Read Xitsonga Exodus 6 Bible Online

Exodus 6 - Xitsonga bible

Exodus 6

¹Kutani Yehovha a ku eka Muxe: “Sweswi, u ta vona leswi ndzi nga ta swi endla eka Faro; hikuva hi voko ra matimba u ta va tshika va famba; hi voko ra matimba u ta va hlongola etikweni ra yena.”

²Xikwembu xi engeta xi vulavula na Muxe, xi ku eka yena: “Hi mina Yehovha.

³Ndzi tikombisile eka Abrahama, ni le ka Isaka, ni le ka Yakobo, ndzi ri Xikwembu xa matimba hinkwawo, kambe vito ra mina ra Yehovha a ri nga tiviwi hi vona.

⁴Kambe ndzi tiyisile ntwanano wa mina na vona ku va nyika tiko ra Kanana, tiko ra ku luvela ka vona.

⁵Ndzi yingisile ku huwelela ka vana va Israele, hilaha Vaegipta va va endleke makhumbi hakona; kutani ndzi tsundzukile ntwanano wa mina.

⁶Hikwalaho u nge eka vana va Israele: Hi mina Yehovha; ndzi ta mi rhula ku tika ka Vaegipta; ndzi mi lwela; ndzi ta mi tshunxa evukhumbini bya vona, ndzi mi kutsula hi voko ra matimba, ni ku avanyisa lokukulu.

⁷Kutani ndzi ta mi teka, mi va tiko ra mina, ndzi va Xikwembu xa n'wina; mi ta tiva leswaku hi mina Yehovha, Xikwembu xa n'wina, loyi a mi rhulaka ku tika ka Vaegipta;

⁸kutani ndzi ta mi nghenisa etikweni leri ndzi nga hlambanya, ndzi ku: ‘Ndzi ta ri nyika Abrahama, na Isaka, na Yakobo; ndzi mi nyika rona, yi va ndzhaka ya n'wina. Hi mina Yehovha.’ ”

⁹Kutani Muxe a vurisa sweswo eka vana va Israele; kambe a va n'wi yingisanga hikwalaho ka ku vilela ka vona, ni vukhumbi bya vona.

¹⁰Kutani Yehovha a vulavula na Muxe, a ku:

¹¹“Famba, u ya byela Faro, hosi ya Egipta a tshika vana va Israele va suka etikweni ra yena.”

¹²Kutani Muxe a vulavula emahlweni ka Yehovha, a ku: “Waswivo, vana va Israele a va ndzi yingisanga; na yena Faro a nga ndzi yingisisa ku yini, leswi ndzi nga ni xirimi?”

¹³Yehovha a vulavula kambe na Muxe na Aroni, a va rhuma eka vana va Israele, ni le ka Faro, hosi ya Egipta, a va lerisa ku humesa vana va Israele etikweni ra Egipta.

¹⁴Hi vona vini va tinyimba ta vatata wa vona: Vana va Rhuveni, mativula ya Israele: Hanoko, na Palu, na Hesironi, na Karimi. Hi tona tinyimba ta Rhuveni.

¹⁵Vana va Simiyoni: Yemuwele, na Yamini, na Ohada, na Yakini, na Sohari na Xawulu, n'wana wa nsati wa Mukanana. Hi tona tinyimba ta Simiyoni.

¹⁶Mavito ya vana va Levhi, hi tinyimba ta vona, hi lawa: Gerixoni, na Kohata na Merari. Malembe ya ku hanya ka Levhi a ma ri 137.

¹⁷Vana va Gerixoni: Libini na Ximeyi, hi tinyimba ta vona.

¹⁸Vana va Kohata: Amirama, na Yisihara, na Hebroni, na Uziele. Malembe ya ku hanya ka Kohata a ma ri 133.

¹⁹Vana va Merari: Maheli na Muxi. Hi tona tinyimba ta Levhi hi tinxaka ta vona.

²⁰Amirama a teka Yokebedi hahani wa yena, a n'wi velekela Aroni na Muxe. Malembe ya ku hanya ka Amirama a ma ri 137.

²¹Vana va Yisihara: Kora, na Nefege na Zikri.

²²Vana va Uziele: Mixaele, na Elisafani na Sitri.

²³Aroni a teka Elixeba, n'wana wa Aminadaba, makwavo wa Nahaxoni, a n'wi velekela Nadabu na Abihu, na Eliyazara na Itamara.

²⁴Vana va Kora: Asiri, na Elikana na Abiyasafa. Hi tona tinyimba ta Vakora.

²⁵Eliyazara, n'wana Aroni, a teka un'wana wa vana va Putiele, a n'wi velekela Finiyasi. Hi vona vini va vatata wa Levhi hi tinyimba ta vona.

²⁶Hi yena Aroni loyi na Muxe loyi, Yehovha a nga ku eka vona: “Humesani vana va Israele eEgipta hi mavandla ya vona.”

²⁷Hi vona va nga vulavula na Faro, hosi ya Egipta, leswaku va humesa vana va Israele eEgipta, Hi yena Muxe loyi na Aroni loyi.

²⁸Siku Yehovha a vulavulaka na Muxe etikweni ra Egipta, Yehovha a ku eka Muxe:

²⁹“Hi mina Yehovha. Byela Faro, hosi ya Egipta, hinkwaswo leswi ndzi ku byeleke swona.”

³⁰Kutani Muxe a ku eka Yehovha: “Ndzi munhu wa xirimi; Faro u ta ndzi yingisisa hi ku yini xana?”