Read Xitsonga Job 14 Bible Online

Job 14 - Xitsonga bible

Job 14

¹“Munhu la velekiweke hi wansati U ni masiku ma nga ri mangani; u xurha makhombo;

²Wa mila, kutani a tsemiwa kukota xiluva; Wa hundza kukotisa ndzhuti, a nga tshami a va kona.

³Hi yena loyi u n'wi langutaka! Kutani hi mina u ndzi yisaka emitengweni na wena!

⁴Xana ku nga huma munhu la baseke eka munhu wa thyaka? Ku nga ka ku nga humi na un'we.

⁵Loko masiku ma hlayiwile, ni ntsengo wa tin'hweti ta yena loko wu tiviwile hi wena, Loko a vekiwile endzilakaneni wolowo, a nga ka a nga wu tluli.

⁶Susa mahlo ya wena eka yena, u n'wi ha nkarhi leswaku a tsaka Kukota la thoriweke loko a tsakela ku hela ka ntirho wakwe.

⁷Hikuva ku dzuna ku kona eka murhi; Hambi wu tsemiwa, wu tlhela wu mila, a wu tshiki ku hluka,

⁸Hambi timitsu ta wona ti nga dyuhala emisaveni, Xikundzu xa wona xi nga fela entshurini.

⁹Hi ku twa mati wu pfuka, Wu hluketa marhavi kukota murhi lowuntshwa.

¹⁰Kumbe munhu, loko a file, a herile matimba; U nyiketa moya, kutani u kwihi xana?

¹¹Mati ma helela emativeni, Nambu wu phya, wu omelela;

¹²Hi mukhuva wolowo munhu u etlela a nga ha pfuki, Ku ko ku hela matilo, a nga ka a nga ha pfuki, A nga ka a nga khindlimuki evurhongweni bya yena.

¹³Yo! Loko ngi u ndzi fihlile exivandleni xa vafi, U ndzi pfalela hi nkarhi, vukari bya wena byi ko byi hundza, U ndzi vekela siku leri u nga ta ndzi anakanya ha rona.

¹⁴Loko ngi munhu la feke a nga tlhela a hanya, A ndzi ta yingisela hi masiku hinkwawo ya tinyimpi ta mina, Ku fikela enkarhini lowu timhaka ta mina ti nga ta hundzuka.

¹⁵A u ta ndzi vitana, a ndzi ta pfumela; A u ta navela ntirho wa mavoko ya wena.

¹⁶Kambe u hlaya vukandziyo bya mina, U xiya swidyoho swa mina.

¹⁷Ku dyoha ka mina ku lemiwile enkwameni, U fungha hi fungho ku homboloka ka mina.

¹⁸“Loko yi ri ntshava, loko yi mbundzuxiwile yi hela, Ni ribye ri rhetemuka evutshan'weni bya rona.

¹⁹Mati ma hlula maribye; Maboboma ma kukuta ntshuri wa misava; U onhisa sweswo ku dzuna ka munhu.

²⁰U n'wi sungula hi masiku, a kondza a suka; U khwanyanisa mombo wa yena, u va u n'wi tlherisa.

²¹Vana va yena, ni loko va chaviwa, a nga swi tivi; Hambi va tsongahatiwa, a nga va tsundzuki.

²²Nyama ya yena yi twa ku vaviseka ka yona ntsena; Moya wa yena wu ni gome ha swa wona ntsena.”