Read Xitsonga Psalms 119 Bible Online

Psalms 119 - Xitsonga bible

Psalms 119

¹Ku katekile lava tengeke emahanyelweni ya vona, Lava fambaka enawini wa Yehovha!

²Ku katekile lava hlayisaka ku tsundzuxa ka yena, Lava n'wi lavaka hi timbilu hinkwato ta vona;

³Lava nga endliki swo homboloka, Kambe va famba etindleleni ta yena!

⁴U hi lerisile swiletelo swa wena, Leswaku swi hlayisiwa hi mafundza,

⁵Tindlela ta mina a ti tiyisiwe, Ndzi ta kota ku hlayisa timfanelo ta wena!

⁶Hi laha ndzi nga tiki va ni tingana, Loko ndzi anakanya ku lerisa ka wena hinkwako.

⁷Ndzi ta ku dzunisa hi mbilu leyi lulameke, Loko ngi ndzi dyondzile ku avanyisa ka wena loko lulama.

⁸Ndzi rhandza ku hlayisa timfanelo ta wena: U nga tshuki u ndzi tshikela makumu!

⁹Jaha ri ta tengisa ku yini ku famba ka yena xana? Hi loko a ku xaxameta ni rito ra wena.

¹⁰Ndzi ku lava hi mbilu ya mina hinkwayo: U nga ndzi tshiki ndzi hambuka ku lerisa ka wena!

¹¹Ndzi hlayisa rito ra wena embilwini ya mina, Leswaku ndzi nga ku dyoheli.

¹²A ku dzunisiwe wena, Yehovha! Ndzi dyondzise timfanelo ta wena!

¹³Hi milomu ya mina ndzi vula ku avanyisa hinkwako Loku humeke enon'wini wa wena.

¹⁴Ndzi titsakela endleleni ya mitsundzuxo ya wena, Kukotisa loko ndzi fuwile swilo hinkwaswo.

¹⁵Ndzi rhandza ku anakanya swiletelo swa wena, Ni ku veka tindlela ta wena emahlweni ka mina.

¹⁶Ndzi titsakisa hi timfanelo ta wena, Kambe a ndzi rivali rito ra wena.

¹⁷U endla nandza wa wena swinene, Ndzi ta hanya ndzi hlayisa rito ra wena!

¹⁸Hanyanyisa mahlo ya mina, Ndzi ta vona mahlori enawini wa wena!

¹⁹Ndzi muendzi emisaveni; U nga ndzi fihleri ku lerisa ka wena!

²⁰Moya wa mina wu hela Hi ku navela milawu ya wena hi masiku.

²¹U laya vatikurisi lava rhukaniweke, Lava hambukaka ku lerisa ka wena.

²²Susa eka mina xisandzu ni ku nyenyiwa, Hikuva ndzi hlayisa ku tsundzuxa ka wena!

²³Tihosana ti tshamisa ti kanela makungu ya ku lwa na mina; Nandza wa wena u ehleketa timfanelo ta wena.

²⁴Switsundzuxo swa wena i ku tsaka ka mina, Ni vaanakanyisi va mina.

²⁵Moya wa mina wu namarhele entshurini; Ndzi hanyise hi rito ra wena!

²⁶Ndzi ku tivisile tindlela ta mina, kutani u ndzi twile; Ndzi dyondzise timfanelo ta wena!

²⁷Ndzi letele ndlela ya swiletelo swa wena, Ndzi ta anakanya mahlori ya wena.

²⁸Moya wa mina wu rila hi mahlomulo, Ndzi pfuxe hi rito ra wena!

²⁹U ndzi tingisa ndlela ya vunwa, U ndzi ha ku tiva nawu wa wena!

³⁰Ndzi tihlawulela ndlela ya vunene, Ndzi tiyisela ku veka nawu wa wena emahlweni ka mina.

³¹Ndzi namarhele ku tsundzuxa ka wena; Oho Yehovha! Ndzi nga khomisiwi tingana!

³²Ndzi ta tsutsuma endleleni ya ku lerisa ka wena, Loko u anamisile mbilu ya mina.

