Read Xitsonga Exodus 18 Bible Online

Exodus 18 - Xitsonga bible

Exodus 18

¹Yetro, muprista wa Midiyani, mukon'wana wa Muxe a twa hinkwaswo leswi Xikwembu xi swi endleleke Muxe ni tiko ra yena ra Israele, ni leswaku Yehovha u humesile Israele Egipta.

²Kutani Yetro, mukon'wana wa Muxe, a teka Sipora nsati wa Muxe, loyi ngi a a n'wi tlherisele ekaya;

³a teka ni vana va yena lavambirhi vito ra un'wana a a ri Gerixomu hikuva Muxe a a ku: “A ndzi ri muluveri etikweni rin'wana,”

⁴vito ra un'wana a a ri Eliezere, hikuva a a ku: “Xikwembu xa tata wa mina xi ndzi pfunile, xi ndzi lamulele ematlharini ya Faro.”

⁵Yetro, mukon'wana wa Muxe, a ya ni vana va Muxe, ni nsati wa yena emananga, laha ingi a tidzimele kona nxaxa, entshaveni ya Xikwembu.

⁶Kutani a tivisa Muxe, a ku: “Mina Yetro, mukon'wana wa wena, ndzi tile eka wena ndzi ri ni nsati wa wena ni vana va wena lavambirhi.”

⁷Muxe a huma, a ya hlangana ni mukon'wana wa yena, a khinsama a n'wi ntswontswa; kutani va vutisana ku hanya ka vona; kavaloko va nghena entsongeni wa Muxe.

⁸Kutani Muxe a n'wi byela hinkwaswo leswi Yehovha a swi endleke eka Faro ni le ka Vaegipta hikwalaho ka Vaisraele, ni makhombo hinkwawo lama humeleleke endleleni, ni hilaha Yehovha a va humeseke hakona eka wona.

⁹Kutani Yetro a tsaka hikuva Yehovha u endlele Vaisraele hi tintswalo loko a va lamulela emavokweni ya Vaegipta.

¹⁰Kutani Yetro a ku: “A ku khensiwe Yehovha la mi lamuleleke emavokweni ya Vaegipta, ni le mavokweni ya Faro, la lamuleleke tiko emavokweni ya Vaegipta.

¹¹Sweswi, ndza tiva leswaku Yehovha i nkulu eka swikwembu hinkwaswo; hikuva u va hangalasile emhakeni leyi va tikuriseke ha yona.”

¹²Kutani Yetro, mukon'wana wa Muxe, a tisela Yehovha mhamba ni magandzelo Aroni ni vakulukumba hinkwavo va Israele va ta dya vuswa ni mukon'wana wa Muxe emahlweni ka Xikwembu.

¹³Siku leri tlhandlamaka, Muxe a tshama a avanyisela tiko, kutani tiko ri yima emahlweni ka Muxe ku sungula nimixo, ku fika madyambu.

¹⁴Kuteloko mukon'wana wa Muxe a vonile hinkwaswo leswi a swi endlelaka tiko, a ku: “Ntirho lowo u wu endlelaka tiko hi lowo yini? U avanyisela yini tiko u ri swaku, ni tiko hinkwaro ri yimele yini mpfhuka wa mpundzu ku ko ku fika madyambu?”

¹⁵Muxe a ku eka mukon'wana wa yena: “Hi leswi tiko ri taka ka mina ku vutisa Xikwembu.

¹⁶Siku va nga ni mhaka, va ta eka mina, ndzi avanyisela un'wana ni un'wana, ndzi va tivisisa ku lerisa ka Xikwembu ni milawu ya xona.”

¹⁷Mukon'wana wa Muxe a ku eka yena: “Leswi u swi endlaka, a hi swona.

¹⁸Kunene u ta karhala wena ni tiko leri nga na wena; hikuva ntirho lowu wu ta ku hlula, u ta tsandzeka ku wu heta u ri swaku.

¹⁹Sweswi, yingisa rito ra mina, ndzi ta ku letela; Xikwembu a xi ve na wena. U va wena la yimaka emahlweni ka Xikwembu ematshan'weni ya tiko, u byela Xikwembu timhaka.

²⁰U va dyondzisa ku lerisa ni milawu, u va tivisa ndlela leyi va faneleke ku famba ha yona, ni ntirho lowu va faneleke ku wu tirha.

²¹U hlawula exikarhi ka tiko hinkwaro vavanuna lavanene, lava chavaka Xikwembu, vavanuna lava lulameke, lava vengaka bindzu leri nga lulamangiki; u va veka tindhuna ta madzanadzana, ni ta madzana, ni ta ntlhanu na makume, ni ta makume;

²²kutani ti avanyisela tiko hi masiku; timhaka letikulu hinkwato ti ti tisa eka wena, letitsongo ti ti heta ti ri tona. Hunguta ndzhwalo wa wena va wu rhwala swin'we na wena.

²³Kutakuloko u endla mhaka leyi, Xikwembu na xona xi ku lerisa yona, u ta tiya, tiko leri hinkwaro ri ta fika hi ku tsaka ri yaka kona.”

²⁴Muxe a yingisa ku letela ka mukon'wana wa yena, kutani a endla hinkwaswo leswi a n'wi byeleke swona.

²⁵Kavaloko Muxe a hlawula exikarhi ka tiko ra Israele hinkwaro vavanuna lava lulameke, a va veka tindhuna ta tiko, ti ri tindhuna ta madzanadzana, ni ta madzana, ni ta ntlhanu wa makume, ni ta makume,

²⁶leti faneleke ku avanyisela tiko hi masiku; timhaka leto nonon'hwa, va ti tisa eka Muxe; letitsongo va ti avanyisa va ri vona.

²⁷Kutani Muxe a lelana ni mukon'wana wa yena; yena Yetro a tifambela eka varikwavo.