Read Xitsonga Psalms 27 Bible Online

Psalms 27 - Xitsonga bible

Psalms 27

¹Yehovha i ku vonakala ka mina, ni ku hlayiseka ka mina: Ndzi nga tshukisiwa hi mani? Yehovha i khokholo ra vutomi bya mina: Ndzi nga rhurhumela emahlweni ka mani xana?

²Kungakuloko lavo biha va ndzi tela Ku ta phorha nyama ya mina, Valala va mina ni lava ndzi vengaka, Hi vona lava khunguvanyekaka va wa ehansi.

³Ni loko nyimpi yi nga ta ku ndzi lavelela, Mbilu ya mina yi nga ka yi nga chavi nchumu; Ni loko fumu ri nga ndzi pfuka, Na kona, mbilu ya mina yi ta va ni ku tshemba.

⁴Ndzi komberile xilo xin'we eka Yehovha, ndza ha xi navela ngopfu: Hi leswaku ndzi tshama endlwini ya Yehovha hi masiku hinkwawo ya ku hanya ka mina. Ndzi ta hlalela ku kwetsima ka Yehovha, Ndzi va ndzi kambisisa tempele ya yena.

⁵Hikuva u ta ndzi fihla entsongeni wa yena hi siku ra khombo, U ta ndzi tumbeta exichavelweni xa Tabernakela ya yena, Kutani a ndzi khandziyisa ehenhla ka ribye lero tiya.

⁶Sweswi, nhloko ya mina yi ta ungamela valala lava ndzi rhendzeleke; Kambe ndzi ta humesa magandzelo va ku tsaka eTabernakeleni ya yena, Ndzi ta yimbelela, ndzi va ndzi twarisa Yehovha.

⁷Yingisa, Yehovha, rito ra nga ra ku vita; Ndzi twele vusiwana, u ndzi hlamula.

⁸Mbilu ya nga yi ndzi byela swa wena, yi ku: “Lavani mombo wa mina!” Ndzi ta lava mombo wa wena, oho Yehovha!

⁹U nga ndzi fihleri mombo wa wena, U nga cukumeti nandza wa wena hi ku kariha; Hi wena la ndzi pfunaka; u nga ndzi lahli, u nga ndzi tshiki, Xikwembu xa ku hlayiseka ka mina.

¹⁰Hambiloko tatana na manana va nga ndzi tshika, Yehovha u ta ndzi rhola.

¹¹Yehovha, ndzi kombise ndlela ya wena, U ndzi fambisa endleleni leyi lulameke, Hikwalaho ka lava nga valala eka mina.

¹²U nga ndzi nyiketi eku rhandzeni ka lava lwaka na mina, Hikuva timbhoni ta vunwa ti ndzi pfukele, Ni vanhu lava hefemulaka ku kariha ntsena.

¹³Loko ngi ndzi nga pfumeri leswaku ndzi ta vona vunene bya Yehovha Emisaveni ya lava hanyaka! ...

¹⁴Langutela Yehovha, u tshama u tiya; Mbilu ya wena a yi tiye! U titshembela Yehovha!