³³Yehovha, ndzi dyondzise ndlela ya timfanelo ta wena, Leswaku ndzi famba ha yona ku yisa makumu!

³⁴Ndzi nyike ku twa swinene, leswaku ndzi ta hlayisa nawu wa wena; Ndzi endla ha wona hi mbilu ya mina hinkwayo!

³⁵Ndzi fambise hi ndlela ya swileriso swa wena, Hikuva ndza swi tsakela!

³⁶Kokela mbilu ya mina leswaku yi yingisa ku tsundzuxa ka wena, Ku nga ri leswaku yi rhandza ku fuwa.

³⁷Fularhisa mahlo ya mina, ma nga languti swahava, U ndzi hanyisa etindleleni ta wena!

³⁸Tiyisela nandza wa wena rito ra wena Leri u ri tshembiseke lava ku chavaka!

³⁹Tshineta ekule na mina xisandzu lexi ndzi xi chavaka! Hikuva ku avanyisa ka wena ku tele vunene.

⁴⁰Vona, ndzi navela swileriso swa wena. Ndzi ponise hi ku lulama ka wena!

⁴¹Tintswalo ta wena a ti te eka mina, oho Yehovha! Ni ku hlayiseka ka wena, hi laha u hi tshembiseke hakona!

⁴²Leswaku ndzi tiva ku hlamula la ndzi sandzaka, Hikuva ndzi tshembile rito ra wena.

⁴³U nga suseli makumu rito ra ntiyiso enon'wini wa mina, Hikuva ndzi langutile ku avanyisa ka wena.

⁴⁴Ndzi ta hlayisa nawu wa wena hi masiku, Hi laha ku nga yiki helo, ni makumu.

⁴⁵Ndzi ta famba endleleni leyi anameke, Hikuva ndzi lava swiletelo swa wena.

⁴⁶Ndzi ta vula switsundzuxo swa wena emahlweni ka tihosi, Kambe a ndzi nga vi na tingana.

⁴⁷Ndzi ta titsakisa hi swileriso swa wena, Ndza swi rhandza.

⁴⁸Ndzi ta tlakusela ku lerisa ka wena mavoko ya mina, hikuva ndza ku rhandza, Ndzi engeta ndzi anakanya timfanelo ta wena.

⁴⁹Tsundzuka rito ra wena leri u nga ri hlayela nandza wa wena, Leswi u nga ndzi nyika ku tshemba.

⁵⁰Ku chaveleriwa ka mina emakhombyeni ya mina, Hi leswaku leswi vuriweke hi wena swi ndzi hanyisile.

⁵¹Vatikurisi va ndzi hleka ngopfungopfu, Hambiswiritano, a ndzi hambukanga enawini wa wena.

⁵²Yehovha, ndzi anakanya ku avanyisa ka wena ka khale! Kutani ndza chaveleriwa.

⁵³Ndzi khomiwa hi nhlamalo wa vukari Loko ndzi vona lavo biha va tshika nawu wa wena.

⁵⁴Timfanelo ta wena ti ndzi humesela tinsimu, Endlwini ya vuendzi bya mina.

⁵⁵Nivusiku ndzi anakanya vito ra wena, Yehovha, Kutani ndzi hlayisa nawu wa wena.

⁵⁶Lexi ndzi fanelaka, Hi leswaku ndzi hlayisa swileriso swa wena.

⁵⁷Ka averiwa ka mina, oho Yehovha! I ku hlayisa rito ra wena.

⁵⁸Ndzi lavile mombo wa wena hi mbilu hinkwayo ya mina; Ndzi tsetselele hi laha u ndzi tshembiseke hakona!

⁵⁹Ndzi anakanya mahanyelo ya mina, Kambe ndzi kongometa milenge ya mina eku tsundzuxeni ka wena.

⁶⁰Ndza hatlisa, a ndzi hlweri Ku hlayisa swileriso swa wena.

⁶¹Marindzi ya lavo biha ma ndzi rhendzele; Kambe a ndzi rivali nawu wa wena.

⁶²Ndzi pfuka exikarhi ka vusiku, ndzi ku dzunisa, Hikwalaho ka ku avanyisa ka wena ka ku lulama.

