Read Xitsonga Psalms 28 Bible Online

Psalms 28 - Xitsonga bible

Psalms 28

¹Yehovha, ndzi huwelela eka wena! Ribye ra nga! U nga ndzi siveli tindleve ta wena: Swi nga ku, kumbexana loko u ndzi miyelela, Ndzi nga va tani hi lava ngirimelaka esirheni.

²Yingisa rito ra mikhongelo ya mina loko ndzi huwelela eka wena, Ni loko ndzi tlakusa mavoko ya mina evukwetsimelweni bya wena.

³U nga ndzi susi ni lavo biha, ni lava endlaka swo homboloka. Lava vulaka ku rhula eka varikwavo, kasi lunya ri le timbilwini ta vona.

⁴U va nyika leswi lulamelaka mitirho ya vona, ni lunya ra vona; U va hakela hi ntirho wa mavoko ya vona; U va tlherisela hi laha va endleke hakona.

⁵Hikuva a va anakanyi mitirho ya Yehovha, Hambi wu ri ntirho wa mavoko ya yena. U ta va wisa ehansi, a nga ka a nga va akisi.

⁶A ku dzunisiwe Yehovha! Hikuva u yingisile rito ra mikhongelo ya mina,

⁷Yehovha i matimba ya mina ni xitlhangu xa mina; Mbilu ya mina yi titshembele yena kutani ndzi pfunekile; Mbilu ya mina yi tsakile hikwalaho, Kutani ndzi n'wi twarisa hi tinsimu ta mina.

⁸Yehovha i matimba ya tiko ra yena, I khokholo ra ku hlayiseka ka muhlawuriwa wa yena.

⁹Ponisa tiko ra wena, u va u katekisa ndzhaka ya wena! U va risa, u va veleka hi laha ku nga heriki!