Read Xitsonga Exodus 7 Bible Online

Exodus 7 - Xitsonga bible

Exodus 7

¹Yehovha a ku eka Muxe: “Vona, ndzi ku vekile Xikwembu eka Faro, kutani Aroni, makwenu, u ta va muprofeta wa wena.

²U ta vula hinkwaswo leswi ndzi nga ta ku lerisa swona, yena Aroni makwenu u ta byela Faro leswaku a tshika vana va Israele va suka etikweni ra yena.

³Kambe mina ndzi ta nonon'hwisa mbilu ya Faro, ndzi va ndzi andzisa swikombiso ni masingita ya mina etikweni ra Egipta.

⁴Kambe Faro a nga ka a nga mi yingisi, kutani ndzi ta tlakusa voko ra mina henhla ka Egipta, ndzi humesa etikweni leri mavandla ya mina ri nga tiko ra mina, vana va Israele, hi ku avanyisa lokukulu.

⁵Kutani Vaegipta va ta tiva leswaku hi mina Yehovha loko ndzi tlakuse voko ra mina ehenhla ka Egipta, ndzi humese vana va Israele exikarhi ka vona.”

⁶Muxe na Aroni va endlisa sweswo. Va endla hinkwaswo hilaha Yehovha a nga va lerisa hakona.

⁷Muxe a a ri ni malembe ya 80; na Aroni a a ri ni malembe ya 83, loko va vulavula na Faro.

⁸Kutani Yehovha a byela Muxe na Aroni, a ku:

⁹“Kutakuloko Faro a mi byela, a ku: ‘Endlani masingita,’ u ta ku eka Aroni: ‘Teka nhonga ya wena, u yi hoxa emahlweni ka Faro, yi ta hundzuka nyoka.’ ”

¹⁰Kavaloko Muxe na Aroni va ya eka Faro, va endla hilaha Yehovha a va leriseke hakona. Aroni a hoxa nhonga ya yena emahlweni ka Faro, ni le mahlweni ka malandza ya yena, yi hundzuka nyoka.

¹¹Kambe Faro a vitana tintlhari ni vangoma; kutani na vona, hikuva a ti ri tintlhari ta Egipta, va endlisa sweswo hi vutlhari bya vona:

¹²un'wana ni un'wana a hoxa nhonga ya yena, kutani tinhonga ti hundzuka tinyoka; kambe nhonga ya Aroni yi mita tinhonga ta vona.

¹³Kambe mbilu ya Faro yi nonon'hwa, kutani a nga va yingisanga, hilaha Yehovha a nga vula hakona.

¹⁴Kutani Yehovha a ku eka Muxe: “Mbilu ya Faro yi nonon'hwile, wa ala ku tshunxa tiko.

¹⁵Yana eka Faro nimixo; u ta huma ku ya etlhelweni ra mati, kutani u ta n'wi yimela eribuwini ra nambu; u tamele nhonga leyi nga hundzuka nyoka,

¹⁶u ta ku eka yena: ‘Yehovha Xikwembu xa Vaheveru u ndzi rhumile eka wena, a ku: Tshika tiko ra mina ri ya ndzi tirhela emananga. Kambe a ku ndzi yingisanga ku fika sweswi.’

¹⁷Yehovha a ku: ‘U ta tiva hi sweswo leswaku hi mina Yehovha: Ndzi ta ba mati ya nambu hi nhonga ya mina, ma ta hundzuka ngati,

¹⁸kutani tinhlampfi ta nambu ti ta fa, nambu wu ta nun'hwa, Vaegipta va ta nyenya ku nwa mati ya nambu.’ ”

¹⁹Kutani Yehovha a ku eka Muxe: “Byela Aroni, u ku: Teka nhonga ya wena, u tlakusa voko ra wena ehenhla ka mati ya Egipta, ni le henhla ka milambu, ni le henhla ka migerho ya vona, ni le henhla ka mativa ni tidamu ta vona, kutani ma ta hundzuka ngati; ngati yi ta va kona etikweni hinkwaro ra Egipta, ni le swibyeni swo vatliwa, ni swa ribye.”

²⁰Kutani Muxe na Aroni va endla hilaha Yehovha a va leriseke hakona: Aroni a yimisa nhonga ya yena, a ba mati ya nambu emahlweni ka Faro, ni le mahlweni ka malandza ya yena, kutani mati hinkwawo ya nambu ma hundzuka ngati;

²¹tinhlampfi ta nambu ti fa, ni nambu wu nun'hwa; kutani Vaegipta va tsandzeka ku nwa mati ya nambu, ni ngati yi va kona etikweni hinkwaro ra Egipta.

²²Kutani tin'anga ta Egipta ti endlisa sweswo hi vutlhari bya tona. Kambe mbilu ya Faro yi nonon'hwa, kutani a nga yingisanga, hilaha Yehovha a nga vula hakona.

²³Faro a tlhela, a ya endlwini ya yena, a nga vekanga mbilu ya yena eka mhaka leyi.

²⁴Kutani Vaegipta va cela kusuhi ni nambu, va lava mati ya ku nwa, hikuva va tsandzeka ku nwa mati ya nambu.

²⁵Ku ta hundza masiku ya ntlhanu na mambirhi loko Yehovha a sungule ku ba nambu.