Read Xitsonga Exodus 40 Bible Online

Exodus 40 - Xitsonga bible

Exodus 40

¹Kutani Yehovha a vulavula na Muxe, a ku:

²“Hi siku ro rhanga ra n'hweti yo sungula, u ta dzima yindlu, yi nga Tabernakela ya nhlengeletano,

³u nghenisa kona areka ya vumbhoni, u sirhela areka hi nguvu,

⁴u ta tisa ni tafula, u ri lunghisela swibya swa rona; u tisa ni kandelari, u lumeka timboningo ta yona.

⁵U ta veka alitari ya nsuku ya mirhi ya risuna emahlweni ka areka ya vumbhoni, kutani u ta vamba nguvu enyangweni ya Tabernakela.

⁶U ta veka alitari ya ku hisa magandzelo enyangweni ya yindlu ya Tabernakela ya nhlengeletano.

⁷Kutani u ta veka nkamba exikarhi ka yindlu ya nhlengeletano ni alitari, u chela mati kona.

⁸U ta rhendzela hinkwako hi xivava u vamba nguvu enyangweni ya xivava.

⁹Kutani u ta teka mafurha ya ku tota, u tota tabernakela ni swilo hinkwaswo swa yona u yi hlawurisa sweswo ni mitirho hinkwayo ya yona kutani yi ta va yi hlawuriwile.

¹⁰U ta tota alitari ya magandzelo ni mitirho hinkwayo ya yona; u hlawula alitari, kutani alitari yi ta va leyi kwetsimaka ngopfu.

¹¹U tota ni nkamba ni xikhato xa wona, u wu hlawula.

¹²“Kutani u ta tshineta Aroni, ni vana va yena enyangweni ya yindlu ya nhlengeletano, u va hlantswa hi mati,

¹³kutani u ta ambexa Aroni hi tinguvu leti hlawuriweke, u n'wi tota, u n'wi hlawula leswaku a tirha ntirho wa vuprista emahlweni ka mina.

¹⁴U tshineta ni vana va yena, u va ambexa tinguvu;

¹⁵u va tota kukota tata wa vona, leswaku va tirha ntirho wa vuprista emahlweni ka mina; ku totiwa ka vona ku ta va veka vaprista hi masiku etinxakeni ta vona.”

¹⁶Kutani Muxe a endla hinkwaswo hilaha Yehovha a nga n'wi lerisa hakona.

¹⁷Hi siku ro sungula ra n'hweti yo rhanga ya lembe ra vumbirhi, tabernakela yi yimisiwa.

¹⁸Muxe a yimisa tabernakela, a veka xifunengeto ni switshamo swa mapulangi, ni timbalelo, a yimisa ni timhandze.

¹⁹Kutani a fulela yindlu hi tende, a tlhandleka ehenhla ka yona xifunengeto, hilaha Yehovha a nga lerisa Muxe hakona.

²⁰Kutani a teka vumbhoni a byi nghenisa earekeni; a vehela mimpingu earekeni, kutani a veka vukhongelelo ehenhla ka areka;

²¹a tisa areka etabernakeleni, a vamba nguvu, a sirhela areka ya vumbhoni ha yona hilaha Yehovha a nga lerisa Muxe hakona.

²²Kutani a nghenisa tafula etabernakeleni ya nhlengeletano, en'walungwini ka yindlu, haleno ka nguvu;

²³a veka ni swinkwa emahlweni ka Yehovha, a xi lunghisa etafuleni, hilaha Yehovha a nga lerisa Muxe hakona.

²⁴Kandelari, yona a yi veka endlwini ya nhlengeletano, yi lavane ni tafula, edzongeni ra tabernakela.

²⁵Kutani a veka mavoningo emahlweni ka Yehovha, hilaha Yehovha a nga lerisa Muxe hakona.

²⁶A veka alitari ya nsuku endlwini ya nhlengeletano, kusuhi ni nguvu;

²⁷a hisa mirhi ya risuna, hilaha Yehovha a nga lerisa Muxe hakona.

²⁸Kutani a hayeka nguvu enyangweni ya tabernakela.

²⁹Kutani a veka alitari ya magandzelo lama hisiwaka enyangweni ya yindlu, ya tabernakela ya nhlengeletano, a humesa magandzelo lama hisiwaka, hilaha Yehovha a nga lerisa Muxe hakona.

³⁰Kutani a veka nkamba exikarhi ka yindlu ya nhlengeletano ni alitari, a va a chela mati ka wona leswaku va hlamba kona.

³¹Muxe, na Aroni ni vana va yena, va hlamba mavoko ni milenge.

³²Kakuloko va nghena endlwini ya nhlengeletano, ni loko va tshinelela alitari, va hlamba hilaha Yehovha a nga lerisa Muxe hakona.

³³Kutani a yimisa xivava lexi rhendzelekelaka tabernakela ni alitari, kutani a hayeka nguvu enyangweni ya xivava; hi sweswo Muxe a hetaka ntirho lowu.

³⁴Kutani papa ri funengeta Yindlu ya nhlengeletano, kutani ku kwetsima ka Yehovha ku tata Yindlu.

³⁵Swi tsandza na Muxe a hluleka ku nghena endlwini ya nhlengeletano hikuva papa a ri le henhla ka yona ni ku kwetsima ka Yehovha a ku tata Yindlu.

³⁶Kutani loko papa ri tlakuka ehenhla ka Yindlu, vana va Israele va famba; swi endlisa sweswo eku fambeni hinkwako ka vona.

³⁷Kambe loko papa ri nga tlakuki, a va nga suki ku fikela siku leri papa ri tlakukaka ha rona.

³⁸Hikuva papa ra Yehovha a ri tshama ehenhla ka tabernakela ninhlekanhi, kutani nivusiku, a ku voninga ndzilo epapeni emahlweni ka yindlu hinkwayo ya Israele, eku fambeni hinkwako ka vona.