vana va Israele va vengiwa hakona.

¹³Kutani Vaegipta va tirhisa vana va Israele hi vukhumbi;

¹⁴va vavisa ku hanya ka vona hi mitirho leyo tika ya switina, ni mitirho hinkwayo ya masimu; ntirho hinkwawo lowu, va va tirhisa hi ku va xanisa.

¹⁵Kutani hosi ya Egipta yi byela masungakati ya Vaheveru (vito ra un'wana a a ri Xifira, ni ra un'wana, Puwa), yi ku:

¹⁶“Loko mi tshamela vasati va Vaheveru, loko mi va vona va veleka, loko n'wana a ri wa wanuna, mi n'wi dlaya; kambe loko a ri wanhwanyana, n'wi tshikeni a hanya.”

¹⁷Kambe masungakati ma chava Xikwembu; a ma endlanga hilaha hosi ya Egipta yi ma byeleke hakona; kambe ma ponisa vandzisanyana.

¹⁸Kambe hosi ya Egipta yi vitana masungakati, yi ku eka wona: “Mi endlele yini sweswo mi ponisa vandzisanyana?”

¹⁹Masungakati ma ku eka Faro: “Hi leswi vasati va Vaheveru va nga faniki na Vaegipta; va ni matimba, kutani loko sungakati ri fika eka vona, ri va kuma va velekile.”

²⁰Kutani Xikwembu xi katekisa masungakati; tiko ri andza ri tala ngopfu.

²¹Kambe, hikuva masungakati ma chavile Xikwembu, Xikwembu xi katekisa tindlu ta vona.

²²Kutani Faro a lerisa tiko ra yena hinkwaro, a ku: “Vandzisanyana hinkwavo lava nga ta velekiwa, va cukumeteni enambyeni; kambe vanhwanyana hinkwavo, mi va tshika va hanya.”