Read Xitsonga Job 31 Bible Online

Job 31 - Xitsonga bible

Job 31

¹“A ndzi endla xinakulobye ni mahlo ya mina, Leswaku ndzi nga tshuki ndzi languta wanhwana.

²Kambe a ndzi ta vona ku averiwa loku yini eka Xikwembu ehenhla xana? A ndzi ta vona ndzhaka leyo yini ehenhla, eka Lowa matimba hinkwawo?

³Ku onhaka, a hi ka mudyohi xana? Ni makhombo a hi ya vatirhi va leswo homboloka xana?

⁴Xikwembu a xi vonanga tindlela ta mina-ke? Xana a xi hlayanga vukandziyo bya mina hinkwabyo?

⁵“Loko ndzi tshama ndzi famba hi vunwa, Ni loko nenge wa mina wu hatlisile ku kanganyisa,

⁶Xikwembu a xi ndzi veke exikalweni lexo lulama, Xi ta kuma leswaku ndzi hava nandzu!

⁷Loko nkondzo wa mina wu hambukile ndlela, Kumbe mbilu ya mina yi landzelele mahlo ya mina, Ni loko xivati xi namarhele emavokweni ya mina,

⁸Loko swi ri tano, ndza ha rima, un'wana u ta dya, Vusimekelo bya mina a byi tsuvuriwe!

⁹“Loko mbilu ya mina yi kanganyisiwe hi wansati, Kumbe ndzi tshama enyangweni ya loyi ndzi akeke na yena ku n'wi etlela,

¹⁰Loko swi ri tano, nsati wa mina a a silele van'wana, A a nyiketiwe nuna un'wana!

¹¹Hikuva lexo, i ku dyoha lokukulu, I ku biha loku fanelaka hi ku biwa hi vaavanyisi;

¹²Kunene i ndzilo lowu hisaka ku fika etiheleni, A wu faneli ku heta rifuwo ra mina hinkwaro.

¹³“Loko ndzi arile ku yingisa nandza wa mina wa xinuna kumbe wa xisati, Siku va kanetanaka na mina,

¹⁴Ndzi to yini loko Xikwembu xi lo ndzi pfukela xana? Ni loko xi vutisisa timhaka, ndzi to yini ka xona-ke?

¹⁵La ndzi vumbeke ekhwirini, na vona u va vumbile, Xana a hi xona lexi hi humeseke ekhwirini ra wansati-ke?

¹⁶“Loko ndzi arile xikhongelo xa xisiwana, Ndzi va ndzi languta wansati wa noni a kondza a karhala mahlo,

¹⁷Loko ndzi dyile vuswa bya mina ndzi ri swanga, Ndzi nga phemelangi xisiwana?

¹⁸Kasi loko ndza ha ri lo ntshwa, swi kurile ka mina, Ndzi va ka swona kukotisa tatana. Ndzi fambisile nsati wa noni mpfhuka ndzi huma ekhwirini ra manana.

¹⁹Loko ndzi vona un'wana a lova hi ku pfumala tinguvu, Kumbe xisiwana xi pfumala xifunengelo,

²⁰Loko swifungha swa vona swi nga ndzi katekisanga, Va nga kufumelanga hi voya bya tinyimpfu ta mina,

²¹Loko voko ra mina ri tshama ri phakata xisiwana, Hikuva ingi ndzi kume ku yimeriwa ehubyeni;

²²Loko swi ri tano, khatla ra mina a ri huma emahlanganweni ya rona, Voko ra mina a ri we, ri tshoveka!

²³Hikuva ku rihisa ka Xikwembu ka ndzi chavisa, Ndzi tsandzeka ku yima emahlweni ka ku tlakuka ka xona.

²⁴“Loko ndzi endlile nsuku ku tshemba ka mina, Ndzi ku eka nsuku lowunene: Ku dzuna ka mina ku le ka wena.

²⁵Loko ndzi tsakele vukulu bya rifuwo ra mina. Ni leswo tala leswi ndzi hlengeleteke hi voko ra mina,

²⁶Loko ndzi langutile dyambu loko ri kwetsima, Kumbe n'weti loko wu famba eku vonakaleni ka wona.

²⁷Loko mbilu yanga yi hluriwa exihundleni, Ni loko ndzi yisile voko enon'wini wa mina ku khensa;

²⁸Na kona i ku dyoha loku fanelaka ku biwa hi muavanyisi. Hikuva ingi ndzi landzurile Xikwembu xa le henhla.

²⁹“Loko ndzi tsakele ku onhaka ka nala wa mina, Ndzi khanerile siku khombo ri n'wi weleke ehenhla;

³⁰Kasi a ndzi pfumelanga malaka ya mina ku hleva, Ni ku kombela vutomi bya yena eku rhukaneni.

³¹Vanhu va ntsonga wa mina a va vulanga, va ku: ‘U kwihi la nga ka a nga xurhi hi tinyama ta swifuwo swa yena?’

³²Muendzi a nga tshamanga nivusiku ehandle, A ndzi tshama ndzi pfulela mufambi nyangwa ya mina.

³³Loko ndzi funengetile ku homboloka ka mina kukota Adamu, Ndzi va ndzi fihla milandzu ya mina exifuveni xa mina,

³⁴Hi ku chava vunyingi bya vanhu, Hikuva xisandzu xa tinxaka a xi ndzi chavisa, Ndzi tshama exihundleni ndzi nga humi enyangweni ya mina.

³⁵Loko ngi a ri kona la ndzi yingisaka! Vonani, ku tiyisiwa ka mina hi kuloku: ‘Lowa matimba a a ndzi hlamule! Loko a ndzi ri ni mhaka ya ku kanela ingi yi tsariwe hi la ndzi lwisaka!’

³⁶A ndzi ta yi rhwala ekhatleni ra mina, Kumbe ndzi yi boha emombyeni kukota musingasoro;

³⁷A ndzi ta n'wi hlayela mikondzo ya mina hinkwayo, Ndzi n'wi tshinelela kukotisa loko ngi a ri hosi.

³⁸“Loko ngi nsimu ya mina ya ndzi hehla, Ni loko tindzima ta yona ti humesa mihloti;

³⁹Loko ndzi dyile mavele ya yona ndzi nga yi xavanga, Ndzi vavisa timbilu ta vini va yona va khale;

⁴⁰A ku mile mitwa ematshan'weni ya koro, Ni rihunga, ematshan'weni ya barley!” Ku hela ka marito ya Yobo.