⁶³Ndzi tolovela hinkwavo lava ku chavaka, Ni lava hlayisaka swileriso swa wena.

⁶⁴Yehovha, misava a yi tele vunene bya wena; Ndzi dyondzise timfanelo ta wena!

⁶⁵Yehovha, u endlela nandza wa wena hi vunene, Hi laha u n'wi tshembiseke hakona.

⁶⁶Ndzi dyondzise, ndzi he ku twa lokunene, ni ku twisisa! Hikuva ndzi pfumerile ku lerisiwa hi wena.

⁶⁷Loko ndzi nga si tsongahatiwa, a ndzi hambuka ndlela; Kambe sweswi ndzi hlayisa rito ra wena.

⁶⁸U nene, wa hanana; Ndzi dyondzise timfanelo ta wena.

⁶⁹Vatikurisi va ndzi lumbeta hi vunwa; Kambe mina ndzi hlayisa swileriso swa wena hi mbilu ya mina hinkwayo.

⁷⁰Timbilu ta vona ti nonile, a va ha twi; Kambe mina ndzi titsakisa hi nawu wa wena.

⁷¹Swi lulamile eka mina leswi ndzi nga tsongahatiwa, Leswaku ndzi ta dyondza timfanelo ta wena.

⁷²Nawu lowu humeke enon'wini wa wena Eka mina wu tlula khume ra madzana ya mitirho ya nsuku ni silivhere.

⁷³Swandla swa wena swi ndzi endlile, ndzi vumbiwe hi swona; Ndzi nyike ku twa, ndzi ta dyondza ku lerisa ka wena!

⁷⁴Lava ku chavaka, loko va ndzi vona va tsaka, Hikuva ndzi tshembile ku hlayela ka wena.

⁷⁵Yehovha, ndza tiva leswaku ku avanyisa ka wena ku lulamile, Ni leswaku wa tshembeka, hambi u ndzi tsongahatile.

⁷⁶Tintswalo ta wena a ti ve ku chavelela eka mina, Hi laha u hlayeleke nandza wa wena!

⁷⁷Ku tsetselela ka wena a ku ndzi tele, ndzi ta hanya! Hikuva nawu wa wena wa ndzi tsakisa.

⁷⁸Vatikurisi a va khomiwe hi tingana, hikuva va ndzi xanisa ntsena! Loko ndzi ri mina, ndzi karhi ndzi tsundzuka swileriso swa wena.

⁷⁹Lava ku chavaka a va tlhelele eka mina, Kutani va ta tiva ku tsundzuxa ka wena!

⁸⁰Mbilu hinkwayo ya mina a yi tinyikete timfanelo ta wena, Leswaku ndzi nga khomisiwi tingana.

⁸¹Moya wa mina wu hela hi ku navela ku hlayiseka ka wena; Ndzi karhi ndzi langutela ku hlayela ka wena.

⁸²Mahlo ya mina ma hela hi ku langutela ku hlayela ka wena, Kutani ndzi ri: “U ta ndzi chavelela rini?”

⁸³Hikuva ndzi fana ni nkwama lowu omeke emusini; A ndzi rivali timfanelo ta wena.

⁸⁴Xana masiku ya nandza wa wena i mangani-ke? U ta ndzi lunghisela rini eka vaxanisi va mina?

⁸⁵Vatikurisi va ndzi celele marindzi; Va nga lava nga fambiki hi nawu wa wena.

⁸⁶Ku lerisa ka wena hinkwako hi lokunene; Va ndzi xanisa ntsena, wa nga ndzi pfuna!

⁸⁷Va lava ku ndzi lovisa, va ndzi wisela ehansi: Kambe a ndzi tshiki swileriso swa wena.

⁸⁸Ndzi hanyise hi tintswalo ta wena, Hi kona ndzi nga ta hlayisa ku tsundzuxa ka nomu wa wena.

⁸⁹Oho Yehovha! Rito ra wena ri tshama ematilweni, Hi laha ku nga heriki.

⁹⁰Vutshembeki bya wena byi tshama eka vatukulu ni vatukulwana; U sungurile misava, kutani yi tama ya ha tiyile.

