Read Xitsonga Job 3 Bible Online

Job 3 - Xitsonga bible

Job 3

¹Endzhaku ka sweswo, Yobo a ahlamisa nomu wa yena, a rhukana siku ra ku velekiwa ka yena.

²Yobo a vulavula, a ku:

³“A ku love siku leri ndzi nga velekiwa ha rona, Ni vusiku lebyi va nga te: ‘N'wana u humele.’

⁴Siku rolero a ri hundzuke munyama, Xikwembu xi nga ri tsetseleli xi ri etilweni, Ku vonakala ku nga ri voningi!

⁵A ri laviwe hi munyama ni mindzhuti ya rifu, Mapapa a ma ri funengete, A ri chavisiwe hi leswi nyamisaka dyambu!

⁶Vusiku byebyo! A byi phorhiwe hi munyama, Byi nga tsaki exikarhi ka masiku ya lembe, Byi nga hlayiwi entsengweni wa masiku ya tin'hweti!

⁷Vusiku byebyo a byi nyumbe, Ku tsaka a ku pfumaleke eka byona!

⁸A byi rhukaniwe hi lava rhukanaka masiku, Lava nga ni vutlhari byo pfuxa Levhiyatani!

⁹Tinyeleti ta vupeladyambu bya byona a ti nyamisiwe; A byi langutele ku vonakala, mahala, byi nga ku voni, Byi nga voni tin'hwembeti ta vurhonga!

¹⁰Hikuva a byi pfalangi khwiri leri ndzi humeke eka rona, A byi fihlanga ku vaviseka emahlweni ka mina.

¹¹“A ndzi fanga ha yini ndza ha ri ekhwirini ra manana? Kumbe a ndzi lahlekanga ha yini ndza ha huma enyimbeni ya yena?

¹²Ndzi kumele yini matsolo ya ku ndzi vukarhela xana? Ni mavele ya ku ndzi an'wisa?

¹³Hikuva sweswi, ingi ndzi te nhavalala, ndzi timiyelele; Ingi ndzi etlele, ndzi wisa na mina,

¹⁴Ndzi ri ni tihosi ni vakulukumba va misava, Lava tiakeleke masirha

¹⁵Ni tihosana leti fuweke nsuku, Lava tateke tindlu ta vona hi silivhere.

¹⁶Kumbe a ndzi ta fana ni mhondlwana leyi yimberiweke, Ndzi kotisa vana lava nga vonangiki ku vonakala.

¹⁷Kona lavo biha va tshika ku pfilunganya, Ku wisa kona lava heleriweke hi matimba.

¹⁸Lava bohiweke hinkwavo va hlangana kona hi ku tsaka, A va ha twi rito ra muxanisi.

¹⁹Lavatsongo ni lavakulukumba va hlangana kona, Ni nandza u tshunxekile eka n'wini wa yena.

²⁰“Lowa khombo u nyikiwa ku vonakala ha yini-ke? Ni vutomi byi nyikiwa lava nga ni mbitsi etimbilwini ha yini-ke?

²¹Va nga lava langutelaka rifu, kambe a ri fiki; Ni lava ri navelaka ku tlula xuma lexi fihliweke.

²²A va ta tsaka hi ku tsaka loku tlurisaka, Va nyarhula loko ngi va kuma sirha?

²³Ndzi vula munhu la lahlekeriweke hi ndlela ya yena, Loyi Xikwembu xi n'wi sivelaka hinkwako:

²⁴Hikuva vuswa bya mina i mbitsi yanga, Ku kolola ka mina ku khuluka kukota makhukhumba.

²⁵Hikuva ku chavisa loku ndzi ku chavaka ku ndzi tele, Leswi ndzi swi tshukaka hi leswi ndzi humelelaka.

²⁶Loko ndzi nga si kuma nkarhi wa ku rhula ni ku wisa, Ku xaniseka lokuntshwa ku ndzi tela ehenhla.”