Read Xitsonga Job 32 Bible Online

Job 32 - Xitsonga bible

Job 32

¹Kutani vavanuna lavanharhu va tshika ku vulavula na Yobo, hikuva a ha tivula la lulameke.

²Kavaloko ku pfurha vukari bya Elihu, n'wana Barakele wa Buzi, wa yindlu ya Rhamu. Vukari bya yena byi pfurhela Yobo hikuva a a tivekile la lulameke emahlweni ka Xikwembu.

³Vukari bya yena byi pfurhela ni vanakulobye lavanharhu hikuva a va pfumarile swo hlamula, hambiswiritano, a va kaneta Yobo.

⁴Kambe Elihu a a hlwerile ku hlamula Yobo, hikuva a va n'wi tlula hi malembe.

⁵Kakuloko Elihu a vona leswaku a nga hlamuriwanga hi milomu ya vavanuna lavanharhu, a kariha ngopfu!

⁶Kutani Elihu n'wana Barakele wa Buzi, a hlamula, a ku: “Ndzi xihlangi hi malembe, kambe n'wina mi vakulu; Hikwalaho ndzi tlherile, ndzi chava Ku vula miehleketo ya mina emahlweni ka n'wina.

⁷A ndzi ku: ‘Masiku ma ta vulavula, Malembe ya ku tala ma ta hi byela vutlhari.’

⁸Kambe i moya lowu nga ka munhu, Ni ku huhutela ka Lowa matimba hinkwawo leswi nyikaka ku twisisa;

⁹A hi malembe layo tala lama tlharihisaka, Lavakulu a va twisisi leswo lulama hi masiku.

¹⁰Hikwalaho ndzi nge: ‘Yingisa: Na mina, ndzi rhandza ku vula ku anakanya ka mina.’

¹¹A ndzi langutela ku hela ka marito ya n'wina, A ndzi yingisela ku hlamula ka n'wina hi ndleve, Mi ko mi heta ku hlamula;

¹²Ndzi yingisile, ndzi mi xiya swinene, Kambe a ku na un'we la hlamuleke Yobo, A ku na un'we wa n'wina la kaneteke marito ya yena.

¹³Hambiswiritano, mi nga tshuki mi ku: ‘Hi kumile vutlhari; Xikwembu ntsena xi nga n'wi hlula, a nga ri munhu.’

¹⁴Kambe a nga tisangi marito eka mina, Hikwalaho ndzi ta n'wi hlamula hi marito lama nga faniki ni ya n'wina.

¹⁵“Va chava, a va ha hlamuli! Va lahlekele hi marito.

¹⁶Ndzi langutele ku miyela ka vona, Loko va yimile va nga ha hlamuli.

¹⁷Ndzi ta hlamula, na mina, enkarhini wa mina, Ndzi ta humesa, na mina, leswi ndzi swi tivaka.

¹⁸Hikuva ndzi xurhile timhaka, Moya wu kona eka mina lowu ndzi kucetelaka.

¹⁹Mapfalo ya mina ma kotisa vhinyo leyi nga pfuriwangiki, Kukota swikutsu leswintshwa leswi handzukaka.

²⁰Ndzi rhandza ku vulavula, ndzi ta tiva ku hefemula, Ndzi ta ahlamisa nomu wa mina, ndzi hlamula,

²¹Kambe a ndzi nga languti nghohe ya munhu, A ndzi nga heti munhu,

²²Hikuva a ndzi tivi ku lwisa, Muvumbi wa mina a nga hatlisa ku ndzi susa.