Read Xitsonga Job 12 Bible Online

Job 12 - Xitsonga bible

Job 12

¹Yobo a tlhela a hlamula, a ku:

²“Kunene ingi mi tiko hinkwaro, Kutani vutlhari, mi ta fa na byo!

³Na mina, mbilu, ndzi na yo kukota n'wina; A ndzi xihlangi eka n'wina, Timhaka teto, i mani la nga ti tiviki xana?

⁴Ndzi hundzukile mahleko eka vanakulorhi, Loko ndzi kombela ku pfuniwa hi Xikwembu; Ingi la lulameke, la pfumalaka nandzu, i mahleko!

⁵Makhombo ma lulamele hi xisolo, hi ku vula ka lava tsakeke! Ku soriwa ku langutele loyi sondzo ra yena ri rhetemukaka.

⁶Mitsonga ya vaonhi yi ni ku tsaka; Ku rhula i ka lava nga vuriki nchumu hi Xikwembu, Lava tamelaka xikwembu xa vona emavokweni ya vona.

⁷“Wa nga vutisa tihomu, ti ta ku dyondzisa, Ni tinyanyana ta le tilweni, ti ta ku byela;

⁸Kumbe xana u vutisa misava, yi ta ku dyondzisa, Ni tinhlampfi ta lwandle, ti ta ku hlamusela.

⁹Ka swona hinkwaswo, i mani la nga alaka ku vona leswaku voko ra Yehovha ri endlile swilo hinkwaswo.

¹⁰Loyi mimoya ya leswi hanyaka hinkwaswo yi nga evokweni ra yena, Ni ku hefemula ka vanhu hinkwavo.

¹¹A ndzi ku: Ndleve a yi nga hlawuli ku vulavula, Kukota malaka lama tivaka ku hlawula swakudya-ke?

¹²Swikoxa swi ni vutlhari, Ni va malembe yo tala, va ni ku twisisa.

¹³“Eka xona Xikwembu ku tshama vutlhari ni matimba; Xi ni mianakanyo ni ku twisisa.

¹⁴Vona, loko xi onha, a ku na la nga vuyetelaka, Loko xi pfalela munhu, a ku na la nga n'wi pfulelaka.

¹⁵Waswivo xi sivela mati, kutani ma phya, Xi tlhela xi ma tshika, kutani misava yi onhaka.

¹⁶Eka xona ku tshamile matimba ni vutlhari; La hambukeke ni loyi a hambukisaka va le mavokweni ya xona;

¹⁷Xi yisa valerisi ekhotsweni, va ri lava phangiweke, Xi hungukisa vaavanyisi,

¹⁸Xi tshova tinhamu ta tihosi; Xi boha swifungha swa tona hi tiketana.

¹⁹Xi yisa vaprista ekhotsweni, Xi wisa ehansi lava matimba.

²⁰Lava tivaka ku vulavula, xi va pfumata timhaka; Xi tekela vakulu ku twisisa.

²¹Xi chela xisandzu ehenhla ka tihosana, Xi tshunxa vamba ra lava matimba.

²²Xi boxa makungu lama fihliweke emunyameni, Xi humesa ndzhuti wa rifu eku vonakaleni,

²³Xi andzisa matiko, kutani xi ma lovisa; Xi navisa matiko, xi tlhela xi ma vuyisela emindzilekaneni ya wona.

²⁴Xi susa ku twisisa ka tihosi ta matiko, Xi ti rhendzelekisa emananga laha ndlela ku nga hava;

²⁵Va hulumeta emunyameni, ku nga ri na ku vonakala; Xi va dedelekisa kukota vanhu lava phyophyiweke.