Read Xitsonga Exodus 26 Bible Online

Exodus 26 - Xitsonga bible

Exodus 26

¹“U ta endla Tabernakela hi tinguvu ta khume ta ntsembyana lowo saseka leyi lukiweke, ni xivunguvungu, ni scarlet, ni crimson; u ta fanisa kona tikerubu hi ntirho wa vutlhari.

²Ku leha ka nguvu yin'wana swi ta va swisungunhu swa 28, ku anama ka yona swi ta va swisungunhu swa mune; tinguvu hinkwato ti ta endliwa hi mpimo wun'we.

³Tinguvu ta ntlhanu ti ta rhungiwa swin'we; tinguvu tin'wana ta ntlhanu ti ta rhungiwa swin'we na tona.

⁴U ta swula ni tingoti ta xivunguvungu eku swonyeni ka nguvu yo sungula, hitlhelo ra tinguvu leti rhungiweke swin'we; u ta endlisa sweswo emaswonyeni ya nguvu leyi nga rhungiwa ni tin'wana.

⁵U ta swula tingoti ta ntlhanu wa makume engubyeni yin'wana, ni le tingoti ta ntlhanu wa makume tlhelo ra nguvu yin'wana ya makumu; tingoti ti ta lavana.

⁶U ta endla swikhweketana swa nsuku swa ntlhanu wa makume, kutani u ta hlanganisa tinguvu hi swikhweketana, leswaku Tabernakela xi va xilo xin'we.

⁷“U ta luka tinguvu ta voya bya timbuti ku endla tende ehenhla ka Tabernakela; u ta endla tinguvu teto ta khume na yin'we.

⁸Ku leha ka nguvu swi ta va swisungunhu swa makume manharhu, ni ku anama ka yona swisungunhu swa mune; tinguvu leti ta khume na yin'we ti ta endliwa hi mpimo wun'we.

⁹U ta rhunga tinguvu ta ntlhanu hitlhelo rin'wana, ni tinguvu ta ntlhanu na yin'we hitlhelo rin'wana, u ta funengeta hi nguvu ya ntlhanu na yin'we emahlweni ka Tabernakela.

¹⁰U ta rhunga tingoti ta ntlhanu wa makume eku swonyeni ka nguvu yo sungula ya leti rhungiweke swin'we ni tingoti ta ntlhanu wa makume emakun'wini ya tinguvu tin'wana.

¹¹U ta endla ni swikhweketana swa ntlhanu wa makume hi koporo, kutani u ta nghenisa swikhweketana etingotini, u ta hlanganisa xi sweswo tende, xi va xilo xin'we.

¹²Kambe loko ri ri ripepe leri seleke etingubyini ta tende, hileswaku hafu ya nguvu leyi nga ta sala, ri ta nembelela emahosi ka Yindlu.

¹³Kutani xisungunhu lexi nga hala ni hala, leswi seleke eku anameni ka tinguvu ta Tabernakela, swi ta nembelela ematlhelweni ya Yindlu, hala ni hala ku yi funengeta.

¹⁴“U ta endlela tende xifunengeto hi madzovo ya tinyimpfu lama petiweke eka leswo tshwuka, ni xifunengeto xa madzovo ya ntini lexi nga ta funengeta ehenhla.

¹⁵“Kutani u ta endlela Tabernakela mapulangi hi murhi wa munga, ma ta yimisiwa.

¹⁶Ku leha ka pulangi ri ta va khume ra swisungunhu, ku anama ka rona xisungunhu na hafu.

¹⁷Pulangi rin'wana ni rin'wana ri ta va ni swihlanganiso swimbirhi leswi lavaneke; u ta endla sweswo mapulangi hinkwawo ya yindlu.

¹⁸Mapulangi lawa u nga ta ma endlela Tabernakela ma ta va makume mambirhi hitlhelo ra dzonga.

¹⁹Kutani u ta endla switshamo swa silivhere swa mune wa makume, swi ta vekiwa ehansi ka mapulangi ya makume mambirhi; pulangi rin'wana ni rin'wana ri va ni switshamo swimbirhi ehansi ka swihlanganiso swimbirhi swa rona.

²⁰Tlhelo ra n'walungu ra Yindlu, u ta yi endlela mapulangi ya makume mambirhi, ni switshamo swa wona swa silivhere swa mune wa makume;

²¹pulangi rin'wana ni rin'wana ri va ni switshamo swimbirhi.

²²Tlhelo ra vupeladyambu, mpfungwe ka Yindlu, u ta veka ntlhanu wa mapulangi ni pulangi rin'we.

²³Kutani u ta endlela Yindlu, tlhelo ra le mpfungwe, mapulangi mambirhi etikhonweni,

²⁴ma ta fanana ku suka ehansi ku fika ehenhla ka xingwavila xo sungula; swi ta endlisiwa sweswo hi mapulangi mambirhi; ma ta vekiwa etikhonweni ha mambirhi.

²⁵Loko swi ri sweswo, ku ta va ni mapulangi ya ntlhanu na manharhu, ni switshamo swa yona swa silivhere swa khume na ntlhanu na xin'we; swi ta va swimbirhi ehansi ka pulangi rin'wana ni rin'wana.

²⁶“Kutani u ta endla timbalelo ta ntlhanu ta murhi wa munga, ti ta va ta mapulangi ya tlhelo rin'wana ra Yindlu,

²⁷ni timbalelo tin'wana ta ntlhanu ta mapulangi ya tlhelo rin'wana, ni timbalelo ta ntlhanu ta mapulangi emahosi ka yindlu, hitlhelo ra vupeladyambu.

²⁸Kambe rivalelo leri nga exikarhi ri ta hlanganisa mapulangi hinkwawo.

²⁹U ta nameka mapulangi hi nsuku, kutani u ta endla swingwavila swa wona hi nsuku, timbalelo ti ta nghenisiwa eka swona; na tona timbalelo u ta ti nameka hi nsuku.

³⁰U ta aka Tabernakela hilaha u nga kombisiwa hakona xifaniso entshaveni.

³¹“U ta endla nguvu ya xivunguvungu, ni scarlet, ni crimson, hi ntsembyana lowo saseka, leyi swuriweke. Yi ta endliwa hi ntirho wa vutlhari; va ta fanisa tikerubu eka yona.

³²U ta yi hayeka etimhandzeni ta mune ta murhi wa munga leti namekiweke hi nsuku, leti nga ni swikhweketana swa nsuku; ti ta tlhomiwa eswitshan'weni swa mune swa silivhere.

³³U ta tiyisa nguvu hi swikhweketana, kutani u ta nghenisa kona endzeni ka nguvu, areka ya vumbhoni, nguvu leyi yi ta tsemakanyisa vukwetsimelo ni xikwetsimisiso.

³⁴U ta veka xikhongelelo earekeni ya vumbhoni exikwetsimisisweni.

³⁵Tafula, u ta ri veka ehandle ka nguvu; rona rivoningo ri ta vandzamana ni tafula hitlhelo ra dzonga ra Tabernakela, kutani u ta veka tafula hitlhelo ra n'walungu.

³⁶“U ta endlela nyangwa ya tende nguvu ya xivunguvungu, ni crimson, ni scarlet, hi ntsembyana lowo saseka leyi swuriweke, wu va ntirho wa vutlhari.

³⁷Kutani u ta endlela nguvu leyi, timhandze ta ntlhanu ta munga, u ti nameka hi nsuku; swikhweketana swa tona swi ta va swa nsuku; kutani u ta chululela timhandze leti, switshamo swa ntlhanu swa koporo.”