Read Xitsonga Exodus 10 Bible Online

Exodus 10 - Xitsonga bible

Exodus 10

¹Yehovha a ku eka Muxe: “Yana eka Faro, hikuva ndzi nonon'hwisile mbilu ya yena ni timbilu ta malandza ya yena, ndzi ta endla exikarhi ka vona swikombiso leswi u nga ta swi vona;

²kutani u ta byela vana va wena, ni vatukulu va wena, timhaka leti ndzi ti endleke eka Vaegipta, ni masingita ya mina lawa ndzi ma endleke exikarhi ka vona, mi ta ndzi tiva leswaku hi mina Yehovha.”

³Kutani Muxe na Aroni va ya eka Faro, va ku eka yena: “Yehovha, Xikwembu xa Vaheveru, xi te: ‘U ta ala ku fika kwihi ku titsongahata emahlweni ka mina? Tshunxa tiko ra mina ri ya ndzi tirhela.

⁴Loko u arisa tiko ra mina ku ya ndzi tirhela, mundzuku ndzi ta humesa tinjiya etikweni ra wena hinkwaro,

⁵ti ta funengeta misava hinkwayo, vanhu va ta tsandzeka ku vona misava; ti ta dya leswi seleke eka leswi nga biwa hi xihangu; ti ta dya ni mirhi hinkwayo leyi milaka emasin'wini ya n'wina.

⁶Ti ta tata tindlu ta wena, ni tindlu ta malandza ya wena hinkwawo, ni tindlu ta Vaegipta hinkwavo; vatata wa wena ni vakokwa wa wena a va nga si ti vona leto tano ka ha ri mpfhuka va tswariwa ku fika sweswi.’ ” Kutani Muxe a hundzuluka, a huma emahlweni ka Faro.

⁷Kutani malandza ya Faro ma ku eka yena: “Wanuna loyi u ta va ntlhamu eka hina ku fika rini xana? Tshunxa vanhu lavo, va ya tirhela Yehovha, Xikwembu xa vona. A ku swi voni leswaku Egipta wa lova xana?”

⁸Kutani va vita Muxe na Aroni emahlweni ka Faro, yena a ku eka vona: “Fambani mi ya tirhela Yehovha, Xikwembu xa n'wina. Xana ku ta famba vamani-ke?”

⁹Muxe a ku: “Hi ta famba ni vana va hina, ni swikoxa swa hina, ni vafana va hina, ni vanhwanyana va hina, ni tinyimpfu ta hina, ni tihomu ta hina; hikuva hi ya enkhubyeni wa Yehovha.”

¹⁰Faro a ku eka vona: “Yehovha a a ve na n'wina tani hi leswi ndzi nga mi tshunxa leswaku mi famba ni vana va n'wina! Vonani! Mi ni miehleketo leyo biha!

¹¹E-e; fambani n'wina vavanuna, mi ya tirhela Yehovha, hikuva hi lexi mi xi kombelaka.” Kutani va va hlongola emahlweni ka Faro.

¹²Yehovha a ku eka Muxe: “Tlakusa voko ra wena ehenhla ka tiko ra Egipta, tinjiya ti ta ta etikweni ra Egipta, ti dya byanyi hinkwabyo bya misava, ni hinkwaswo leswi nga siyiwa hi xihangu.”

¹³Muxe a yimisa nhonga ya yena ehenhla ka tiko ra Egipta, kutani Yehovha a hungisa mheho ya vuxa etikweni siku rero hinkwaro, ni vusiku hinkwabyo. Kuteloko byi xile, emheho ya vuxa a yi fikisile tinjiya.

¹⁴Tinjiya ti huma, ti tata tiko ra Egipta hinkwaro, ti eneta misava hinkwayo ya Egipta hi ku tala ka tona. A ku nga si va na tinjiya leto tano emikarhini ya khale, na swona ku nga ka ku nga ha vi na leto tano.

¹⁵Ti funengeta misava hinkwayo, kutani tiko ri phumela; ti dya hinkwaswo leswi milaka etikweni, ni mihandzu hinkwayo ya mirhi leyi nga pona xihangu; a ku salanga tlhuka emirhini, ni le ka leswi milaka emasin'wini, etikweni hinkwaro ra Egipta.

¹⁶Kutani Faro a hatlisa a vitana Muxe na Aroni, a ku eka vona: “Ndzi dyohele Yehovha, Xikwembu xa n'wina, na n'wina.

¹⁷Kambe sweswi u ndzi rivalela ku dyoha ka mina hi siku leri ntsena, kutani mi khongela Yehovha, Xikwembu xa n'wina, leswaku a susa ntungu lowu eka mina.”

¹⁸Kavaloko Muxe a suka emahlweni ka Faro, a ya khongela Yehovha;

¹⁹kutani Yehovha a hungisa emheho leyikulu ya vupeladyambu, yi susa tinjiya, yi ti hoxa eLwandle-ro-Tshwuka. A ku salanga na njiya na yin'we etikweni hinkwaro ra Egipta.

²⁰Kambe Yehovha a nonon'hwisa mbilu ya Faro, kutani Faro a nga tshunxanga vana va Israele.

²¹Kutani Yehovha a ku eka Muxe: “Tlakusa voko ra wena ehenhla, munyama wu ta va kona etikweni hinkwaro ra Egipta; vanhu va ta ambamba emunyameni.”

²²Muxe a tlakusa voko ra yena ehenhla, kutani munyama lowa ntima wu va kona etikweni ra Egipta hi masiku manharhu.

²³Vanhu va tsandzeka ku vonana, kutani a ku vanga na munhu la sukaka evutshan'weni bya yena hi masiku manharhu. Kambe vana va Israele a va tshama eku vonakaleni emitini ya vona.

²⁴Kutani Faro a vitana Muxe, a ku: “Fambani mi tirhela Yehovha, Xikwembu xa n'wina; ntsena ku ta sala tinyimpfu ni tihomu ta n'wina; mi ta famba ni vana va n'wina.”

²⁵Muxe a ku: “U ta hi nyika u ri wena magandzelo ya hina lawa hi nga ta gandzela Yehovha, Xikwembu xa hina ha wona.

²⁶Mitlhambi ya hina, na yona, yi ta famba na hina, ku nga sali ni xinyondzwana. Hikuva hi ta teka eka yona ku tirhela Yehovha, Xikwembu xa hina, hikuva a hi tivi leswi hi nga ta tirhela Yehovha ha swona, hi kondza hi fika kona.”

²⁷Kambe Yehovha a nonon'hwisa mbilu ya Faro, a ala ku va tshunxa.

²⁸Kutani Faro a ku eka yena: “Suka eka mina, u chava ku vona mombo wa mina, hikuva siku leri hi vonanaka, u ta fa.”

²⁹Muxe a ku: “Wa vurisa, ndzi nga ka ndzi nga ha voni mombo wa wena.”