Read Xitsonga Exodus 23 Bible Online

Exodus 23 - Xitsonga bible

Exodus 23

¹“U nga tshuki u amba mhaka hi mavunwa; u nga tshuki u yima ni lowo biha leswaku u va mbhoni yo hemba.

²U nga tshuki u landzela lavo tala ku endla swo biha; u nga voyameli eka lavo tala ehubyeni loko va hombolokisa ku lulama.

³U nga tshuki u ya hi nghohe hambi ku ri eka xisiwana ehubyeni.

⁴“Loko u hlangana ni homu, kumbe mbhongolo leyi lahlekeke ya nala wa wena, u yi tlherisela eka yena.

⁵Loko u vona mbhongolo ya la ku vengaka yi tikeriwa hi ndzhwalo wa yona, u nga yi tshiketi, u fanele ku n'wi pfuna ku yi tshunxa.

⁶“U nga hombolokisi mhaka leyi lulameke ya xisiwana xa warikwenu ehubyeni.

⁷Chava ku hemba. U nga tshuki u dlaya la nga riki na nandzu ni la lulameke, hikuva ndzi nga ka ndzi nga yimeli lowo biha, ndzi n'wi vula la lulameke.

⁸U nga tshuki u amukela tinyiko, hikuva i xilo lexi pfalaka mahlo ya lava vonaka ni ku hombolokisa timhaka ta lava lulameke ehubyeni.

⁹“U nga tshuki u xanisa wamatiko; na n'wina ma yi tiva miehleketo ya wamatiko, hikuva a mi ri vamatiko eEgipta.

¹⁰“Hi malembe ya ntlhanu na rin'we u ta rima nsimu ya wena, u tshovela mihandzu ya yona;

¹¹kambe hi lembe ra vuntlhanu na mambirhi, u ta yi tshika yi etlela; kutani swisiwana swa tiko ra rikwenu swi ta dya mihandzu ya yona, kutani leswi salaka, swi ta dyiwa hi swiharhi. U ta endlisa sweswo hi vhinya ya wena ni mitlhwari ya wena.

¹²“U ta tirha ntirho wa wena hi masiku ya ntlhanu na rin'we, kambe u ta wisa hi siku ra vuntlhanu na mambirhi leswaku homu ya wena ni mbhongolo ya wena swi wisa na swona ni leswaku n'wana wa khumbi ra wena ni wamatiko va wisa na vona.

¹³Mi ta hlayisa hinkwaswo leswi ndzi mi leriseke swona. Mi nga tshuki mi vula mavito ya swikwembu swin'wana; ma nga humi emilon'wini ya n'wina.

¹⁴“U ta ndzi endlela nkhuvo kanharhu hi lembe.

¹⁵U ta hlayisa nkhuvo wa vuswa lebyo kala comela hi masiku ya ntlhanu na mambirhi hi n'hweti ya Abibi, u ta dya vuswa lebyo kala comela hilaha u lerisiweke hakona; hikuva hi yona n'hweti leyi u humeke eEgipta ha yona; kutani vanhu va nga tshuki va humelela ntsena emahlweni ka mina.

¹⁶U ta hlayisa nkhuvo wa ku tshovela, wu nga wa swirhangana swa ntirho wa wena, leswi u swi byaleke emasin'wini. Va ta hlayisa ni nkhuvo wa ku hlengeleta, eku heleni ka lembe, loko u hlengeletile mitirho ya masimu ya wena.

¹⁷Kanharhu hi lembe, vavanuna va ta humelela hinkwavo emahlweni ka Hosi Yehovha.

¹⁸“U nga tshuki u humesa ngati ya magandzelo ya mina swin'we ni vuswa lebyi nga ni comela, ni mafurha ya nkhuvo wa mina ma nga tshuki ma hlayiseriwa mundzuku.

¹⁹“U ta tisa endlwini ya Yehovha Xikwembu xa wena, swirhangana swa mihandzu leyo sungula ya tiko ra wena. U nga tshuki u sweka ximbutana hi ntswamba wa mana wa xona.

²⁰“Waswivo, ndzi rhuma ntsumi emahlweni ka wena, yi ta ku hlayisa endleleni yi ku nghenisa etikweni leri ndzi ri lunghiseke.

²¹Chava emahlweni ka yona, u yingisa rito ra yona, u nga tshuki u ri alela, hikuva yi nga ka yi nga mi khomeli ku biha ka n'wina, hikuva yi ni vito ra mina.

²²“Kambe loko u yingisa rito ra yona, u endla hinkwaswo leswi ndzi nga ta ku byela swona, ndzi ta va nala eka valala va wena, ndzi ku lwela eka lava ku pfukaka.

²³“Hikuva ntsumi ya mina yi ta ku rhangela emahlweni, yi ku nghenisa etikweni ra Vaamori, ni ra Vahiti, ni ra Vaperesi, ni ra Vakanana, ni ra Vahivhi, ni ra Vayebusi, kutani ndzi va heta.

²⁴U nga tshuki u khinsamela swikwembu swa vona, u nga tshuki u swi tirhela, u nga encisi mikhuva ya vona; kambe u ta va dlaya hinkwavo, u hlanhla swifaniso hinkwaswo swa vona.

²⁵Tirhelani Yehovha, Xikwembu xa n'wina, kutani xi ta katekisa vuswa bya n'wina ni mati ya n'wina, kambe ndzi ta susa vuvabyi exikarhi ka n'wina.

²⁶Ku nga ka ku nga vi na wansati la onhekeriwaka hi khwiri, kumbe nsati wa mhika etikweni ra wena. Ndzi ta hetisa nhlayo ya masiku ya wena.

²⁷“Ndzi ta rhuma nchavo wa mina emahlweni ka wena, ndzi hangalasa tiko rin'wana ni rin'wana leri u nga ta fika eka rona; ndzi hlongorisa valala hinkwavo va wena.

²⁸Ndzi ta rhuma mimpfi, yi mi rhangela emahlweni, yi hlongorisa Vahivhi, ni Vakanana, ni Vahiti emahlweni ka wena.

²⁹Ndzi nga ka ndzi nga va susi emahlweni ka wena hi lembe rin'we, leswaku tiko ri nga hundzuki mananga, kutani swivandzana swa nhova swi andza, swi mi dlaya.

³⁰Ndzi nga ka ndzi nga hatlisi ku va hlongola emahlweni ka wena; kambe ndzi ta ku nyika nkarhi wa ku andza ni wa ku aka tiko hinkwaro.

³¹Ndzi ta veka mindzilekana ya wena ku suka eLwandle-ro-Tshwuka, ku fika elwandle ra Vafilista, ni ku suka emananga ku fika enambyeni hikuva ndzi ta mi hlulela vaaki va tiko leri, mi ta va hlongorisa emahlweni ka n'wina.

³²U nga tshuki u endla xinakulobye na vona, kumbe ni swikwembu swa vona.

³³Va nga tshuki va aka etikweni ra wena, leswaku va nga tshuki va ku dyohisa emahlweni ka mina; hikuva loko swi ri tano, u ta tirhela swikwembu swa vona, kutani wu ta va ntlhamu eka wena.”