Read Xitsonga Job 41 Bible Online

Job 41 - Xitsonga bible

Job 41

¹“Xana u nga phasa ngwenya hi xinjovo? U nga boha ririmi ra yona hi ngole-ke?

²U nga nghenisa muhalo etinhompfini ta yona? U yi boxa rihlaya ku nghenisa sindza xana?

³Xana yi ta ku khongela ngopfu, Kumbe yi ta vulavula na wena hi marito ya ku nandziha-ke?

⁴Xana yi ta tiboha eka wena, Leswaku yi ta ku tirhela hi masiku xana?

⁵Xana u ta tlanga na yona kukotisa nyanyana, U yi kuleka ku tlangisa vana va wena xana?

⁶Xana vanhu va ta hlangana ku bindzula ha yona? Va nga pambulelana ni vaxavi xana?

⁷Xana u nga funengeta dzovo ra yona hi matlhari? Ni nhloko ya yona hi miseve ya vaphasi xana?

⁸Yisa voko ra wena ehenhla ka yona, Kutani u nga ha tlheli u anakanya ku yi pfuka.

⁹Ku langutela ka loyi a yi pfukaka ku hela kan'we, Wa hela mbilu loyi a yi langutaka.

¹⁰A ku na nhenha leyi nga tiyaka mbilu ku yi pfuxa, Kambe i mani la nga yimaka emahlweni ka mina?

¹¹I mani loyi ndzi nga ni nandzu ka yena, ndzi ta n'wi rihela, Ehansi ka tilo, hinkwaswo i swa mina!

¹²“Ndzi rhandza kambe ku vula ta swirho swa yona, Ni ta matimba ya yona, ni vumbhurhi bya xivumbeko xa yona.

¹³I mani la nga ta funungula nguvu ya yona? Ni ku nghena exikarhi ka tinhlaya ta yona?

¹⁴I mani la nga pfulaka tinyangwa ta nomu wa yona? Ku chavisa ku le menweni ya yona!

¹⁵A hi ku saseka ka tinxaxa ta switlhangu swa yona! Swi xaxamelana, swi tiyisiwa swin'we,

¹⁶Xin'wana xi namarhelana xin'wana, Moya wu nga ka wu nga ngheni emilotini ya swona.

¹⁷Swi namarhelana, swi mumakanile, Swi nga ka swi nga namuriwi.

¹⁸Ku entshemula ka yona ku humesa ku vonakala, Ni mahlo ya yona ma kotisa tin'hwembeti ta vurhonga.

¹⁹Swisa swi huma enon'wini wa yona, Ni tinhlahle ta ndzilo ti baleka kona.

²⁰Musi wu huma etinhompfini ta yona, Kukotisa musi lowu humaka embiteni leyi vilaka.

²¹Ku huhuta ka yona ku nga hisa makala, Malangavi ma huma enon'wini wa yona.

²²Matimba ma tiakele enhan'wini ya yona, Kutani ku chava ku famba emahlweni ka yona.

²³Misiha ya nyama ya yona yi hlangene swin'we, Yi chuluriwe ehenhla ka yona, a yi tsekatseki.

²⁴Nyama ya mbilu ya yona yi nonon'hwa kukota ribye, Yi kotisa tamba ra le hansi ka xisilelo.

²⁵Loko yi pfuka, va matimba va tshuka, Ku chava ka vona ku va tsutsumisa.

²⁶Hambi u yi tlhava hi tlhari, a ri ngheni, A yi vuri nchumu hi nseve ni tlhuvana, ni xisirhelo xa xifuva.

²⁷Eka yona, nhumbu yi kotisa byanyi, Ni koporo, yi kota rikunyi leri boleke.

²⁸N'wana wa vurha a nga yi chavisi; Maribye ya xipelupelu ma fana ni mungu eka yona.

²⁹Yi languta xigombo kukota rihlanga, Yi hleka ku ntswiririka ka matlhari.

³⁰Khwiri ra yona ri tlhomiwe hi swirhengele leswi tlhavaka; Endzopeni, yi endla ndlela kukotisa xileyi.

³¹Yi pfindlusa xidziva, ingi i mbita yo vila; Yi phyaphyarhisa lwandle kukota khuwana leri teleke mirhi ya risuna.

³²Mitila ya yona i ndlela leyi vangamaka. Lwandle ri fana ni misisi ya timpfu.

³³A yi na n'wini wa yona la emisaveni; Yi endliwile yi pfumala nchavo.

³⁴A yi chavi ku languta leswi tlakukeke hinkwaswo, I hosi ya swiharhi hinkwaswo swa matimba.”