Read Xitsonga Psalms 118 Bible Online

Psalms 118 - Xitsonga bible

Psalms 118

¹Dzunisani Yehovha, hikuva u lulamile. Hikuva, nsovo wa yena, hi lowu nga heriki!

²A ku vule Israele: “Ina, nsovo wa yena, hi lowu nga heriki!”

³A ku vule yindlu ya Aroni: “Ina, nsovo wa yena, hi lowu nga heriki!”

⁴A va vule, lava chavaka Yehovha: “Ina, nsovo wa yena, hi lowu nga heriki!”

⁵Emakhombyeni ya mina ndzi khongerile Yehovha; Yehovha u ndzi yingisile, a ndzi veka eku anameni.

⁶Yehovha wa ndzi yimele, a ndzi nga chavi nchumu. Munhu a nga ndzi endla yini?

⁷Yehovha u na mina, kun'we ni lava ndzi pfunaka, Mina, ndza titsakela loko ndzi languta lava ndzi vengaka.

⁸Ku tsutsumela eka Yehovha Ku tlula ku tshemba munhu.

⁹Ku chavela eka Yehovha Ku tlula ni loko munhu a tshemba tihosi!

¹⁰Matiko hinkwawo ma ndzi rhendzele: Hi vito ra Yehovha, kunene; ndzi ta ma herisa,

¹¹Ma ndzi rhendzele. Hi vito ra Yehovha, kunene, ndzi ta ma herisa,

¹²Ma ndzi rhendzele tani hi tinyoxi, Ma ta timeka kukota ndzilo wa mitwa! Hi vito ra Yehovha, kunene, ndzi ta ma herisa.

¹³A wu ndzi susumeta hi matimba ku ndzi wisa, Kambe Yehovha u ndzi pfunile.

¹⁴Yehovha, i matimba ya mina, ni risimu ra mina, Hi yena la ndzi ponisaka.

¹⁵Rito ra mihuvo ni ra ku ponisiwa Ri twakala emixaxeni ya lavo lulama: Voko ra xinene ra Yehovha ri tirhe hi matimba!

¹⁶Voko ra xinene ra Yehovha ri tlakukile ngopfu! Voko ra xinene ra Yehovha ri tirhe hi matimba!

¹⁷Ndzi nga ka ndzi nga fi, ndzi ta hanya, Kutani ndzi ta vula swiendlo swa Yehovha.

¹⁸Yehovha u ndzi bile ngopfu, Kambe a nga ndzi nyiketanga eku feni.

¹⁹Ndzi pfuleleni tinyangwa ta ku lulama: Ndzi ta nghena, ndzi vonga Yehovha!

²⁰Nyangwa ya Yehovha, hi leyi, Lava lulameke va ta nghena ha yona.

²¹Ndzi ta ku tlangela, hikuva u ndzi yingisile, U ve ku hlayiseka ka mina.

²²Ribye leri soriweke hi vaaki Ri endliwile ribye ro rhanga ra yinhla.

²³Leswo swi endliwe hi Yehovha; I singita emahlweni ka hina.

²⁴Hi rona siku leri endliweke hi Yehovha, A hi tsakeni, hi tsakela rona!

²⁵Oho Yehovha! Ponisa! Oho Yehovha! Katekisa!

²⁶A ku katekisiwe la taka hi vito ra Yehovha; Ha mi katekisa, hina va yindlu ya Yehovha!

²⁷Yehovha i Xikwembu, u hi voningile. Bohani hi mapindza mhamba ya nkhuvo, Mi yi tisa etimhondzweni ta alitari.

²⁸U Xikwembu xa mina, ndzi ta ku tlangela! U Xikwembu xanga, ndzi ta ku dzunisa.

²⁹Dzunisani Yehovha, hikuva u lulamile Hikuva tintswalo ta yena hi leti nga heriki.