⁹¹Ni sweswi, hinkwaswo swa ha tiyile hi milawu ya wena, Hikuva swilo hinkwaswo swi le hansi ka wena.

⁹²Loko ingi nawu wa wena a wu ndzi tsakisanga, Ingi ndzi herile emakhombyeni ya mina.

⁹³Ndzi nga ka ndzi nga rivali swileriso swa wena ni siku ni rin'we, Hikuva u ndzi hanyisile ha swona.

⁹⁴Ndzi wa wena, ndzi kutsule! Hikuva ndzi lava swileriso swa wena.

⁹⁵Lavo biha va ndzi bvutamele ku ndzi lovisa; Kambe ndzi hlayisa ku lerisa ka wena swinene.

⁹⁶Ndzi vonile ku hetelela ka swilo hinkwaswo leswi hetisekeke, Kambe ku lerisa ka wena a ku na laha ku kayivelaka kona.

⁹⁷Nawu wa wena ndzi wu rhandzisa hakunene! Ndzi wu anakanya siku hinkwaro.

⁹⁸Swileriso swa wena swi ndzi tlharihisa ngopfu ku tlula valala va mina, Hikuva swi na mina hi masiku.

⁹⁹Ndzi ni ku twisisa loku tlulaka ka lava ndzi letelaka hinkwavo, Hikuva ku tsundzuxa ka wena i ku anakanya ka mina.

¹⁰⁰Ndzi tlula va khale hi ku tiva, Hikuva ndzi hlayisa swileriso swa wena.

¹⁰¹Ndzi hambuxa nenge wa mina etindleleni hinkwato leto biha, Leswaku ndzi hlayisa rito ra wena.

¹⁰²A ndzi hambuki ku lerisa ka wena, Hikuva hi wena la ndzi dyondzisaka.

¹⁰³A hi ku nandziha ka marito ya wena emalakeni ya mina, Ma tlula vulombe enon'wini wa mina!

¹⁰⁴Ndzi kuma ku twisisa eku leteleni ka wena, Hi leswo-ke ndzi vengile tindlela hinkwato ta mavunwa.

¹⁰⁵Rito ra wena i rivoningo emilengeni ya mina, Ni ku vonakala endleleni ya mina.

¹⁰⁶Ndzi hlambanyile, ndzi tiyisa, ndzi ku: Ndzi ta famba hi milawu ya ku lulama ka wena.

¹⁰⁷Ndzi ni nhlomulo lowukulu; Ndzi hanyise, Yehovha, hi laha rito ra wena ri vuleke hakona!

¹⁰⁸Oho Yehovha! Amukela gandzelo leri humaka enon'wini wa mina, U ndzi dyondzisa milawu ya wena!

¹⁰⁹Vutomi bya mina byi vekiwile ku lovisiwa hi masiku, Kambe a ndzi rivali nawu wa wena.

¹¹⁰Lavo biha va ndzi celela marindzi, Kambe a ndzi hambuki swiletelo swa wena.

¹¹¹Ndzi tekile ku lerisa ka wena, ri va rifuwo ra mina, hi masiku, Hikuva swi tsakise mbilu ya mina.

¹¹²Ndzi voyamisile mbilu ya mina, ku ya hi timfanelo ta wena, Hi masiku lama nga heriki.

¹¹³Ndzi vengile miehleketo ya nsohensohe, Kambe ndzi rhandza nawu wa wena.

¹¹⁴U xichavelo ni xitlhangu xanga; Ndzi langutele ku tshembisa ka wena.

¹¹⁵Tshinelani ekule na mina, n'wina lavo biha, Leswaku ndzi hlayisa ku lerisa ka Xikwembu xanga!

¹¹⁶U ndzi tiyisa hi ku tshembisa ka wena leswaku ndzi hanya; U nga ndzi khomisi tingana eku tshembeni ka mina!

¹¹⁷Ndzi wundle ndzi ta hlayiseka, Timfanelo ta wena ti va emahlweni ka mina hi mikarhi!

¹¹⁸U sandza hinkwavo lava hambukaka timfanelo ta wena, Hikuva ku kanganyisa ka vona i swahava.

