Read Xitsonga Job 28 Bible Online

Job 28 - Xitsonga bible

Job 28

¹“Ku ni mugodi laha silivhere yi humaka kona, Ni nsuku wu kona laha va celaka kona, wu ta basisiwa.

²Nhumbu yi huma emisaveni, Koporo yi huma emaribyeni loko ma nyukisiwile.

³Munhu u herisa munyama; U vonisisa vuento hinkwabyo, Leswaku a kuma ribye leri fihliweke emunyameni ni le ndzhutini wa rifu.

⁴U cela mugodi ekule ni laha vanhu va akeke kona; Nenge wa yena wa rivala ku n'wi pfuna, U lengalenga, a hayekiwile ekule ni vanhu.

⁵Misava, hi kona ku humaka vuswa, Kasi ehansi ka yona, yi pfilunganyisiwa kukotisa ndzilo.

⁶Emaribyeni ya yona ku huma safiri, Ni ntshuri wa nsuku.

⁷“Gama a ri tivi ndlela ya kona, A yi voniwi hi mahlo ya makoti.

⁸Swiharhi leswi chavisaka a swi kandziyi kona, Nghala ya matimba a yi hundzi kona.

⁹“Munhu a nghenisa voko ra yena eribyeni lero nonon'hwa, U phema tintshava hi timitsu ta tona.

¹⁰U cela mikovotlo emaribyeni, Kutani tihlo ra yena ri vona swilo hinkwaswo leswi tengeke.

¹¹U sivela mati lama pfutaka ya milambu, U humesela eku vonakaleni leswi fihliweke.

¹²“Kambe vutlhari, byi kumiwa kwihi? Ku twisisa, ku tshamele tlhelo rihi?

¹³Munhu a nga ka a nga ringanisi risima ra byona; A byi kumiwi emisaveni ya lava hanyaka.

¹⁴Xidziva xi ku: ‘A byi kona ka mina’; Kutani lwandle ri ku: ‘A ndzi na byona.’

¹⁵Nsuku lowu tengeke wu nga ka wu nga byi xavi, Ni ntsopfu, wu nga ka wu nga pimeriwi nxavo wa byona;

¹⁶Nsuku wa Ofiri wu nga ka wu nga pimiwi na byona exikalweni, Hambi yi ri onikisi ya risima, ni safiri;

¹⁷Nsuku ni nghilazi, a swi xaxameri na byona, Byi nga ka byi nga xaviwi hi swibya swa nsuku lowunene.

¹⁸Korale ni kristala swi nga ka swi nga vuriwi eka byona: Kutani vutlhari byi tlula ngopfu tiperela;

¹⁹Topazi ya Etiyopiya a yi ringani na byona, Ni nsuku lowo tenga wu nga ka wu nga ngheni exikalweni na byona.

²⁰Loko swi ri tano, vutlhari byi huma kwihi-ke? Ni ku twisisa ku akile tlhelo rihi-ke?

²¹Byi fihleriwe mahlo ya hinkwavo lava hanyaka, Byi fihleriwe tinyanyana ta le tilweni.

²²Khele ni rifu swi te: ‘Hi twile mpfumawulo wa byona hi tindleve.’

²³“Hi xona Xikwembu lexi tivaka tindlela ta byona. Xi tiva laha byi tshamaka kona;

²⁴Hikuva xi vona ku fikela makumu ya misava, Xi languta hinkwaswo swa le hansi ka tilo.

²⁵Siku xi nyikaka moya ku tika ka wona, Ni loko xi pima mati hi mpimo,

²⁶Siku xi byelaka mpfula milawu, Ni ndlati leyi pfumaka, endlela ya yona,

²⁷Enkarhini wolowo xi byi vona, xi byi hlaya, Xi byi tiyisa, ni ku byi ringa.

²⁸Kutani xi ku eka munhu: ‘Vona, xichavo xa Hosi, hi byona vutlhari; Ku papalata swo biha, hi kona ku twisisa.’ ”