Read Xitsonga Exodus 9 Bible Online

Exodus 9 - Xitsonga bible

Exodus 9

¹Kwalaho Yehovha a ku eka Muxe: “Yana eka Faro, u ku eka yena: Yehovha, Xikwembu xa Vaheveru, xi te: ‘Tshunxa tiko ra mina, ri ya ndzi tirhela.

²Hikuva loko u ala ku ri tshunxa, u ri sivela kambe,

³voko ra Yehovha ri ta va ehenhla ka mitlhambi ya wena leyi nga enhoveni, ni le henhla ka tihanci, ni le henhla ka timbhongolo, ni le henhla ka tikamela, ni le henhla ka tihomu, ni le henhla ka tinyimpfu, wu ta va ntungu lowukulu.

⁴Kambe Yehovha u ta hlawula swifuwo swa Vaisraele exikarhi ka swifuwo swa Vaegipta, ku nga ka ku nga fi nchumu eka swilo hinkwaswo swa vana va Israele.’ ”

⁵Yehovha u vekile nkarhi a ku: “Mundzuku Yehovha u ta endla mhaka leyi etikweni leri.”

⁶Kutani ku sungula nimixo, Yehovha a endlisa sweswo. Swifuwo hinkwaswo swa Vaegipta swi fa; kambe a ku fanga nchumu emitlhambini ya vana va Israele.

⁷Faro a vutisa leswi humeleleke, kutani a ku nga fanga ni xifuwo xin'we emitlhambini ya vana va Israele. Kambe mbilu ya Faro yi nonon'hwa, kutani a nga tshunxangi tiko.

⁸Kutani Yehovha a ku eka Muxe na Aroni: “Tekani nkuma exitikweni xa mufuri, mi tata mavoko, kutani Muxe a ta wu tsutsuxa ehenhla emahlweni ka Faro;

⁹wu ta hundzuka ntshuri lowu nga ta funengeta tiko hinkwaro ra Egipta, wu humesa matshumba lama endlaka swilondza eka vanhu ni le ka swifuwo etikweni hinkwaro ra Egipta.”

¹⁰Kutani va teka nkuma exitikweni xa mufuri va ya emahlweni ka Faro; kuteloko Muxe a wu tsutsuxile henhla, wu humesa matshumba lama endlaka swilondza eka vanhu ni le ka swifuwo.

¹¹Kutani tin'anga ti tsandzeka ku endlisa sweswo emahlweni ka Muxe hikwalaho ka matshumba, hikuva tin'anga ta Vaegipta a ti ri ni matshumba swin'we ni Vaegipta hinkwavo.

¹²Kambe Yehovha a nonon'hwisa mbilu ya Faro, a nga yingisanga Muxe na Aroni, hilaha Yehovha a nga byela Muxe hakona.

¹³Yehovha a ku eka Muxe: “U ta pfuka wa ha ri mixo, u ya emahlweni ka Faro, u ku eka yena: Yehovha, Xikwembu xa Vaheveru xi te: ‘Tshunxa tiko ra mina ri ya ndzi tirhela.

¹⁴Hikuva sweswi ndzi ta rhumela embilwini ya wena makhombo hinkwawo, ni le henhla ka malandza ya wena, ni le tikweni ra wena, u ta tiva leswaku a ku na un'wana la fanaka na mina emisaveni hinkwayo.

¹⁵Hikuva loko a ndzi tlakusile voko ra mina, ndzi ku ba hi ntungu, wena ni tiko ra wena, i ngi u lovile emisaveni.

¹⁶Kambe ndzi ku tshikile hikwalaho leswaku u vona matimba ya mina, ni leswaku vito ra mina ri twakala emisaveni hinkwayo.

¹⁷Loko u tikurisa ehenhla ka tiko ra mina, u engeta u ala ku ri tshunxa,

¹⁸nimixo, hi nkarhi wolowo, ndzi ta nisa xihangu lexikulu ngopfu, lexi mi nga tshamiki mi xi vona etikweni ra Egipta, ka ha ri mpfhuka ri tumbuluka ku fikela sweswi.

¹⁹Sweswi, rhuma u vuyisela swifuwo ni swilo hinkwaswo swa wena leswi nga enhoveni. Xihangu xi ta wela vanhu hinkwavo ni swifuwo hinkwaswo leswi nga ta kumiwa enhoveni, leswi nga ka swi nga pfaleriwi etindlwini, kutani swi ta fa.’ ”

²⁰Lava yingiseke ku lerisa ka Yehovha exikarhi ka malandza ya Faro, va tsutsumisa malandza ya vona ni swifuwo swa vona etindlwini.

²¹Kambe lava nga xiyangiki rito ra Yehovha, va tshike malandza ya vona ni swifuwo swa vona enhoveni.

²²Kutani Yehovha a ku eka Muxe: “Tlakusa voko ra wena ehenhla, xihangu xi wa etikweni hinkwaro ra Egipta, xi wela vanhu ni swifuwo, ni byanyi hinkwabyo bya tiko.”

²³Kavaloko Muxe a yimisa nhonga ya yena ehenhla, kutani Yehovha a pfumisa tilo a nisa ni xihangu, ni ndzilo a wu pfurha emisaveni; Yehovha a nisa xihangu etikweni ra Egipta.

²⁴Xihangu xi va kona, ni ndzilo lowu pfanganeke ni xihangu, kutani a xi ri lexikulu ngopfu, lexi nga sike voniwaka etikweni hinkwaro ra Egipta, ka ha ri mpfhuka tiko ri tumbuluka.

²⁵Xihangu xi be tiko hinkwaro ra Egipta, ni hinkwaswo leswi nga enhoveni, vanhu ni swifuwo, ni byanyi hinkwabyo bya tiko; ku tshoveka ni mirhi hinkwayo ya tiko.

²⁶Xihangu a xi nga ri kona etikweni ra Goxeni ntsena, laha i ngi vana va Israele va ri kona.

²⁷Kutani Faro a vitana Muxe na Aroni, a ku eka vona: “Sweswi, ndzi dyohile; i Yehovha la lulameke; mina ni tiko ra mina hi vadyohi.

²⁸Khongelani Yehovha leswaku ku nga tshuki ku va ni ku pfuma ni xihangu, kutani ndzi ta mi tshunxa mi famba, mi nga ha siveriwi.”

²⁹Muxe a ku eka yena: “Kutakuloko ndzi huma emutini, ndzi ta tlakusa mavoko ya mina eka Yehovha, kutani ku pfuma ku ta miyela, xihangu na xona xi ta hela, u ta tiva leswaku misava i ya Yehovha.

³⁰Kambe loko u ri wena ni malandza ya wena, ndza swi tiva leswaku a mi nga chavi Xikwembu.”

³¹Ntsembyana ni barley swi onhaka, hikuva barley a yi rhumbukile ni ntsembyana a wu balekile swiluva.

³²Koro ni swifake a swi biwanga, hikuva swi hlwele ku mila.

³³Kutani Muxe a suka eka Faro, a huma emutini, kuteloko a tlakuse mavoko ya yena eka Yehovha, ku pfuma ni xihangu swi hela, ni mpfula yi xa emisaveni.

³⁴Kambe Faro, kuteloko a vonile leswaku mpfula ni xihangu ni ku pfuma swi miyele, a engeta a dyoha, a ti nonon'hwisa mbilu, yena ni malandza ya yena.

³⁵Mbilu ya Faro yi nonon'hwa, a ala ku tshunxa vana va Israele, hilaha Yehovha a nga vula hi nomu wa Muxe.