¹¹⁹U susa lavo biha hinkwavo emisaveni kukota khuvi; Hikwalaho ndzi rhandza ku tsundzuxa ka wena.

¹²⁰Miri wa mina wu rhurhumela hi ku chava wena, Ndzi chava ku avanyisa ka wena.

¹²¹Ndzi hlayisa nawu ni ku lulama, U nga ndzi nyiketi vaxanisi va mina!

¹²²Hlayisa, u va u yimela nandza wa wena, Vatikurisi va nga tshuki va ndzi xanisa.

¹²³Mahlo ya mina ma navela ku hlayiseka ka wena, Ni ku hlayela ka wena loku lulameke.

¹²⁴Endlela nandza wa wena hi vunene bya wena, U ndzi dyondzisa timfanelo ta wena.

¹²⁵Ndzi nandza wa wena; ndzi nyike ku twisisa, Ndzi ta tiva swileriso swa wena.

¹²⁶I nkarhi wa wena wa ku tirha, Yehovha! Hikuva va herisile nawu wa wena.

¹²⁷Hikwalaho ndzi rhandzaka ku lerisa ka wena Ku tlula nsuku, ni nsuku lowu tengeke;

¹²⁸Ndzi kuma na kona, leswaku swiletelo swa wena swi lulamile eka hinkwaswo; Kutani ndzi vengile tindlela ta mavunwa.

¹²⁹Switsundzuxo swa wena swa hlamarisa; Moya wa mina wa swi hlayisa hikwalaho.

¹³⁰Hlavutelo ya marito ya wena ya voninga, Yi nyika lavo rivala ku twisisa.

¹³¹Ndzi ahlamisa nomu wa mina, ndzi hefemuteka, Hikuva ndzi navela ku lerisa ka wena.

¹³²Rhendzelekela eka mina, u ndzi twela vusiwana, Hi laha u toloveleke ku endlela lava rhandzaka vito ra wena hakona!

¹³³Tiyisa milenge ya mina eritweni ra wena, Kutani u nga pfumeleri ku biha leswaku ku ndzi fuma!

¹³⁴Ndzi kutsule eku xanisiweni ka vanhu, Leswaku ndzi ta hlayisa swiletelo swa wena!

¹³⁵Vangamisela mombo wa wena eka nandza wa wena, U ndzi dyondzisa timfanelo ta wena!

¹³⁶Mahlo ya mina ma huma milambu ya mati lama khulukaka, Hikuva a va hlayisi nawu wa wena.

¹³⁷U lulamile, Yehovha, Ku avanyisa ka wena, na kona, ku lulamile!

¹³⁸U lerisile milawu ya wena hi ku lulama, Ni vutshembeki lebyikulu.

¹³⁹Ku hiseka ka mina ku ndzi dyile, Hikuva valala va mina va rivele marito ya wena.

¹⁴⁰Rito ra wena ri tengile hi ku tlurisa, Ri rhandziwa hi nandza wa wena.

¹⁴¹Ndzi lontsongo, ndza tsan'wiwa; Hambiswiritano, a ndzi rivali swileriso swa wena.

¹⁴²Ku lulama ka wena, i ku lulama loku nga heriki; Nawu wa wena i wa vunene.

¹⁴³Ndzi khomile hi mapfalo ni ku kanakana; Hambiswiritano ndzi tsakela ku lerisa ka wena.

¹⁴⁴Ku lulama ka switsundzuxo swa wena hi loku nga heriki, Ndzi nyike ku twa swinene, ndzi ta hanya!

¹⁴⁵Ndzi huwelela hi mbilu ya mina hinkwayo: Ndzi hlamule, Yehovha, ndzi ta hlayisa timfanelo ta wena.

¹⁴⁶Ndzi kombela ka wena: U ndzi ponisa, Ndzi ta tiva ku hlayisa ku tsundzuxa ka wena!

¹⁴⁷Ndzi rhangela vurhonga, ndzi huwelela! Ndzi ri karhi ndzi langutela ku tshembisa ka wena.

¹⁴⁸Mahlo ya mina ma rhangela mikarhi ya ku langutela ka vusiku, Leswaku ndzi anakanya rito ra wena.

