Read Xitsonga Psalms 112 Bible Online

Psalms 112 - Xitsonga bible

Psalms 112

¹Dzunisani Yehovha! Ku katekile munhu la chavaka Yehovha, A tsakelaka ngopfu milawu ya yena.

²Rixaka ra yena ri ta va ni matimba emisaveni; Vatukulu va lavo lulama va ta katekisiwa.

³Ndzalo ni rifuwo swi ta va kona endlwini ya yena, Ku lulama ka yena ku tshama hi masiku.

⁴Ku vonakala ku xela lava lulameke emunyameni, Ni lava nga ni tintswalo, ni nsovo, ni ku lulama.

⁵Ku katekile munhu la hananaka a va a lomba; A lulamisa timhaka ta yena hi ku anakanya,

⁶Hikuva a nga ka a nga tsekatsekisiwi ni siku ni rin'we. La lulameke a tsundzukiwa hi masiku,

⁷A nga ka a nga chavi mpfumawulo lowo biha; Mbilu ya yena yi tiyile, yi titshembela Yehovha.

⁸Mbilu ya yena yi tiyile swinene, a nga chavi nchumu, Mahlo ya yena ma ko ma tsakisiwa hi valala va yena.

⁹A avela, a nyika swisiwana; Ku lulama ka yena i ka masiku hinkwawo; Rimhondzo ra yena ri yima hi ku kwetsima.

¹⁰Lowo biha u vona sweswo, kutani a vilela ha swona, U getsela meno, a omelela, Ku navela ka lavo biha ku endliwa swahava.