Read Xitsonga Exodus 32 Bible Online

Exodus 32 - Xitsonga bible

Exodus 32

¹Kakuloko tiko ri vona leswaku Muxe a hlwela ku xika entshaveni, ri hlengeletana eka Aroni, ri ku eka yena: “Tana, u hi endlela swikwembu leswi hi rhangelaka emahlweni, hikuva loko a ri Muxe, wanuna loyi a hi humeseke etikweni ra Egipta, a hi tivi lexi n'wi humeleleke.”

²Kutani Aroni a ku eka vona: “Anyulani swingwavila swa nsuku leswi nga etindleveni ta vasati va n'wina ni ta vana va n'wina, mi ndzi tisela swona.”

³Kutani vanhu hinkwavo va anyula swingwavila swa nsuku leswi nga etindleveni ta vona, va swi tisa eka Aroni;

⁴kutani a swi amukela, a tsemelela nsuku hi nsindzu, a wu nyukisa, a chulula rhole. Kutani va ku: “Hi lexi xikwembu xa wena, Israele, lexi ku humeseke etikweni ra Egipta.”

⁵Kakuloko Aroni a vona sweswo, a aka alitari emahlweni ka rhole; kutani Aroni a huwelela, a ku: “Mundzuku wu ta va nkhuvo wa Yehovha!”

⁶Kutani va pfuka ka ha ri mixo, va humesa magandzelo lama hisiwaka, ni magandzelo ya ku khensa; kutani tiko ri tshama hansi, ri dya, ri nwa, kutani va suka va cina.

⁷Kutani Yehovha a ku eka Muxe: “Suka u famba hikuva tiko ra wena, leri u ri humeseke etikweni ra Egipta ri tionhile.

⁸Va hatlisile ku hambuka ndlela leyi ndzi va leriseke yona; va tiendlele rhole leri chuluriweke va khinsama emahlweni ka rona, va ri endlele magandzelo va ku: ‘Hi xona xikwembu xa wena Israele lexi ku humeseke etikweni ra Egipta!’ ”

⁹Yehovha a engeta, a ku eka Muxe: “Ndzi langutile tiko leri, ndzi ri: I tiko ra tinhamu leto nonon'hwa.

¹⁰Ndzi tshike sweswi, ndzi va karihela, ndzi va heta; kambe wena ndzi ta ku endla tiko lerikulu.”

¹¹Kambe Muxe a khongela Yehovha, Xikwembu xa yena, a ku: “Oho Yehovha! U ri karihela yini tiko leri u ri humeseke eEgipta hi matimba lamakulu?

¹²Vaegipta va ta vulela yini va ku: ‘U va humesile ku va endla swo biha, ku va dlaya etintshaveni, ni ku va heta laha emisaveni? Tlherisa ku kariha ka wena, u tshika khombo leri u ri lavelaka tiko ra wena.

¹³Tsundzuka Abrahama na Isaka, na Israele, malandza ya wena, lava u va hlambanyeleke loko u te eka vona: ndzi ta andzisa vatukulu va n'wina, va ta kota tinyeleti ta le tilweni; kutani ndzi ta nyika vatukulu va n'wina tiko hinkwaro leri ndzi ri vuleke va ri fuma hilaha ku nga heriki.’ ”

¹⁴Hilaha Yehovha a tshikaka khombo leri a ri anakanyeleke tiko ra yena.

¹⁵Kutani Muxe a rhelela entshaveni, a tamele maribye mambirhi ya swimphampha ya vumbhoni emavokweni ya yena, ma tsariwile matlhelo mambirhi, hala ni hala;

¹⁶maribye walawo a wu ri ntirho wa Xikwembu, ni ku tsala loku tsariweke emaribyeni a ku ri ku tsala ka Xikwembu.

¹⁷Kambe Yoxuwa a twa marito ya tiko loko ri huwelela; kutani a ku eka Muxe: “Ku ni huwa ya ku lwa emixaxeni.”

¹⁸Kutani Muxe a ku: “A hi marito ya vahluri, kumbe marito ya lava hluriweke Ndzi twa marito ya tinsimu.”

¹⁹Kuteloko a tshinelela mixaxa, a vona rhole ni lava cinaka. Kavaloko Muxe a kariha, a cukumeta maribye emavokweni ya yena, ma fayeka ehansi ka ntshava.

²⁰Kutani a teka rhole leri va ri endleke a ri hisa hi ndzilo, a ri sila, a ri endla mapa, a chela ematini, a nwisa vana va Israele.

²¹Kutani Muxe a ku eka Aroni: “Tiko leri ri ku endlile yini loko ri endlerile ku dyoha lokunghasi?”

²²Aroni a ku: “Hosi yanga yi nga tshuki yi kariha! Wa swi tiva leswaku vanhu va tiko leri, va bihile;

²³va tile eka mina, va ku: ‘Hi endlele xikwembu lexi hi rhangelaka emahlweni; hikuva loko a ri wanuna loyi Muxe, la hi humeseke etikweni ra Egipta a hi tivi leswi n'wi khomeke.’

²⁴Kutani ndzi ku eka vona: ‘Un'wana ni un'wana la nga ni nsuku a wu anyula,’ kutani va ndzi nyika, ndzi wu hoxa endzilweni, kutani ku humile rhole leri.”

²⁵Muxe a vona leswaku tiko ri tintshunxile, hikuva Aroni a ri tshikile leswaku ri soriwa hi valala va rona.

²⁶Kutani Muxe a yima enyangweni ya mixaxa, a ku: “Mani na mani la rhandzaka Yehovha a a te eka mina!” Kutani vana va Levhi va hlengeletana eka yena.

²⁷Kavaloko a ku eka vona: “Yehovha, Xikwembu xa Israele, xi ri: ‘Un'wana ni un'wana wa n'wina a a hlome tlhari ra yena, kutani mi nghena emixaxeni, mi hundza enyangweni yin'wana ni yin'wana, mi dlaya vamakwenu, ni vanakuloni ni lava akeke na n'wina.’ ”

²⁸Kutani vana va Levhi va endla hi ku vula ka Muxe; hi siku lero ku fa vanhu lava laveke ku va makume manharhu ya madzana.

²⁹Kutani Muxe a ku: “Tihlawuleleni Yehovha sweswi, hikuva un'wana ni un'wana u lwile ni n'wana wa yena, kumbe ni makwavo, mi ta kuma hakona ku katekisiwa namuntlha.”

³⁰Kuteloko byi xile, Muxe a ku eka tiko: “Mi dyohile hi ku dyoha a lokukulu. Kambe sweswi ndzi ta tlhandlukela eka Yehovha, kumbe ndzi ta kuma ku rivaleriwa ka ku dyoha ka n'wina.”

³¹Kwalaho Muxe a tlhelela eka Yehovha, a ku: “Yo! Tiko leri ri dyohile ngopfungopfu loko ri tiendlele xikwembu xa nsuku.

³²Kambe sweswi, wanga va rivalela ku dyoha ka vona! Loko swi nga ri tano, hlangula vito ra mina ebukwini ya wena leyi u yi tsaleke.

³³Yehovha a ku eka Muxe: La ndzi dyoheleke, hi yena loyi ndzi nga ta n'wi susa ebukwini ya mina.

³⁴Suka sweswi, u fambisa tiko laha ndzi ku leriseke kona. Vona, ntsumi ya mina yi ta ku rhangela emahlweni, kambe siku leri ndzi nga ta avanyisa, ndzi ta va bela ku dyoha ka vona.”

³⁵Yehovha u bile tiko hi mukhuva wulowo, hikuva va byerile Aroni ku va endlela rhole.