¹⁴⁹Yehovha, yingisa rito ra mina hi tintswalo ta wena! Ndzi hanyise hi ku avanyisa ka wena!

¹⁵⁰Lava landzaka swo biha, va tshinele, Va ri karhi va yimela kule ni nawu wa wena.

¹⁵¹Kambe, wena Yehovha, u kusuhi, Ni ku lerisa ka wena hinkwako hi lokunene.

¹⁵²Khale, ndzi tivile ku tsundzuxa ka wena. Leswaku u ku tiyisile hi laha ku nga heriki.

¹⁵³Languta vusiwana bya mina, u ndzi ponisa! Hikuva a ndzi rivali nawu wa wena.

¹⁵⁴Yimela timhaka ta mina, u ndzi kutsula! U ndzi hanyisa hi ku tshembisa ka wena!

¹⁵⁵Ku hlayiseka ku le kule ni lavo biha, Hikuva a va vuri nchumu hi timfanelo ta wena.

¹⁵⁶Ku tsetselela ka wena, Yehovha, kukulu; Ndzi hanyise hi ku avanyisa ka wena!

¹⁵⁷Vaxanisi va mina ni vakarhati va mina va tele, Kambe a ndzi hambukanga eku tsundzuxeni ka wena.

¹⁵⁸Ndzi vavisiwa hi lava nga tshembekiki, Hikuva a va hlayisi rito ra wena.

¹⁵⁹Yehovha, tsundzuka leswaku ndzi rhandza swileriso swa wena; U ndzi hanyisa hi tintswalo ta wena!

¹⁶⁰Masungulo ya rito ra wena manene; Ku avanyisa hinkwako ka ku lulama ka wena a ku heri.

¹⁶¹Tihosi ta ndzi xanisa ntsena; Kambe mbilu ya mina yi rhurhumela hi marito ya wena.

¹⁶²Ndzi titsakisa hi rito ra wena, Tanihi munhu la tsakelaka ku phanga lokukulu.

¹⁶³Ndzi vengile, ndzi nyenya mavunwa; Kambe ndzi rhandza nawu wa wena.

¹⁶⁴Ndzi ku dzunisa eka ntlhanu na kambirhi hi siku, Hikwalaho ka milawu ya ku lulama ka wena.

¹⁶⁵Lava rhandzaka nawu wa wena va ni ku rhula lokukulu, A ku na ku khunguvanyisa eka vona.

¹⁶⁶Yehovha, ndzi langutele ku hlayiseka ka wena, Ndzi ri karhi ndzi famba hi ku lerisa ka wena.

¹⁶⁷Moya wa mina wu hlayisa switsundzuxo swa wena, Kutani ndza swi rhandza ku tlurisa.

¹⁶⁸Ndzi ri karhi ndzi ya hi swileriso ni switsundzuxo swa wena, Hikuva mfambo wa mina hinkwawo wu le mahlweni ka wena.

¹⁶⁹Yehovha, ku huwelela ka mina a ku fike eka wena! Ndzi nyike ku twisisa hi laha u ndzi tshembiseke hakona!

¹⁷⁰Ku khongela ka mina a ku fike emahlweni ka wena! U ndzi hlayisa hi laha u nga vula ha kona!

¹⁷¹Milomu ya mina a yi humese ku bumabumela, Hikuva u ndzi dyondzisa timfanelo ta wena.

¹⁷²Ririmi ra mina a ri dzunise rito ra wena, Hikuva ku lerisa ka wena hinkwako ku lulamile.

¹⁷³Voko ra wena a ri ndzi pfune, Hikuva ndzi tihlawulele swileriso swa wena!

¹⁷⁴Yehovha, ndzi naverile ku hlayiseka ka wena, Kutani nawu wa wena i ku tsaka ka mina!

¹⁷⁵Moya wa mina a wu hanye, wu ku dzunisa! U ndzi hlayisa hi ku avanyisa ka wena!

¹⁷⁶Ndzi ri karhi ndza tsendzeleka ku fana ni nyimpfu leyi lahlekeke: Lava nandza wa wena, hikuva a ndzi rivali ku lerisa ka wena.