Read Xitsonga Psalms 35 Bible Online

Psalms 35 - Xitsonga bible

Psalms 35

¹Oho Yehovha! Ndzi lwele eka lava ndzi pfukaka, Lwana ni lava lwaka na mina!

²Khoma xitlhangu lexitsongo ni lexikulu, U pfuka ku ta ndzi pfuna!

³Hlomula tlhari, u sivela lava ndzi hlongorisaka! U ku eka moya wa mina: “Hi mina ku hlayiseka ka wena!”

⁴A va kanakane, a va khomiwe hi tingana, lava lavaka vutomi bya mina! A va tlhelele endzhaku, a va kanakane, lava ehleketaka ku ndzi lovisa!

⁵A va fane ni mungu lowu hungiwaka hi mheho, Ntsumi ya Yehovha a yi va hlongorise!

⁶Ndlela ya vona a yi ve leya munyama, leyi rhetemukaka, Ntsumi ya Yehovha a yi va hlongorise!

⁷Hikuva va lunghisile exihundleni ntlhamu ku ndzi phasa mahala, Va cerile rindzi ku rindzela vutomi bya mina mahala.

⁸Ku onhaka a ku va wele ehenhla va nga swi tivi, A va phasiwe hi ntlhamu lowu va wu fihleke; A va wele kona, va lova.

⁹Hi kona moya wanga wu nga ta titsakela eka Yehovha, Wu ta tsakela ku hlayiseka ka yena.

¹⁰Marhambu hinkwawo ya mina ma ta ku: “Yehovha, i mani la fanaka na wena, La ponisaka xisiwana eka la n'wi tlulaka hi matimba, La nga ekhombyeni ni swisiwana, eka vawutleri va vona.”

¹¹Timbhoni ta ku hemba ti yima, Ti ndzi vutisa timhaka leti ndzi nga ti tiviki.

¹²Ti ndzi rihela vunene hi leswo biha; Moya wa mina wu le vusiwaneni.

¹³Kasi mina, eku vabyeni ka vona, a ndzi funengela tinguvu to khwaxa; A ndzi tsongahata moya wa mina hi ku titsona swakudya, Xikhongelo xa mina xi tlhela xi vuya exifuveni xa mina.

¹⁴A ndzi famba khwatsi kukotisa loko ngi ndzi rilela nakulorhi, kumbe makwerhu; A ndzi famba ndzi korhamile enkosini kukotisa loko ndzi feriwe hi manana.

¹⁵Kambe loko ndzi lava ku wa, va tsaka, va hlengeletana; Va hlengeletana ku ndzi sola, ndzi nga swi tivi; Va nga rhuteli ku ndzi handzula.

¹⁶Kun'we ni vasandzi lava hlekisaka emikhubyeni, Va ndzi getselela meno.

¹⁷Wena Hosi, u ta swi hlalela ku fika rini xana? Ponisa moya wanga eku onheni ka vona, Ni vutomi bya mina etinghaleni!

¹⁸Ndzi ta ku twarisa enhlengeletanweni leyikulu, Ndzi ku vonga exikarhi ka vanhu lavo tala.

¹⁹Va nga tshuki va tsaka ha mina lava nga valala eka mina ntsena, Va nga tshuki va tshunyeta hi mahlo lava ndzi vengaka ntsena!

²⁰Hikuva ku rhula a ku kona eku vulavuleni ka vona, Va anakanyela va ku rhula va le tikweni, marito ya ku hemba.

²¹Va ndzi anamele milomu ya vona, Va ku: “Haha! Haha! Mahlo ya hina ma vonile!”

²²U swi vonile, Yehovha, u nga tshuki u miyela! U nga yimi ekule na mina, we Hosi!

²³Pfuka u yima ku ndzi lulamisela timhaka, Xikwembu xanga ni Hosi ya mina, pfuka ku ndzi lwela!

²⁴U ndzi avanyisa hi ku lulama ka wena, Yehovha, Xikwembu xanga! Va nga tshuki va tsaka ha mina.

²⁵Va nga tshuki va vula etimbilwini ta vona va ku: “Haha! Hi leswi hi swi navelaka!” Va nga tshuki va ku: “Hi n'wi mitile!”

²⁶A va khomiwe hi tingana, a va kanakanisiwe kun'we Lava tsakelaka swo biha leswi ndzi telaka! A va funengetiwe hi tingana ni xisandzu Lava tikurisaka ehenhla ka mina!

²⁷A va yimbelele, a va tsake lava rhandzaka ku lulama ka mina, A va vule hi masiku: “A ku vongiwe Yehovha! La rhandzaka ku rhula ka nandza wa yena!”

²⁸Ririmi ra mina ri ta vula ku lulama ka wena, Ri ta vula ku dzuna ka wena hi masiku.