Read Xitsonga Psalms 18 Bible Online

Psalms 18 - Xitsonga bible

Psalms 18

¹Ndzi ta ku rhandza ngopfu, wena Yehovha, matimba ya mina!

²Oho Yehovha! Ribye ra mina, ni khokholo ra mina, ni mulweri wa mina! Oho Xikwembu xanga! Ribye ra mina leri ndzi chavelaka eka rona! Xitlhangu xa mina, ni matimba lama ndzi ponisaka, ni xichavelo xa mina!

³Ndzi huwelela, ndzi ku: “Yehovha a a vongiwe!” Kutani ndzi lweriwa eka valala va mina.

⁴Tinsinga ta rifu a ti ndzi rhendzele, Ni maboboma lama onhaka a ma ndzi tshukisile;

⁵Tinsinga ta sirha a ti ndzi rhendzele; A ndzi khomiwile emarindzini ya rifu.

⁶Emapfalweni ya mina, ndzi vitanile eka Yehovha; Ndzi huwelele eka Xikwembu xanga; U yingisile rito ra mina, a ri endlwini ya yena; Kambe ku huwelela ka mina ku fikile emahlweni ka yena etindleveni ta yena.

⁷Misava yi va yi tsekatseka, yi rhurhumela, Masungulo ya tintshava ma susumetiwa, Ma tsekatseka, hikuva a a karihile.

⁸Ku tlhandluka musi etinhompfini ta yena, Ni ndzilo lowu lovisaka enon'wini wa yena; Ku huma ka wona makala lama vavamelaka.

⁹A xikisa matilo, kutani a rhelela; Munyama a wu ri hansi ka mikondzo ya yena.

¹⁰U khandziyile kerubu, kutani a haha, A tsemakanya exibakabakeni, a ri etimpapeni ta moya.

¹¹A tifunengeta hi munyama, wu kotisa ntsonga, A tirhendzele hi mati ya ntima ni mapapa ya munyama.

¹²Eku vonakaleni loku n'wi rhangelaka emahlweni, Ku huma mapapa ya xihangu, ni makala lama vavamelaka.

¹³Yehovha u pfuma ematilweni Loya nge henhla a twakarisa rito ra yena, Ku va ni xihangu ni makala lama vavamelaka.

¹⁴A copa miseve ya yena, a hangalasa valala va mina, A vangamisa tihati leti nga hlayiwiki, a va hambanyisa.

¹⁵Vuento bya lwandle byi humelela, Masungulo ya misava ma hluvuleka, Hi ku holova ka wena, Yehovha! Hi ku huhutela ka moya wa tinhompfu ta wena.

¹⁶A tshambuluta voko a ri ehenhla a ndzi khoma, A ndzi humesa ematini lamakulu.

¹⁷A ndzi lwela eka nala wa mina lowa matimba, Ni le ka lava ndzi vengeke, lava ndzi tlulaka hi matimba.

¹⁸Va ndzi sivelele siku ndzi nga va ekhombyeni; Kambe Yehovha u ve xongotelo ra mina.

¹⁹A ndzi humesela erivaleni, A ndzi kutsula hikuva a ndzi rhandza.

²⁰Yehovha u ndzi endlile hi ku lulama ka mina, Kambe u ndzi tlherisile hi ku basa ka mavoko ya mina;

²¹Hikuva ndzi hlayisile tindlela ta Yehovha, A ndzi hundzukelangi Xikwembu xa mina.

²²Hikuva ku lerisa hinkwako ka yena ku le mahlweni ka mina, Kambe a ndzi fularhelanga milawu ya yena.

²³Ndzi pfumarile swisolo emahlweni ka yena, Kutani ndzi tihlayisile leswaku ndzi nga vi na nandzu.

²⁴Hikwalaho Yehovha u ndzi hakerile hi ku lulama ka mina, Ni ku basa ka swandla swa mina emahlweni ka yena.

