Read Xitsonga Psalms 111 Bible Online

Psalms 111 - Xitsonga bible

Psalms 111

¹Dzunisani Yehovha! Ndzi ta dzunisa Yehovha hi mbilu hinkwayo ya mina, Eku hlanganeni ka valulami ni le nhlengeletanweni.

²Mitirho ya Yehovha yikulu, Yi laviwa hi hinkwavo lava yi tsakelaka.

³Ntirho wa yena i ku kwetsima ni vukulu, Ku lulama ka yena ku tshama hi laha ku nga heriki.

⁴U siyile switsundzuxo swa mahlori ya yena, Yehovha wa tintswalo ni wa ku tsetselela.

⁵U nyikile swakudya eka lava n'wi chavaka; Wa anakanya ntwanano wa yena hi masiku.

⁶U kombisile tiko ra yena matimba ya mitirho ya yena, Hi ku ri nyika ndzhaka ya matiko.

⁷Mitirho ya mavoko ya yena i vunene ni ku lulama; Swileriso swa yena hinkwaswo swi tiyile;

⁸Swi tiyisiwa hi laha ku nga heriki, Swi endliwe hi vunene ni ku lulama.

⁹U rhumele tiko ra yena ku tshunxeka; U lerisile ntwanano wa yena hi laha ku nga heriki; Vito ra yena ri hlawulekile, ra chaviseka.

¹⁰Ku chava Yehovha i ku sungula ka vutlhari; Hinkwavo lava ku hlayisaka va ni ku twisisa lokunene. Ku dzuna ka yena ku tshama hi laha ku nga heriki.