Read Xitsonga Job 5 Bible Online

Job 5 - Xitsonga bible

Job 5

¹“Huwelela sweswi! Xana un'wana u kona la nga ta ku hlamulela? Kutani hi wihi wa vakwetsimi la nga ta hundzukela eka wena xana?

²Kasi vukari byi dlaya wa rihuhu, Ni xihunguki xi dlayiwa hi mona.

³Ndzi vonile xihunguki xi mirile rimitsu, Kutani hi nomu lowu, ndzi vona yindlu ya xona yi rhuketeriwa;

⁴Vana va xona a va na ku titsakela, Va kandziyeriwa etihubyeni, va nga lamuleriwi.

⁵La nga ni ndlala a ya dya ku tshovela ka xona, A ya vutla ni le xikarhi ka mitwa;

⁶Kambe makhamba ma mita rifuwo ra xona. Ntsena khombo a ri humi entshurini, Na wona nhlomulo a wu hluki emisaveni;

⁷Kambe munhu u tswaleriwe gome, Kukotisa tinhlahle ku haha.

⁸“Loko ndzi ri mina, a ndzi ta tshinela eka Xikwembu, Ndzi veka eka Xikwembu timhaka ta mina.

⁹Xi nga xona lexi endlaka swilo leswikulu swonghasi, leswi nga kambekiki, Ni mahlori lama nga hlayekiki?

¹⁰U chulula mpfula emisaveni, U chelela mati emasin'wini.

¹¹U tshamisisa vanhu lava tsongahaleke endhawini leyi tlakukeke, Lava rilaka va pfuka va hlayisekile.

¹²U hangalasa makungu ya vanhu va mano, Leswaku mavoko ya vona ma nga ka ma nga endli nchumu.

¹³U phasa tinthari hi mano ya tona, Makungu ya valunya wa ma hangalasa;

¹⁴Nimixo, va banana ni munyama, Ninhlekanhi, va hulumeta kukotisa loko byi ri vusiku.

¹⁵Lowa khombo, u n'wi tshunxisa sweswo eka fumu ra nomu wa vona, Ni le vokweni ra lowa matimba;

¹⁶Ku tshemba ku ta tlhelela eka loyi a tsaneke, Kasi ku homboloka ku siviwa milomu.

¹⁷“Vonani, ku katekile munhu loyi Xikwembu xi n'wi layaka! U nga soli nkhavi wa la nga ni matimba hinkwawo,

¹⁸Hikuva wa tlhava, kambe a tlhela a bohelela timbanga, Wa tshova, kutani mavoko ya yena ma horisa.

¹⁹Emakhombyeni ya ntlhanu na rin'we u ta ku kutsula, Ni ka laya ntlhanu na mambirhi, a ku na swo biha leswi nga ku khumbaka.

²⁰Etindlaleni u ta ku hlayisa, u nga tshuki u fa, Etinyimpini u ta ku hlayisa, u nga tlhaviwi hi fumu.

²¹U ta sirheliwa eku biweni ka ririmi, U nga ka u nga chavi ku onhaka loko ku fikile.

²²U ta hleka ku onhaka ni ndlala, U nga chavi swivandzana swa nhova,

²³Hikuva u ta endla xinakulobye ni maribye ya nhova, Kambe swivandzana swa nhova swi ta rhula na wena.

²⁴U ta kuma ku rhula entsongeni wa wena, U ta kamba matshanga ya wena kutani u nga pfumali nchumu.

²⁵U ta kuma leswaku nyimba ya wena ya engeteleka, Ni leswaku vatukulu va wena va ta tala ku fana ni byanyi bya nhova.

²⁶U ta rhelela esirheni ra wena eku dyuhaleni lokunene, Kukota nyandza ya koro loko yi susiwa hi nkarhi wa yona.

²⁷Vona, hi teto hi ti laviseke, ti tshamisise sweswo, U ti yingisisa, u ti veka exifuveni.”