²⁵Lonene, u n'wi endla hi vunene, Munhu la lulameke, u n'wi endla hi ku lulama,

²⁶La baseke, u n'wi endla hi ku basa ka wena, Kambe lowo homboloka u n'wi endla hi ku homboloka ka yena.

²⁷Hikuva hi wena la ponisaka lava titsongahataka, Kambe u tsongahata mahlo lama tlakukeke.

²⁸Hi wena la vangamisaka ku vonakala ka mina; Yehovha, Xikwembu xanga, u vonakarisa munyama wa mina.

²⁹Loko ndzi ri na wena, ndzi nga tihoxa evandleni ra valala, Kambe hi Xikwembu xa mina, ndzi nga tlula rihlampfu.

³⁰Tindlela ta Xikwembu ti lulamile, Rito ra Yehovha ri hlawulekile; I xitlhangu eka hinkwavo lava titshembeleke yena.

³¹I mani Xikwembu, loko a nga ri Yehovha? I mani ribye lero tiya, loko xi nga ri Xikwembu xa hina?

³²Xikwembu lexi ndzi boheke hi vamba ra matimba, Kambe wa ndzi fambisa hi ndlela leyi lulameke.

³³U endle milenge ya mina yi fana ni ya tinhlangu, U ndzi tiyisile etindhawini ta mina leti tlakukeke.

³⁴U tlharihisele nyimpi swandla swa mina. Kutani mavoko ya mina ma kunga vurha bya koporo.

³⁵U ndzi nyikile xitlhangu xa ku hlayiseka ka wena, Voko ra wena ra xinene ri ndzi tiyisile, Kambe vunene bya wena byi ndzi kurisile.

³⁶U anamisile ndlela ehansi ka mikondzo ya mina, Kutani milenge ya mina a yi rhetemuki.

³⁷Ndzi tsutsumele valala va mina, ndzi va kuma, Kutani a ndzi tlhelanga ndzi nga si va heta.

³⁸Ndzi va kandziyela, va hluleka ku pfuka; Va wa ehansi ka mikondzo ya mina.

³⁹U ndzi bohile hi vamba ra matimba ro huma nyimpi, U ndzi tsongahatela lava ndzi pfukelaka matimba.

⁴⁰U rhendzelekisile mihlana ya valala va mina emahlweni ka mina, Kutani ndzi herisile lava ndzi vengeke.

⁴¹Va huwelela, kambe va pfumala mulweri; Va huwelele eka Yehovha, kambe a nga va hlamulanga.

⁴²Ndzi va sirile kukota ntshuri lowu hungiwaka hi moya, Ndzi va cukumeta ekule kukota ndzhope wa mitsendzele.

⁴³U ndzi lwerile eku kanetaneni ka tiko, Kambe u ndzi vekile hosi ya matiko; Tiko leri ingi ndzi nga ri tivi, ra ndzi tirhela.

⁴⁴Loko va twa vito ra mina, va hatlisa, va yingisa, Vana va matiko i vayengi va mina;

⁴⁵Vana va matiko va ni gome, Va rhurhumela loko va huma emakhokholweni ya vona.

⁴⁶Yehovha wa hanya, a ku dzunisiwe ribye ra mina! A ku twarisiwe Xikwembu xa ku hlayiseka ka mina!

⁴⁷Xikwembu lexi ndzi rihiselaka, Lexi ndzi tsongahatelaka matiko.

⁴⁸Kambe u ndzi lwela eka valala va mina, U ndzi tlakurile ehenhla ka lava ngi va lwa na mina, U ndzi ponisile eka munhu wa vukari.

⁴⁹Hikwalaho ndzi ta ku vonga exikarhi ka matiko, oho Yehovha! Ndzi ta yimbelela ku kwetsima ka vito ra wena.

⁵⁰U ponisa hosi ya yena hi ku kutsula lokukulu, U endla hi tintswalo eka muhlawuriwa wa yena, Eka Davhida, ni ka rixaka ra yena hilaha ku nga heriki.