Read Xitsonga Job 6 Bible Online

Job 6 - Xitsonga bible

Job 6

¹Kutani Yobo a hlamula, a ku:

²“Loko swange ku ringanisiwa ku vaviseka ka mina, Ni loko makhombo ya mina, na wona, ma nga vekiwa exikalweni!

³A swi ta tlula sava ra lwandle hi ku tika, Hikwalaho marito ya mina ma hungukile!

⁴Miseve ya lowa matimba yi ndzi tlhavile, Mbilu ya mina yi nwile vuxungu bya yona; Michavo ya Xikwembu yi sisimukile ku ndzi lwisa.

⁵Xana mbhongolo ya nhova yi rila exinambyaneni? Kumbe homu yi nga bonga ebyanyini lebyi teleke xana?

⁶Leswi phyamaka swi nga dyiwa loko munyu wu nga ri kona xana? Ntsutsu wa tandza wa twakala xana?

⁷Leswi moya wa mina wu alaka ku swi khumba, Hi swona swakudya swa mina leswi ndzi nyenyetsaka.

⁸“Oho! Loko ingi ku kombela ka mina ku endleka, Ni loko Xikwembu xi ndzi nyika lexi ndzi xi languteleke!

⁹Loko Xikwembu xi nga pfumela ku ndzi pfurhakanya, Xi tshambuluta voko ra xona leswaku xi ndzi heta;

¹⁰Loko ngi swi tano, ngi ndzi ta va ni ku chavelela, Ni ku tsaka emakhombyeni lawa ndzi tikeriwaka ha wona, Hikuva a ndzi tlulanga ku lerisa ka Lowo kwetsima.

¹¹Matimba ya mina hi wahi leswaku ndzi va ni ku tshemba? Ku hela ka mina hi kwihi leswaku ndzi yingisela?

¹²Xana matimba ya mina i matimba ya ribye xana? Miri wa mina i wa nsimbhi xana?

¹³A ndzi ku, a ku na ku pfuniwa eka mina, Ku kutsuriwa ku tshinele ekule na mina xana?

¹⁴“Maxaka ya la vavisekaka ma fanele ku n'wi twela vusiwana, Hikuva a nga tshika ku chava Lowa matimba hinkwawo.

¹⁵Vamakwerhu va tele ku kanganyisa kukota boboma. Kukota mati ya xinambyana lama nyumbaka.

¹⁶Ma tiya hi xirhami, Ni gamboko ri tiwisela kona.

¹⁷Ma phya hi nkarhi wa mumu, Ma nyuka loko dyambu ri hisa.

¹⁸Mavandla ya vafambi ma tingatinga hi ndlela ya wona, Ma nghena emananga, ma lova kona.

¹⁹Mavandla ya Tema a ma kongomile kona, Vafambi va Xeba va tele hi ku tshemba.

²⁰Kutani va tela hi tingana hikwalaho ka ku tshemba ka vona; Loko va fikile kona va va ni gome.

²¹Swi tano na n'wina, mi herile, Mi vona khombo ra mina, kutani ma chava!

²²Xana ndzi te eka n'wina: ‘Ndzi heni, Ndzi humeseleni tinyiko hi rifuwo ra n'wina,’ xana?

²³Ndzi lamuleleni emavokweni ya nala, Ndzi kutsuleni emavokweni ya lavo biha!

²⁴“Ndzi dyondziseni, ndzi ta miyela, Ndzi hlamuseleni laha ndzi hoxeke.

²⁵Marito lamanene ma ni matimba swonghasi! Kambe ku tshinyiwa ka n'wina ku tshinyela yini xana?

²⁶Xana ku vulavula ka mina ma ku tshinya xana? Leswi timhaka ta la nga ni gome wu nga moya ntsena-ke?

²⁷Mi tikerisa xisiwana, Mi celela nakuloni marindzi.

²⁸Kambe mi nga ndzi langutisa! Ndzi nga ka ndzi nga mi hembeli emahlweni ka n'wina.

²⁹Tlhelani, mi nga hunguki; Tlhelani, mi vonisisa ku lulama ka mina.

³⁰Xana leswo homboloka swi kona ra mina; Malaka ya mina a ma tivi ku hlawula swo biha-ke?