Read Xitsonga Psalms 107 Bible Online

Psalms 107 - Xitsonga bible

Psalms 107

¹Dzunisani Yehovha, hikuva u lulamile, Hikuva tintswalo ta yena hi leti nga heriki.

²Vakutsuriwa va Yehovha, a va vurise sweswo, Lava a va poniseke emavokweni ya nala,

³A va vitaneke ematikweni hinkwawo, Evuxeni ni le vupeladyambu, en'walungwini ni le dzongeni!

⁴A va ri vatsendzeleki exikarhi ka mananga, Va nga kumi muti wa ku aka eka wona.

⁵Va twa ndlala ni torha, Mimoya ya vona yi titivala.

⁶Kambe va huwelela eka Yehovha emahlomulweni ya vona, Kutani a va londzovota eku tsandzekeni ka vona,

⁷A va fambisa hi ndlela leyi lulameke, A va fikisa emutini laha va nga ta aka kona.

⁸A va khense Yehovha hikwalaho ka vunene bya yena, Hikwalaho ka swihlamariso leswi a swi endlelaka vana va vanhu!

⁹Hikuva u korwisile moya lowu nga ni torha, U xurhisile moya lowu nga ni ndlala.

¹⁰Lava akeke emunyameni ni le ndzhutini wa rifu, Va bohiwile enhlomulweni ni le tinsimbhini,

¹¹Hikwalaho ka ku tiarisa ka vona etimhakeni ta Xikwembu, Loko va sandza ku tsundzuxa ka Muungameri wa le henhla,

¹²A tsongahata timbilu ta vona hi ku va vavisa, Va tikeriwa, va nga pfuniwi hi munhu.

¹³Kavaloko va huwelela eka Yehovha emapfalweni ya vona, Kutani a va ponisa eku tsandzekeni ka vona,

¹⁴A va humesa emunyameni ni le ndzhutini wa rifu, A tsema timpecana ta vona.

¹⁵A va khense Yehovha hikwalaho ka vunene bya yena. Hikwalaho ka swihlamariso leswi a swi endlelaka vana va vanhu,

¹⁶Hikuva a tshovile swipfalo swa koporo, A tshovelela timhandze ta nhumbu.

¹⁷Swihunguki a swi hlomurisiwa Hi tindlela ta swona leto biha ni ku homboloka ka swona;

¹⁸Mimoya ya swona a yi phiriwa hi swakudya hinkwaswo, Swi fikile etinyangweni ta rifu.

¹⁹Kambe swi huwelela eka Yehovha emapfalweni ya swona; Kutani a swi kutsula eku tsandzekeni ka swona;

²⁰A rhuma rito ra yena, ri swi tshungula, A swi humesa emasirheni ya swona.

²¹A swi khense Yehovha hikwalaho ka vunene bya yena, Hikwalaho ka swihlamariso leswi a swi endlelaka vana va vanhu;

²²A swi humese magandzelo yo khensa, A swi twarise mitirho ya yena hi ku huwelela ka ku tsaka!

²³Lava fambaka elwandle hi tingalava, Va bindzulaka ematini lamakulu,

²⁴Hi vona lava nga hlalela mitirho ya Yehovha, Ni mahlori ya yena exikarhi ka swidziva:

²⁵Wa vula, kutani a pfuxa moya wa xidzedze Lexi tlakusaka magandlati ya lwandle.

²⁶Va tlhandlukela ematilweni, va tlhela va xikela exidziveni. Mimoya ya vona a yi nyuka hi ku hluleka;

²⁷Va khomiwa hi sululwana, va rhurhumela kukotisa munhu loko a pyopyiwile, Vutlhari hinkwabyo bya vona byi hangalaka.

²⁸Kambe va huwelela eka Yehovha emaxangwini ya vona, Kutani a va humesa eku tsandzekeni ka vona.

²⁹A miyeta xihuhuri, wu va moya lowutsongo, Magandlati ma rhula,

³⁰Va tsaka loko ma miyerile, Kutani a va fikisa laha va rhandzeke ku ya kona.

³¹A va khense Yehovha hikwalaho ka vunene bya yena, Hikwalaho ka swihlamariso leswi a swi endlelaka vana va vanhu;

³²A va n'wi tlakuse exikarhi ka nhlengeletano ya tiko, A va n'wi vonge ehubyeni ya vakulukumba!

³³U hundzula milambu rivala, Ni swihlovo swa mati timbala ta ku oma.

³⁴Misava yo nona yi hundzuriwe misava ya munyu Hikwalaho ka ku biha ka vaaki va kona.

³⁵U hundzule mananga tiko ra mati, Ni misava ya ku oma swihlovo swa mati.

³⁶U akise kona lava nga ni ndlala, Kutani va aka miti ku tshama eka yona.

³⁷Va byala mbewu emasin'wini, va byala ni tivhinya, Kutani va dya mihandzu ya swona.

³⁸A va katekisa, kutani va andza ngopfu; A nga hungutanga ntsengo wa swifuwo swa vona.

³⁹Kambe va ondzisiwile ni ku tsongahatiwa Hi ku karhala, ni makhombo, ni nhlomulo.

⁴⁰U halatele xisolo eka tihosi, A ti pepetsekisa emananga laha ku nga riki na ndlela,

⁴¹Kambe a tlakusa mpfumari ekhombyeni ra yena, A endla mindyangu kukotisa loko ngi i mitlhambi ya tinyimpfu.

⁴²Lava lulameke va swi vona va tsaka, Kambe lavo homboloka hinkwavo va pfala milomu.

⁴³I mani la tlhariheke? A a tsundzuke timhaka teto! A va a anakanya vunene bya Xikwembu.