Read Xitsonga Job 13 Bible Online

Job 13 - Xitsonga bible

Job 13

¹“Mahlo ya mina ma vonile timhaka leto hinkwato, Tindleve ta mina ti ti twile, ti ti hlayisile.

²Leswi mi swi tivaka, ndza swi tiva na mina, A ndzi xihlangi eka n'wina.

³Kambe ndzi nga rhandza ku vulavula na Lowa matimba hinkwawo, Ndzi nga navela ku nghena eku tengeni ni Xikwembu.

⁴Hikuva n'wina mi luka mavunwa, Mi tinanga leti nga pfuniki nchumu.

⁵Loko mi nga miyela hinkwenu, A ndzi ta ku, mi tlharihile.

⁶Yingiselani ku hlamula ka mina, Mi twa hi nomu wa mina timhaka leti ndzi yimeke ha tona.

⁷Xana mi rhandza ku yimela Xikwembu hi mavunwa-ke? Xana mi nga xi tiyisa hi ku vula swa ku dyelela?

⁸Xana mi ta languta nghohe ya xona? Kumbe mi rhandza ku tiveka vayimeri va Xikwembu xana?

⁹Xana mi rhandza loko xi mi vutisisa hinkwaswo-ke? Kumbe mi nga xi kanganyisa kukotisa loko va kanganyisa munhu xana?

¹⁰Hakunene xi ta mi kaneta, Loko mi tirha exihundleni xa n'wina, mi languta hi nghohe ya vanhu.

¹¹Xana vukulu bya xona byi nga ka byi nga mi tateli ku chava? Ni nchavo wa xona wu nga ka wu nga mi khomi xana?

¹²Marito walawo ya n'wina, i timhaka ta ntshuri, Makhokholo ya n'wina ma fana ni makhokholo ya vumba.

¹³“Miyelani, mi ndzi tshika ndzi vulavula! Ndzi ta humeleriwa hi lexi ndzi nga humelelaka ha xona.

¹⁴Swi pfuna yini hambi ndzi nga khoma nyama ya mina hi meno ya mina, Ndzi fumbarhela moya wa mina hi voko ra mina.

¹⁵Vonani, a nga ndzi dlaya, a ndza ha ri na ntshembo; Ntsena ndzi rhandza ku tengisa mikhuva ya mina emahlweni ka xona.

¹⁶Hi kona ku nga ta va ku hlayiseka ka mina, Hikuva musandzi a nga ka a nga yimi emahlweni ka xona.

¹⁷Xiyani, mi yingisela marito ya mina, Timhaka ta mina ti va ti nghena etindleveni ta n'wina.

¹⁸Vonani, ndzi tlhandlakanyile timhaka ta mina; Ndzi tiva leswaku ndzi ta vekiwa la lulameke.

¹⁹U kwihi la rhandzaka ku tengisana na mina? Hikuva ndzi nga miyela, ndzi fa sweswi.

²⁰Ntsena u ndzi humesele hi swilo swimbirhi, Hilaha ndzi nga tiki fihla mombo wa mina emahlweni ka wena.

²¹U khwanyeta voko ra wena ekule na mina, U va u ndzi tshunxa hi nchavo wa wena.

²²Kutani u vitana, ndzi ta pfumela, Kumbe ku vulavula mina, wena u ndzi hlamula!

²³Swidyoho swa mina ni swivi swa mina swingani xana? U ndzi byela ku dyoha ka mina ni nandzu wa mina.

²⁴U ndzi fihlela yini mombo wa wena, U ndzi ringanisela yini nala wa wena?

²⁵Xana u rhandza ku chavisa tluka leri hehukeke? Kumbe ku hlongola mungu lowu omeke xana?

²⁶Leswi u ndzi baka hi leswi bavaka, U ndzi ba hikwalaho ka swidyoho swa vuntshwa bya mina xana?

²⁷Swi lo yini loko u ndzi bohela milenge hi misinya, Hambi ku ri ku siva tindlela ta mina hinkwato, Ni ku rhendzerisa mikondzo ya mina;

²⁸Kasi ndzi hela kukota rikunyi leri dyiweke hi swivungu, Ni nguvu leyi dyiweke hi mahele.