Read Xitsonga Psalms 132 Bible Online

Psalms 132 - Xitsonga bible

Psalms 132

¹Yehovha, tsundzuka Davhida, ni ku xaniseka ka yena hinkwako!

²U hlambanyile ka Yehovha, U tshembisile lowa matimba wa Yakobo, a ku:

³“A ndzi nga ha ngheni endlwini ya mina, A ndzi nga wisi emasangwini ya mina,

⁴A ndzi nga nyiketi mahlo ya mina vurhongo, Ni tinkohe ta mina ku khudzehela,

⁵Ndzi nga si kumela Yehovha vuako, Ni Lowa matimba wa Yakobo yindlu.”

⁶Languta, hi swi twile loko yi vuriwa Efrata, Hi yi kumile emasin'wini ya Yaare ...

⁷A hi ngheneni endlwini ya yona, A hi khinsameni evunavelweni bya yona! ...

⁸Pfuka Yehovha, u nghena evuwiselweni bya wena, Wena ni areka ya vukulu bya wena!

⁹Vaprista va wena a va ambale ku lulama, Ni lava ku rhandzaka va havela hi ku tsaka!

¹⁰Hikwalaho ka Davhida, nandza wa wena, U nga fularheli muhlawuriwa wa wena!

¹¹Yehovha u endlile nhlambanyo lowunene ka Davhida, A nga ka a nga hundzuki ka yona, u te: “Ndzi ta veka exiluvelweni xa wena n'wana la velekiweke hi wena.

¹²Loko vana va wena va hlayisa ntwanano wa mina Ni swileriso leswi ndzi nga ta va dyondzisa swona, Vana va vona va ta tshamisa exiluvelweni xa wena hi masiku.”

¹³Hikuva Yehovha u tihlawulele Siyoni, U rhandzile ku ta tiakela kona, a ku:

¹⁴“La, i vuwiso bya mina hi laha ku nga heriki; Ndzi rhandza ku aka kona, hikuva ndzi ku naverile.

¹⁵Ndzi ta ku nyika ndzalo, Kutani vapfumari va kona ndzi ta va xurhisa hi vuswa;

¹⁶Ndzi ta funengeta vaprista va kona hi ku hlayiseka, Ni vahlawuriwa va ta havela hi ku tsaka.

¹⁷Kona ndzi ta tiyisa vuhosi bya Davhida, Ndzi lunghisela muhlawuriwa wa mina rivoni,

¹⁸Ndzi ta funengeta valala va yena hi tingana, Kutani harhi ya vuhosi ya yena yi ta kwetsima enhlokweni ya yena.”