Read Xitsonga Exodus 25 Bible Online

Exodus 25 - Xitsonga bible

Exodus 25

¹Yehovha a vulavula na Muxe, a ku:

²“Byela vana va Israele va ndzi humesela nhlengo. Mi ta amukela nhlengo wa mina eka munhu un'wana ni un'wana la humesaka hi mbilu.

³Hi lowu nhlengo mi nga ta wu amukela eka vona: nsuku ni silivhere, ni koporo;

⁴ni malapi ya xivunguvungu, ni ya scarlet, ni ya crimson, ni ntsembyana lowo basa, ni voya bya mbuti;

⁵ni madzovo ya tinyimpfu lama totiweke leswo tshwuka, ni madzovo ya ntini, ni mirhi ya munga;

⁶ni mafurha ya rivoni, ni mirhi ya risuna ku hlanganisa ni mafurha yo tola, ni ya magandzelo ya risuna;

⁷ni maribye ya onikisi, ni maribye lama nga ta nghenisiwa engubyeni ya efodi ni ya nguvu ya xifuva.

⁸Va ta ndzi lunghisela xikwetsimiso, ndzi ta tshamisa exikarhi ka vona.

⁹Mi ta endla hinkwaswo leswi ndzi mi kombisaka swona hi xifaniso xa yindlu ni mpimo wa yona, ni mitirho ya yona hilaha ndzi ku kombaka hakona.”

¹⁰“Va ta endla areka hi murhi wa munga; ku leha ka yona swi ta va swisungunhu swimbirhi ni hafu; ku anama ka yona, xisungunhu xin'we ni hafu, ni ku yima ka yona, xisungunhu xin'we ni hafu.

¹¹U ta yi nameka hi nsuku lowo tenga; u yi nameka ehandle ni le ndzeni, kutani u yi endlela xirhendzevutana xa nsuku lexi yi rhendzelekelaka.

¹²U ta chulula mune wa swingwavila swa nsuku leswi u nga ta swi veka ematlhelweni ya yona ya mune; swingwavila swimbirhi hitlhelo rin'wana, ni swingwavila swimbirhi hitlhelo rin'wana.

¹³U ta yi endlela mimpingu ya murhi wa munga, a va u yi nameka hi nsuku;

¹⁴kutani u ta nghenisa mimpingu eswingwavileni, ematlhelweni ya areka ku yi byarha ha yona.

¹⁵Mimpingu yi ta tshama eswingwavileni swa areka, yi nga susiwi.

¹⁶U ta veka earekeni Vumbhoni lebyi ndzi nga ta ku nyika byona.

¹⁷“U ta endla vukhongelelo bya nsuku lowunene; ku leha ka byona swi ta va swisungunhu swimbirhi ni hafu, ku anama ka byona xisungunhu ni hafu.

¹⁸U ta endla ni tikerubu timbirhi ta nsuku, u ti endla hi nsuku lowu furiweke, emakun'wini mambirhi ya vukhongelelo.

¹⁹U ta endla kerubu yin'wana emakumu ya halenu, ni kerubu yin'wana emakumu ya hala; mi ta endla tikerubu ti huma emakun'wini mambirhi ya vukhongelelo.

²⁰Tikerubu ti ta tshambuluta timpapa ta tona ehenhla, ti funengeta vukhongelelo hi timpapa, ti ri karhi ti langutene; mimombo ya tikerubu yi languta vukhongelelo.

²¹U ta funengeta areka hi vukhongelelo, u ta veka earekeni Vumbhoni lebyi ndzi nga ta ku nyika byona.

²²Ndzi ta hlangana na wena kona kutani ndzi ta ku byela kona evukhongelelweni, xiharhi ha tikerubu leti nga ehenhla ka areka ya vumbhoni, hinkwaswo leswi u nga ta lerisa vana va Israele.”

²³“U ta endla tafula hi murhi wa munga. Ku leha ka rona swi ta va swisungunhu swimbirhi, ku anama ka rona swi va xisungunhu xi ri xin'we, ni ku yima ka rona xisungunhu xin'we ni hafu.

²⁴U ta ri nameka hi nsuku lowunene; u ri endlela xirhendzevutana lexi ri rhendzelekelaka.

²⁵U ta ri endlela xirhendzevutana xa mune wa tintiho, kutani u xi nameka hi nsuku hi matlhelo hinkwawo.

²⁶U ta ri endlela ni swingwavila swa mune swa nsuku, kutani u ta veka swingwavila ematlhelweni ya mune emilengeni ya mune ya tafula,

²⁷swingwavila swi va ekusuhi ni xirhendzevutana leswaku u nghenisa eka swona mimpingu yo pinga tafula.

²⁸U ta endla mimpingu ya murhi wa munga, u yi nameka hi nsuku; tafula ri ta pingiwa hi yona.

²⁹U ta endla mikambana ya rona ni swidzuvulo swa rona, ni magombe leswaku va hlamba ha swona; u swi endla hi nsuku lowunene.

³⁰U ta veka etafuleni vuswa bya xikombiso, byi va kona hi masiku hinkwawo.

³¹“U ta endla kandelari ya nsuku lowo saseka; kandelari yi ta endliwa hi nsuku lowu furiweke, ni nenge wa yona, ni nsinya wa yona; mikhava ni mabundzu swi ta endliwa eka yona hi vumba byin'we.

³²Marhavi ya ntlhanu na rin'we ma ta huma ematlhelweni ya yona; marhavi manharhu hitlhelo rin'wana ra kandelari, ni marhavi manharhu hitlhelo rin'wana ra kandelari.

³³Mikambana minharhu leyi fanaka ni xiluva xa alimondi, ni bundzu ni xiluva, swi ta va kona erhavini rin'wana; ni le rhavini rin'wana ku ta va mikambana minharhu leyi fanaka ni xiluva xa alimondi, ni bundzu ni xiluva; swi ta va tano eka marhavi ya ntlhanu na rin'we lama humaka ekandelarini.

³⁴Yona kandelari yi ta va ni mune wa mikambana leyi fanaka ni xiluva xa alimondi, swin'we ni mabundzu ni swiluva,

³⁵bundzu rin'we ri ta va ehansi ka marhavi mambirhi lama humaka ekandelarini; bundzu rin'wana ri ta va ehansi ka marhavi mambirhi man'wana lama humaka ekandelarini, ni bundzu rin'wana ehansi ka marhavi man'wana mambirhi lama humaka ekandelarini, ku ringanisa marhavi ya ntlhanu na rin'we ya kandelari.

³⁶Mabundzu ni marhavi swi ta huma eka yona; xi ta va xilo xin'we lexi endliweke hi nsuku lowu furiweke lowu kwetsimaka.

³⁷U ta yi endlela mavoningo ya ntlhanu na mambirhi; kutani va ta tlhoma mavoningo ehenhla ka yona, ma ta voningela tlhelo ra le mahlweni ra kandelari.

³⁸Tintlawa ta yona ni swimbitana swa nkuma, swi ta endliwa hi nsuku lowo kwetsima.

³⁹Yona kandelari ni swibya hinkwaswo swa yona swi ta endliwa hi talenta ya nsuku lowo kwetsima.

⁴⁰Languta, u swi endla hi xifaniso lexi u nga xi kombisiwa entshaveni.”