Read Xitsonga Job 23 Bible Online

Job 23 - Xitsonga bible

Job 23

¹Kutani Yobo a hlamula, a ku:

²“Ni sweswi ku dzumadzuma ka mina ka ha tele ku bava, Voko leri ndzi baka ra ndzi tikela, ri funengeta ku n'unun'uta ka mina.

³Yo! Loko ndzi nga tiva laha ndzi nga xi kumaka kona, Leswaku ndzi ta fika eka xiluvelo xa xona!

⁴A ndzi ta tlhandlakanya timhaka ta mina emahlweni ka xona, Ndzi tata nomu wa mina hi timhaka,

⁵A ndzi ta tiva timhaka leti xi nga ta ndzi hlamula ha tona, Ndzi twa ni leswi xi nga ta ndzi byela swona.

⁶Xana xi ta lwa na mina hi matimba lamakulu ya xona-ke? E-e, niswitsanana, xi ta ndzi tsetselela!

⁷Loko ngi hi lowo lulama a kanetanaka na xona, Ndzi ta va ndzi tshunxekile hilaha ku nga heriki eka muavanyisi wa mina.

⁸“Kambe, loko ndzi ya evuxeni a xi kona, Hambi ndzi ya evupeladyambu a ndzi xi kumi.

⁹Hambi xi tirha en'walungwini, a ndzi xi voni, Hambi xi tifihla edzongeni, a ndzi xi vonisisi.

¹⁰Kasi xi tiva tindlela ta mina; Ni loko xi nga ndzi ringa, a ndzi ta huma ndzi basile kukota nsuku.

¹¹Nenge wa mina wu tiyile emitileni ya xona; Ndzi hlayisile ndlela ya xona, a ndzi hambukanga eka yona.

¹²Milawu ya milomu ya xona a ndzi yi hambukanga; Ndzi hlayisile timhaka ta nomu wa xona ku tlula leswi ndzi tihlambanyisaka ha swona.

¹³Hambiswiritano, xi ni ku anakanya kun'we ntsena, i mani la nga xi rhendzevetaka? Leswi moya wa xona wa swi rhandzaka, wu swi endla.

¹⁴Xi ta hetisa mhaka leyi xi yi vuleke ehenhla ka mina, Timhaka leto tano ti tele eka xona.

¹⁵Hikwalaho ndzi rhurhumelaka emahlweni ka xona, Loko ndzi xi anakanya, ndzi xi chava ngopfu.

¹⁶Kasi Xikwembu xi tsanisile mbilu ya mina, Lowa matimba hinkwawo u ndzi chavisile ngopfu.

¹⁷Hikuva a ndzi herisiwi hi munyama, A hi vusiku lebyi ndzi funengetaka.