Read Xitsonga Psalms 24 Bible Online

Psalms 24 - Xitsonga bible

Psalms 24

¹Misava i ya Yehovha, ni leswi nga eka yona, Misava ni lava akeke eka yona.

²Hikuva u yi sungurile ehenhla ka malwandle, U yi tiyisile ehenhla ka milambu.

³I mani la nga ta tlhandlukela entshaveni ya Yehovha? Kambe i mani la nga ta tshama evukwetsimelweni bya yena?

⁴Hi loyi a nga ni swandla leswi nga riki na nandzu, ni mbilu leyi tengeke. Loyi a nga nyiketiki moya wa yena ku hemba mavunwa, La nga hlambanyiki hi ku xisa.

⁵U ta vona ku kateka ka Yehovha, Ni ku lulama ka Xikwembu xa ku hlayiseka ka yena.

⁶Hi rona rixaka ra lava xi lavaka, Ra lava lavisaka mombo wa wena, Yakobo.

⁷N'wina tinyangwa, tlakusani marimba ya n'wina! Titlakuseni, n'wina tinyangwa ta masiku lama nga heriki! Ku ta nghena hosi ya ku kwetsima.

⁸Hosi ya ku kwetsima, i mani? I Yehovha wa matimba la nga tsandziwiki ha nchumu, Yehovha la nga ni matimba enyimpini.

⁹N'wina tinyangwa, tlakusani marimba ya n'wina! Ma tlakuseni, n'wina tinyangwa ta masiku! Ku ta nghena hosi ya ku kwetsima.

¹⁰Hosi ya ku kwetsima i mani? I Yehovha wa tinyimpi; Hi yena la nga hosi ya ku kwetsima.