Read Xitsonga Job 39 Bible Online

Job 39 - Xitsonga bible

Job 39

¹“Xana u tiva nkarhi wa ku veleka ka timbavala, Xana u tsundzukile tinhlangu loko ti tswala-ke?

²Xana u hlayile tin'hweti ta ku tika ka tona, Ni nkarhi wa ku veleka ka tona-ke?

³Ti khinsama ku tswala swirhodyana swa tona, Ti phumunha ku vaviseka ka tona.

⁴Marhole ya tona ma tiyela, ma kulela enhoveni, Ma suka, ma nga vuyeri eka tona.

⁵“I mani la tshunxeke mbhongolo ya nhova, La tshunxeke mapindza ya mangwa ya nhova-ke?

⁶Ndzi yi nyikile mananga ku va vutshamo bya yona, Ni rivala ra munyu, byi va vuako bya yona.

⁷Yi hleka pongo ra miti, Rito ra muchayeri a ri fiki etindleveni ta yona.

⁸Yi rhendzeleka etintshaveni yi lava swakudya swa yona, Yi tilavela hinkwaswo swa rihlaza.

⁹“Xana nyarhi yi ta pfumela ku ku tirhela? Kumbe xana yi ta etlela ekusuhi ni tshanga ra wena-ke?

¹⁰Xana u nga bohelela nyarhi exikon'wini hi ngole? Kumbe yi nga bela mabuwu, yi ku landzelela emikoveni xana?

¹¹Xana u nga yi tshemba leswi yi nga ni matimba lamakulu? Kumbe u ta yi lerisa mitirho ya wena-ke?

¹²Xana u ta yi tshemba leswaku yi tleketlela mavele ya wena ekaya? Yi ma hlengeleta exivuyeni xa wena xana?

¹³“Yimbhu yi tlakusa timpapa yi tsakile, Kambe a hi timpapa na tinsiva ta gumba;

¹⁴Hikuva yimbhu yi sukela mandza ya yona ehansi, Ma alamiwa hi ntshuri wa misava;

¹⁵Yi rivele leswaku ma nga kandziyiwa hi masondzo, Ni ku onhiwa hi swivandzana swa nhova.

¹⁶Yi karihela mavondlo ya yona kukota loko ma nga ri ya yona; Yi lo tshikela ntsena, a yi tsawuki nchumu;

¹⁷Hikuva Xikwembu xi yi tsonile vutlhari, A xi yi nyikanga ku twisisa.

¹⁸Hi nkarhi lowo yi pfukaka, yi kuputela timpapa ta yona, Yi hleka hanci ni mukhandziyi wa yona.

¹⁹“Xana hi wena la nyikeke hanci matimba ya yona? Ni ku bombisa nhamu ya yona hi ntshiva lowu tshukatshukaka?

²⁰Xana u nga yi tlurisa kukota njiya? Mampfarhampfarha ya tinhompfu ta yona ma chavisa.

²¹Yi cela misava ehansi, yi titsakela hi matimba ya yona; Yi huma ku ya hlangana ni matlhari;

²²Yi hleka vutoya a yi chavi nchumu, A yi hambukeli matlhari.

²³Ehenhla ka yona yi ketlaketla miseve enkotlotweni, Ku kwetsima malangavi ya mafumu ni ntlhuvana.

²⁴Yi pfurha ndzilo, yi kwendzula misava, Yi nga ka yi nga siveriwi loko nanga yi yimba.

²⁵Loko yi twa mpfumawulo wa yona yi ku: ‘AhÃ¡Ã !’ Loko ya ha ri ekule yi nun'hwetela nyimpi, Ni rito ra tindhuna, ni nkosi wa nyimpi.

²⁶“Xana koti ri haha hi ku endla ka ku twisisa ka wena? Ri tlakusela tlhelo ra dzonga timpapa ta rona xana?

²⁷Xana i ku lerisa ka wena loko gama ri tlhandluka, Ri ya aka xisaka xa rona emaninginingini xana?

²⁸Ri tshama emaribyeni, ri tiakela kona, Etinhleni ta maribye, ni le tinhlohlorhini ta tintshava?

²⁹Loko ri ri kona ri rhalarhala swakudya swa rona, Mahlo ya rona ma langutisa ekule.

³⁰Mavondlo ya rona ma tian'wela ngati; Laha mitsumbu yi nga kona, na rona ri kona.”