Read Xitsonga Job 38 Bible Online

Job 38 - Xitsonga bible

Job 38

¹Kutani Yehovha a hlamula Yobo, a ri exidzedzeni, a ku:

²“La nyamisaka makungu ya mina Hi marito lama kalaka ku twisisa, i mani xana?

³Sweswi, tibohe xisuti kukota wanuna; Ndzi ta ku vutisa, u ta ndzi dyondzisa!

⁴“A wu ri kwihi siku ndzi akeke masungulo ya misava? Vulavula loko u ri ku twisisa.

⁵I mani la vekeke mpimo wa yona, wa n'wi tiva xana? Kumbe i mani la yi ringanyeteke hi ngoti?

⁶Masungulo ya timhandze ta yona ma celeleke eka yini? Kumbe i mani la vekeke ribye ra yinhla ra yona?

⁷Siku tinyeleti ta vuxa ti baka huwa yo tsaka, Ni vana hinkwavo va Xikwembu va yimbelelaka hi ku tsakisisa?

⁸“I mani la pfaleleke lwandle hi timbanti, Siku ri humaka hi matimba ekhwirini ra mana wa rona?

⁹Loko ndzi ri nyika mapapa ti va tinguvu ta rona, Ni hunguva ya ntima ku tifunengeta ha yona?

¹⁰Ndzi va ndzi ri vekela mindzilekana ya rona, Ndzi tiyisa timbanti ni swipfalo swa rona.

¹¹Ndzi ri: ‘U ta fika kwala, a ku na ku hundzela emahlweni, Ku kukumuka ka magandlati ya wena ku ta helela kwala’?

¹²“Mpfhuka u tumbuluka, u tshama u byela mixo ku humelela xana? Kumbe u byerile vurhonga laha byi nga ta tshama kona,

¹³Leswaku byi khoma makumu ya misava, Byi va byi hangalasa timbabva ta yona?

¹⁴Misava yi hundzuka hi nghohe kukotisa vumba loko byi kandziyisiwa hi fungho. Eswilweni hinkwaswo, ku vonaka swiambalo leswo saseka.

¹⁵Kambe ku vonakala ka timbabva ku susiwa eka vona, Ni voko leri tshambulukeke ra tshoveka.

¹⁶“Xana u fikile emakun'weni ya lwandle? U ya valanga eku enteni ka xidziva xana?

¹⁷Xana tinyangwa ta rifu ti tikombisile eka wena-ke? Xana u vonile tinyangwa ta ndzhuti wa rifu?

¹⁸Xana u kambile hi mahlo ku anama ka misava xana? Vulavula, loko u tiva sweswo hinkwaswo!

¹⁹“Yi kwihi ndlela leyi yaka endlwini ya ku vonakala? Ni munyama, wu ake kwihi xana?

²⁰Xana u ta wu lava endzilakaneni wa wona, U ta tiva ni tindlela leti yaka endlwini ya wona-ke?

²¹Wa swi tiva, hikuva a u velekiwile, Ku hlaya ka masiku ya wena kukulu ngopfu!

²²“Xana u fikele evuhlayiselweni bya gamboko? Xana u vonile laha xihangu xi hlayisiwaka kona-ke?

²³Lexi ndzi xi vekeleke siku ra ku onhaka, Ni siku ra ku huma nyimpi ni ra ku lwa?

²⁴Ndlela hi yihi, leyi ku vonakala ku avanyisiwaka eka yona, Laha mheho ya le vuxeni yi humaka kona ku hungela misava-ke?

²⁵“I mani la endleke tinyangwa leti haxaka timpfula, Ni ndlela ya tindlati ni ku pfuma,

²⁶Ku nisa mpfula emisaveni leyi nga akiwangiki, Ni mananga, laha ku nga akangiki munhu!

²⁷Ku nwisela mananga laha ku nga riki na nchumu, Ni ku mirisa byanyi bya rilambyana?

²⁸“Xana mpfula yi ni tatana wa yona-ke? Kumbe mathonsi ya mberha ma vekiwile hi mani xana?

²⁹Xirhami xi huma emarhumbyini ya mani-ke? I mani la velekeke gamboko ya le mpfhukeni xana?

³⁰Loko mati ma tiyile, ma nonon'hwa kukota ribye, Ni loko mati ya rivala ra xidziva ma bohiwe swinene?

³¹“Wa swi kota ku boha Xirimela hi pindza xana? Kumbe u ni matimba ya ku tshunxa tinghole ta Nhlahle?

³²Xana u nga humesa swikombiso swa le tilweni enkarhini wa swona? Kumbe hi wena la fambisaka Gongomela ni vana va yona?

³³Xana wa yi tiva milawu ya le tilweni. Ni mitirho ya yona emisaveni xana?

³⁴“Xana u nga huwelela eka mapapa hi rito ra wena, Leswaku ma funengeta hi maboboma ya mpfula?

³⁵Xana u nga rhuma tindlati, ti famba, Ti ku eka wena: ‘Hi hina valava’?

³⁶I mani la vekeke vutlhari embilwini ya munhu-ke? I mani la nyikeke moya wa yena ku twisisa xana?

³⁷I mani la kumeke ntsengo wa mapapa hi vutlhari? I mani la chelaka makhuwana ya le tilweni,

³⁸Leswaku ntshuri wu va wu hlangana, Ni leswaku mabuwu ya misava ma namarhelana?

³⁹“Xana u nga dlayela ntswele ya nghala xiharhi, U nga xurhisa ndlala ya swinghalana xana?

⁴⁰Loko ti etlela etindhawini ta tona, Ni loko ti bvutamile exihlahleni?

⁴¹I mani la tsetselelaka wukuwuku hi swakudya swa rona? Loko mavondlo ya rona ma huwelela eka Xikwembu, Loko ma solovanya hala ni hala hi ku twa ndlala?