Read Xitsonga Job 37 Bible Online

Job 37 - Xitsonga bible

Job 37

¹“Kunene mbilu ya mina yi tshukile; Yi khindlimuka yi huma ematshan'weni ya yona.

²Yingisani ku pfuma ka rito ra xona, Ni mpfumawulo lowu humaka enon'wini wa xona!

³Wu twakala hinkwako empfhukeni wa le tilweni, Tindlati ta xona ti ya fika emakun'wini ya misava.

⁴Kutani rito ra xona ri pfuma, xi ri pfumisa hi vukulu bya xona; Kambe a xi pfali tindlati loko rito ra xona ri twakala.

⁵Hi rito ra xona Xikwembu xi pfuma hi mukhuva lowu hlamarisaka, Xi endla swilo leswikulu leswi hi tsandzekaka ku swi twisisa.

⁶Xi ku eka gamboko: ‘Nela emisaveni,’ Xi vurisa sweswo eka mpfula, ni ka makhukhumba lamakulu.

⁷Kavaloko xi fungha mavoko ya vanhu hinkwavo, Leswaku vanhu hinkwavo lava xi va vumbeke va xi tivisisa.

⁸Swivandzana swi kokovela emabakweni ya swona, Swi tshama emiceleni ya swona.

⁹Xihuhuri xi huma edzongeni, Moya lowu pfaka en'walungwini wu tisa xirhami.

¹⁰Hi ku huhutela ka Xikwembu ku huma gamboko, Ni mati yo khuluka ma tiya hi xirhami.

¹¹Kambe xi rhwexa mapapa hi mati, Xi tsutsumisa mapapa, ma rhwele ndlati ya xona.

¹²Ma tihundzuluxa hinkwako laha ma byeriwaka kona, Ma tirha hinkwaswo hi laha ma lerisiweke hakona Erivaleni ra misava leyi akiweke hi vanhu;

¹³Yi nga va nhonga leyi xi baka misava ha yona, Kumbe xi nga humesa ha wona ku kateka ka xona.

¹⁴“Wee Yobo, yingisa mhaka leyi hi tindleve; Yima la, u tsundzuka masingita ya Xikwembu.

¹⁵Xana u tiva hi laha Xikwembu xi ma kaneleke hakona? Ni laha xi hatimisaka rihati epapeni ra xona?

¹⁶Xana wa twisisa ntshamelo ya mapapa? Ni masingita ya la hetisekeke hi vutlhari?

¹⁷Swiambalo swa wena swi kufumela ha yini, Loko misava yi rhula emhehweni ya le dzongeni?

¹⁸Xana u nga tiva ku andlala xibakabaka xa le tilweni kukotisa yena, U xi tiyisa kukota xivonivoni xa nsimbhi leyi chuluriweke?

¹⁹Hi dyondzise lexi hi nga n'wi byelaka xona; Hikuva munyama wa hina wu hi sivela ni ku vula mhaka na yin'we.

²⁰I mani la nga yisaka eka xona marito ya mina? Kumbe i mani la navelaka ku mitiwa?

²¹“Kasi munhu wa tsandzeka ku languta dyambu Loko ri hatima empfhukeni wa le tilweni, Loko mheho yi hundzile yi wu kukurile.

²²Ku hatima loku nga ka nsuku ku huma en'walungwini; Xikwembu xi rhendzeriwa hi ku kwetsima loku chavisaka.

²³Hi nga ka hi nga tshineli Lowa matimba hinkwawo, U tlakukile hi matimba, ni ku twisisa, ni ku lulama hinkwako, A nga hlamuli nchumu.

²⁴Hikwalaho, vanhu va fanele ku chava Xikwembu; A xi languti la tshembaka vutlhari bya yena.”